Read Maasai Bible – Biblia Sinyati 1 Petero 2 Bible Online

1 Petero 2 - Maasai Bible – Biblia Sinyati bible

1 Petero 2

¹Enturrai elap pooki o losek o esunkuroisho o esukeny pooki, nitiuwu anaa inkera naanana,

²entang'uar ororei le Nkiyang'et lemeeta olosek, paa te ninye ibululu aabaiki enjeunoto.

³Amu inchiamishama enanai e oshoke o Laitoriani.

⁴Wootu enetii ninye, osoit otanyaita iltung'ana, kake etegeluaki, neeta tipat too nkonyek e Nkai.

⁵Anaa isoito ooishu, pee iakuku inkasisin e mumuaisho sinyati ooitayu ilasarri sinyat le Nkiyang'et oong'uarrayu te Nkai te Yesu Kristo.

⁶Amu etisiraki tiatua Ilkigerot aajo, “Ng'ura airragie te Sion Osoit kitok lo lmairroto, ogeluno negol enkinyiang'a, ore pooki oiruk nemeitukurruni.”

⁷Ore te intae ilo oiruk keeta tipat oleng, kake ore te lelo lemeiruk, etaa “Ilo soit otanyaita ilashetak otaa kitok to lmairroto”

⁸naa “Osoit orror iltung'ana, osoit sapuk obatat iltung'ana,” kerrorro ninche amu etanyaita ening ororei, naa ina apake eji pee eitaaie ninche.

⁹Irara intae olorere ogeluno, inkasisin e nkaji e nkitoo, olorere sinyati, iltung'ana le Nkai makewan, pee itumutumu aainosai inkiaasin enyena e nking'asia, o loipotuo intae entung'uai enaimin aitijing atua ewang'an enye naing'asiasho.

¹⁰Intae ilemera olorere apa; kake irara taata olorere le Nkai Ileitu apa etum olng'ur kake itang'amutua olng'ur.

¹¹Ilanyor laainei asai intae, anaa ilomon o laisikak pee ipaasharere ing'uarrat o sesen naashet enjore naarare iltauja linyi.

¹²Niaakuku ilooata orrekie sidai tiatua Loreren lemeiruk, pee te neiro neiteleiki intae mbaa anaa laasak loo ntorrok, neidim te nedol too nkiasin inyi sidain, aaisisa Enkai te nkolong e mbaikino.

¹³Eyanyita pooki kitoria oo ltung'ana to lbae lo Laitoriani, te naa ko laiguanani kitok,

¹⁴anaa ilooti te ninye ooirriwuaki meitamio lelo ooas intorrok neisis lelo ooas isidain.

¹⁵Amu eyieunoto e Nkai inchere ore te yasata oo sidain nintigiriri emodai oo ltung'ana oomoda.

¹⁶Entotoni anaa iltung'ana oolakuno, nimintaa elakunoto inyi entoki nintiemorierie entorroni, kake entobik anaa ilaisiaayiak le Nkai.

¹⁷Eyanyita iltung'ana pooki, entonyor ilalashera, o nkanashera eyanyita Enkai niureyuyu olaiguanani kitok.

¹⁸Lo aisiaayiak entadou ate, niyanyititi oleng ilaitoriak linyi, neme ake isupati nebor, kake o metabaiki lelo ooisomit intae.

¹⁹Amu ketum oltung'ani enchunet te naa, ore te nkaraki nadamu Enkai neng'iri te neidong'i metii esipata.

²⁰Amu kaa dupoto ina, te neitamei intae enkata niaasiasa intorrok? Kake te niaasiasa isupati, ning'iriri te neisilisili intae niaatata enchunet te Nkai.

²¹Amu teina eipotoki intae, amu eisilisiloki sii ninye Kristo te nkaraki intae, neing'ueki intae enkitanyaanyukoto, pee isujusuju iroruat enyena.

²²Eitu eas ninye eng'oki, neitu etumieki te nkutuk enye ororei lo losek laa ore pee emori,

²³neitu eshukoki emorisho, ore pee eisilisili neitu ejo aarisho, kake eitarasaka imbaa enyena pooki ilo oiguanare te sipata.

²⁴Ninye makewan otanapa ing'ok ang to sesen lenye te nchumata olchani, pee kitum aatuata too ng'ok, nikinchu too supati, too lbaa lenyena eishiunyieki intae.

²⁵Amu itapong'ori apa anaa intare naaimina, kake itorrinyokinote taata Olchekut naa Olarriponi loo ltauja linyi.