Read Maasai Bible – Biblia Sinyati Yakobo 1 Bible Online

Yakobo 1 - Maasai Bible – Biblia Sinyati bible

Yakobo 1

¹Yakobo, osinka le Nkai o lo Laitoriani Yesu Kristo, Enkirorokino, too loshon tomon o aare ooidapashakino inkuapi pooki.

²Ilalashera laainei, enkenai inchere eng'ida te nitumutumu intemat oo mpukunot kumok,

³amu iyiololo nchere ore entemata natemi enkirukoto inyi neyau eng'iriata.

⁴Ning'iriri ometabaiki enkiting'oto pee iakuku ilooiputakinote nelulung'a neitu eng'oriki toki.

⁵Naa te netii olinyi otong'orikia eng'eno, enchoo ninye metoomonu te Enkai naisho iltung'ana pooki te leng'on o te mpiris naa keishori sii ninye.

⁶Kake enchoo ninye eikilikuanu te nkirukoto meeta olng'ash katukul; amu ore oltung'ani oing'ash netiu anaa ilopir le naiposha ooreu osiwuo nekutaa.

⁷Mincho oltung'ani laaijo ilo edamu ajo ketum toki to Laitoriani,

⁸oltung'ani oata mbaa are to ltau lemeuno too rrekiei lenyena pooki.

⁹Inchoo olalashe aisinani metishipayu te nkaraki nailepieki ninye,

¹⁰ore olalashe karsis enchoo sii ninye metishipayu te nkaraki neitadowuoki, amu etiu anaa intapuka e ntim kelusoo.

¹¹Amu keilepu enkolong eirowua, nepej intapuka nemugut, nedoiyio, nerruoyo empukunoto e sidano enye. Neijia ake etiu oltung'ani karsis, kerruoyo eitoritote mbaa enyena pooki.

¹²Emayiana oltung'ani ong'iri too ntemat, amu ore pee eidip ating'iria entemata neng'amu ninye enkopiyia e nkitoo e nkishui naisiligie Enkai, lelo oonyor Ninye.

¹³Emincho ake oltung'ani te netemi, ejo, “Enkai naatetema;” amu metemisho Enkai too ntorrok, nemetem sii ninye Enkai oltung'ani.

¹⁴Kake ketemi pooki tung'ani, te nkaraki eng'uarrata enye torrono; nayietaa aitalamaa neitasur.

¹⁵Ore pee eidip ina ng'uarrata anoto intona neiu ing'ok. Ore pee ebaya ng'ok, neiu keeya.

¹⁶Ilalashera laainei lanyor, eminchosho eleji intae.

¹⁷Ore entoki pooki sidai o enkishooroto pooki nemeeta entiyoto nedou eing'uaa keper enetii Papa loo wang'aritin, nemeibelekenya Ninye, aashu etii enetii Ninye oloip le nkibelekenyata.

¹⁸Te nkaraki eyieunoto enye, etoiwuo Ninye iyiook to rorei loo sipat, pee eaku iyiook ilng'anayio le dukuya loo nkitobirat enyena.

¹⁹Entayiolo ena ilalashera laainei lanyor. Inchoo pooki tung'ani metaa olosioki aning, nemesioki airo, nemesioki sii agoro.

²⁰Amu ore engoro o ltung'ani nemeas isipat e Nkai.

²¹Entalama ate olduruk pooki o enkumoi oo ntorrok, ning'amaa te mborron Ororei otuunokoki atua intae oidim aitajeu iltauja linyi.

²²Emilejileje ate kake entaa laasak lo rorei mme lainining'ok ake.

²³Amu te neaku ake oltung'ani olaning'oni lo rorei, neme olaasani, netiu ninye anaa oltung'ani oing'or enkomom enye te nking'uret.

²⁴Amu keing'or ninye enkomom enye, ore pee elo, nerikino nabo kata enaikununo.

²⁵Kake ore olojur asipu inkitanapat bayarot, inkitanapat e lakunoto, nesheikino, nemetiu anaa elde ake oning nerikino, kake olaasani ooata nkiaasin, ore ilo nemaiyiani ti atua iyiasat enyena.

²⁶Te nedamu oltung'ani ajo olaseremani le Nkai, nemeitore olng'ejep lenye, kewan elej, ore eseremare enye naa pesho.

²⁷Ore eseremare sidai nemeeta entiyoto te nkomom e Nkai, Papa, naa ena: embaikinoto oo ltung'ana okishin o nkolia, tiatua isinaitin lenye o erripoto e kewan pee mitum entibili te nkop.