Read Maasai Bible – Biblia Sinyati Ilbrania 9 Bible Online

Ilbrania 9 - Maasai Bible – Biblia Sinyati bible

Ilbrania 9

¹Ore doi ninye ilo sotua le dukuya naa keeta apa irrekiei le seremare o ewueji sinyati e nkop.

²Amu eitobiraki olng'obor li oriong, laa atua ninye etii olkilang'et o emisa o emukate nasinya; neji ine Ewueji Sinyati.

³Ore ti oriong olkarasha li aare neitashe olng'obor oji ewueji Sinyati Oleng,

⁴netii olperere lo lasar le nkorropil le saabu o ilo sanduku lo sotua omura pooki alole te saabu, netii atua ilo moti e saabu natii mana, o enapa ng'udi e Aron natubulakita mbenek, o lapa soito lo sotua;

⁵netii ilkerubi le nkitoo ooitushurita ilo orika lo lng'ur. Ore kuna tokitin nimikindim aaimaki taata nikisipu.

⁶Ore pee eidipi aaitabai kuna kitobirat, neaku kejing ilapolosak anaake atua ilo ng'obor aaitabaya empolosare enye;

⁷kake ore ilo ng'obor li are, olapolosani kitok ake ojing, ore ninye naa kata nabo to lari, nemejing meetae osarge oishooyo te nkaraki kewan enye o te nkaraki inkitarruorrot e ilo orere.

⁸Te na bae eitodolu Enkiyang'et Sinyati inchere eton mebolo enkoitoi najing'ieki ine wueji sinyati eton ake eitashe ilo ng'obor lioriong,

⁹naa ina enkitanyaanyukoto e na kata taata. Ore te risioroto ele rrekie neishoori inkishoorot, o lasarri kake meidim aaitaa supati indamunot e lelo oosaisho,

¹⁰kake endaa ake eipirta o enaoki o enkitukuore oo mpukunot kumok, naa imbaa naaitore osesen naatuunoki o metabau enkata e nkibelekenyata.

¹¹Kake ore eewuo Kristo anaa olapolosani kitok loo mbaa supati naapuonu, neaku ore to lng'obor kitok obaya, leme inkaik naaitobira, inchere (ime olena kitayunoto),

¹²etijing'a ninye nabo kata Ewueji Sinyati, neme osarge loo lkineji o lasho etoshoroyie kake osarge lenye makewan, neitadedeyie teina elakunoto oo ntarasi.

¹³Amu amaa te naa ore iltung'ana ooiduruk naa keituku enkisuaakinoto o sarge loo lkineji o loo loing'ok o nkuruon e ntawuo te nkipooto o sesen,

¹⁴kebaa naa elusoo osarge le Kristo, laa teina Kiyang'et oo ntarasi eishoo kewan Enkai meeta entiyoto eituku indamunot inyi neitung'uaa intae isiaaitin naatuata esiaayia Enkai naishu.

¹⁵Ore te nkaraki nena, Kristo olaitutumoni lo sotua ng'ejuk, paa ore lelo ooipotoki netum inkisiligat e njung'ore oo ntarasi, amu enotoki keeya ng'ejuk nalaku too nkitarruorrot lelo ootii abori lido sotua le dukuya.

¹⁶Amu ore te neetae empalai e njung'ore, neng'asi ake aaitadedeyie keeya eilo oitujung'ishe.

¹⁷Amu pooki ake pee ejung'ishoi naa te neetae olotua, amu mejung'ishoi eishu olojung'isho.

¹⁸Naa ina pee eitu apa eitabari olapa sotua musana metii osarge.

¹⁹Amu ore apa, keimaki ake Musa enkitanapata ake pooki enena aliki olorere nedumu osarge loo lasho o loo lkineji, te nebo enkare o lpapit oonyokie loo ntare o lchani oji hisop, neisuaaki embuku kewan o lelo tung'ana pooki,

²⁰ejoito, “Osarge ele lo sotua oitanapa intae Enkai.”

²¹Neiko sii neijia ilo sarge eisuaaki kunda pokira are, ilo ng'obor o ntokitin pooki naasishoreki te seremare.

²²Kesipa nchere, ore to lkerreti loo nkitanapat, osarge apake eipokieki pooki toki, naa ore eitu eibukori osarge nemeetae empalakinoto oo ng'ok.

²³Neaku meeta apake kata nemeitukui kuna tokitin naa inkitanyaanyukot ake e nekua e keper aaipokie kulo asarri, kake ore nena tokitin maate e keper neipokieki lasarri oolang kulo.

²⁴Amu eitu eitijing'i Kristo, ewueji sinyati naitobiraki too nkaik naa enkitanyaanyukoto ake e idia nasipa, kake atua keper kewan etijing'a, paa keitashe taata te dukuya Enkai te rishata ang.

²⁵Neme keitoki ninye Kristo aigiligil aishooyo kewan, anaa enaiko ilo apolosani kitok ejing atua ine Wueji Sinyati anaake to lari eeta osarge leme o lenye;

²⁶amu te naa neijia etiu, naa anaata eigilieki ninye emion ana apa moitie pee eitamanyuni enkop. Kake ore enatiu, etaliee ninye nabo kata ake te pooki eiting'o enkata pee eiwuang'ie ing'ok eitaa ninye kewan olasar.

²⁷Naa ore anaa enaye iltung'ana nabo kata ake, ore pee elusoo ina nelotu enkiguana,

²⁸neijia sii etiu Kristo, ore eidipaki aaitarasai ena nabo newa ng'ok oo lkumok, keliooyu eni are, neme ng'ok elotu aararr kake kelotu aitajeu lelo ooanyita ninye te yieunoto sapuk.