Read Maasai Bible – Biblia Sinyati Ilbrania 8 Bible Online

Ilbrania 8 - Maasai Bible – Biblia Sinyati bible

Ilbrania 8

¹Ore embae sapuk te kuna baa naa ena: eikiaata doi iyiook olapolosani kitok oba neijia, olotonita te tatene e Nkitoo e keper,

²olaisiaayiani le ine wueji sinyati o le ilo ng'obor osipa leme oltung'ani oitasheyie kake Olaitoriani.

³Amu ore olapolosani ake pooki netegeluaki meishooi nkishoorot neitayu lasarri, naa keishiaakino apa neeta sii ninye ele apolosani entoki naishooyo.

⁴Ore te naa kena kop etii, nemeaku hoo olapolosani, amu keetae naa lelo kulikae apolosak ooishooyo nkishoorot anaa enajo nkitanapat.

⁵Neisiaai ninche nyaanyukie o loip le ine wueji sinyati te keper; amu ore pee eaku keun Musa olng'obor, netuutaka Enkai ninye nejoki, “Toduaa taa ntobira pooki toki nturubare lelo sirat likintoduaaki to ldoinyio.”

⁶Kake ore anaa enatiu, enoto ninye Kristo enkisiaayiare naisul ele sotua oyau ninye, amu eitabayioki too nkisiligat naalusoo te nekua.

⁷Amu tenemeeta apa ilo sotua le dukuya ntiyot, naa anaata meetae ae nayaunyeki likae liaare.

⁸Amu ntiyot etoduaa Enkai te ninche pee etejo: “Kepuonu nkolong'i, Olaitoriani ojo, naa kayooki aitayu osotua ng'ejuk o enkaji oo Siraeli o enkaji e Yuda.

⁹Nemetiu anaa olapa sotua laitayio o loo menye enapa olong pee aibung ninche te nkaina ariku aitung'uaa enkop e Misiri; amu eitu ninche etoni tiatua osotua lai, naa ina pee eitu aitoki ashilaa ninche, Olaitoriani ojo.

¹⁰Nele osotua laitayu o enkaji oo Siraeli te nelusoo nena olong'i, Olaitoriani ojo. Kapik inkitanapat aainei atua ilukuny enye, naiger ninche tiatua iltauja lenye, naa kaaku Enkai enye, neaku ninche iltung'ana laainei.

¹¹Nemeitoki pooki ng'ae aiteng'en ole latia enye aashu eiteng'en pooki ng'ae olalashe lenye, ajoki, ‘Tayiolo Olaitoriani,’ amu kaayiolou pooki nanu, eiteru to loti te pooki o metabaiki olkitok te pooki.

¹²Amu katum kenya ake olng'ur tialo ntorrok enye, nemaitoki aekata adamu ng'ok enye.”

¹³Ore eimaki ninye osotua ng'ejuk neitaa Enkai musana ole dukuya. Ore ilo omusanu aaku moruo netinyikaka enkiishata.