Read Maasai Bible – Biblia Sinyati 1 Petero 3 Bible Online

1 Petero 3 - Maasai Bible – Biblia Sinyati bible

1 Petero 3

¹Neijia entotiu sii intae, na kituaak entadou ate too lpayiani paa te netii te ninche oleitueiruk Ororei, netum aairuko metii ororei te nkaraki olkuaak loo nkituaak enye,

²te nkaraki nadol ninche olkuaak linyi sidai, le nkuretisho.

³Eminchosho eaku enkuso inyi enioriong osesen, o enchetata oo lpapit, o enkikodo oo ntokitin e saabu anaa ene nkishopoto o nkilani,

⁴kake enaisudoro tiatua oltau, nememuta o emborron o engira, neeta tipat oleng too nkonyek e Nkai.

⁵Amu neijia apa eikuna inkituaak sinyat, naaisilig Enkai te nekus ate, aaning ilpayiani lenye,

⁶anaa enatoning'o Sara Abraham pee eipot ninye ajo olaaitore lai. Nitaa intae inkera enyena, ti niaasiasa sidan, niminchosho toki meituria intae.

⁷Entotiu sii intae neijia lo payiani, entotoni aitobiraki o nkituaak inyi te ng'eno, nincho enkitok inaairirikino anaa entoki nashal, amu irara ilajung'ok te nebo le mpiris e mpuaan pee meiboori enkomono inyi.

⁸Ore enabayie entaa pooki ilooata endamunoto nabo, loobore olng'ur o enyorrata oo lalashera, o nkanashera iloonana oishuaa, ilo obor indamunot.

⁹Neme iloolaakino entorroni te ntorroni, anaa oldeket to ldeket, kake entapaashare intae entamayianisho, amu teina doi eipotoki intae pee itumutumu aatujung emayianata.

¹⁰Amu ejo ilkigerot “Ore ilo onyor enkishui neyieu nedol inkolong'i sidain, inchoo erishie olng'ejep lenye entorroni nerishie enkutuk enye pee mejo emonkoi.

¹¹Inchoo eibelekenya apaashare entorroni neas esidai; inchoo eing'oru eseriani nesuj oleng.

¹²Amu etii inkonyek o Laitoriani shumata oo lelo supati, nebolo inkiyiaa enyena te enkomono enye; kake kegilunore enkomom o Laitoriani lelo ooas intorrok.”

¹³Kaing'ae oidim aitaasa intae entorrono, te naa airara intae ilanyuaak le nena sidain?

¹⁴ Kake te naa keisilisili hoo ninye intae te nkaraki oo supati, imayianana. Emiureyu ninche, nimiruturutu.

¹⁵Kake ore too ltauja linyi eyanyita Kristo anaa Olaitoriani, enterretenata anaake pee iwalikiki oltung'ani pooki oikilikuan intae embae o siligi otii atua intae. Kake te mborron o te nkanyit.

¹⁶Entisidana iltauja linyi, paa ore enkata nasukenyi olkuaak linyi sidai tiatua Kristo, netumi aaitukurru.

¹⁷Amu enaikash te neitamei oltung'ani easita isupati te naa eyieunoto e Nkai, alang te naa intorrok.

¹⁸Amu etua sii Kristo nabo kata ake too ng'ok nemeigil, osupat too leme supati, pee etum atoriku iyiook enetii Enkai. Amu etaraki metua to sesen neitopiwuoki te Nkiyang'et

¹⁹te ninye sii eshomo ainosaki ilomon le Nkai nkiyang'eta naa ena.

²⁰Lelo apa ootanyaita ening, eton eanyisho eng'iriata e Nkai too nkolong'i e Noa eshetita emeli, ina naa ilkuti tung'ana isiet ake eitajewuoki te nkare.

²¹Naa keitanyaanyukieki ena are enkare e nkibatisa naitajeu neme te nkisujata o loirerio lo sesen, kake eomonoto e Nkai to ltoilo oisiasha lo ltau te mpiunoto e Yesu Kristo,

²²oilepa alo keper, neton te nkaina e tatene e Nkai, netipikaki te nebo ilmalaika, o enkitoria e ngolon meetu abori ninye.