Read Maasai Bible – Biblia Sinyati Ilarishak 1 Bible Online

Ilarishak 1 - Maasai Bible – Biblia Sinyati bible

Ilarishak 1

¹Ore te siadi keeya e Yoshua neikilikuanishore iltung'ana le Israel Olaitoriani ejo, “Kaing'ae ong'as aituruk alo te nkaraki iyiook pee earare Ilkanaani?”

²Nejo Olaitoriani, “Yuda oilep alo; aishooyie nanu enkop apik atua enkaina enye.”

³Nejoki Yuda Simion olalashe lenye, “Ilepu wou te nebo nanu tamanya atua ena kop naatoorikiaki nanu, pee kitum aataarare Ilkanaani; ore sii nanu naa kaiko neijia alo te nebo iyie atua ina kop nikitoorikiaki iyie.” Nelo Simion te nebo ninye.

⁴Neilep Yuda alo neishooyo Olaitoriani Ilkanaani o Lperesi apik atua enkaina enye, nemir apa ninche ilewa nkalifuni tomon te Besek.

⁵Nepuonu apa ninche aadoiki Adonibesek te Besek, nearare ninye, neisulie Ilkanaani o Lperesi.

⁶Neisik Adonibesek; kake etimira, neibung ninye, nedung'oo ninche ilmogirrani lenyena loo nkaik o loo nkejek.

⁷Nejo Adonibesek, “Ore apa ilaiguanak intomoni naapishana ootudung'oyioki ilmogirrani lenye loo nkaik o loo nkejek naa ti abori emisa ai esotu ndaiki naadoyio; anaa enataasa nanu, neaku atalaaka nanu Enkai.” Neyau ninche ninye Yerusalem, neye ninye teine.

⁸Nearare iltung'ana le Yuda Yerusalem, neibung, near te nepi o lalem nepik ina anasa enkima.

⁹Ore te siadi nena nepuo iltung'ana le Yuda aarare Ilkanaani apa oomanya enkop oo ldoinyo tiatua Negeb o teina kop nagum.

¹⁰Nelo Yuda aarare lelo Kanaani apa oomanya Hebron, ore apa enkarna e Hebron naa keji Kiriat Arba; near neisulie nkajijik e Sheshai o Ahiman o Talmai.

¹¹Nedumunye ilewa le Yuda teine nepuo aarare lelo oomanya Debir. Ore apa enkarna e Debir naa keji Kiriat-sefer.

¹²Nejo Kaleb, “Ore ilo orasaki Kiriat-sefer neya ninye, naisho ninye Aksa entito ai meitaa enkitok enye.”

¹³Neya Otniel olayioni le Kenas, olalashe oti le Kaleb, neisho Kaleb ninye Aksa ina tito enye meitaa enkitok.

¹⁴Ore ake pee eyam ninye, neikilikuan Aksa ninye metoomono menye enkop; nedou ninye to sikiria lenye, nejoki Kaleb ninye, “Kainyoo iyieu?”

¹⁵Nejoki ninye, “Nchooki enkishooroto; ore amu kiterewa nanu mashomo enkop e Negeb, nchooki sii nkonyek e nkare.” Neisho Kaleb ninye nkonyek e nkare e shumata o ni abori.

¹⁶Ore lelo le ishoi e Keni, ilo aputani le Musa, neilep aapuo te nebo iltung'ana le Yuda teina anasa oo ltuka nepuo ong'ata e Yuda apa natii Negeb embata e Aradi; nepuo ninche aatoni te nebo o lelo tung'ana.

¹⁷Nelo Yuda te nebo Simion olalashe lenye, nemir ninche Ilkanaani apa oomanya Sefat, neidaikie tukul. Neaku keji apa enkarna e ina anasa Horma.

¹⁸Ewa sii apa Yuda Gasa te nebo enkop enye o Ashkelon te nebo enkop enye o Ekron te nebo enkop enye.

¹⁹Netii apa Olaitoriani te nebo Yuda neya ninye aitaa enenye ina kop oo ldoinyo, kake eitu apa eidimu ataarai aipang'ie lelo oomanya enkisiashata, amuk eeta apa ninche ngarrin oo sekenke.

²⁰Neishooyioki apa Hebron aaisho Kaleb anaa apa enatejo Musa; nearaa Kaleb aipang'ie tiatua ninye lelo ayiok pokira okuni le Anak.

²¹Kake eitu earaa iltung'ana le Benchamen Ilyebusi apa oomanya Yerusalem; neaku etobiko apa Ilyebusi te nebo iltung'ana le Benchamen te Yerusalem ometabaiki ena olong.

²²Ore sii apa enkaji e Yosef neilep aapuo aarare Betel; netii Olaitoriani te nebo ninche.

²³Neirriwaa enkaji e Yosef ilaikitalak meshomo aaikitalan Betel. (Ore apa enkarna e ina anasa naa keji Lus).

²⁴Nedol lelo aikitalak oltung'ani eipang'u te nkanasa, nejoki, “Tuutaki sii ake iyiook enkoitoi nalo atua enkanasa, pee kintaas iyie esidai.”

²⁵Neitodol ninye ninche enkoitoi nalo atua ina anasa; near ninche ina anasa te nepi o lalem, kake eishoo ninche ilo tung'ani te nebo olmarei lenye meshomo.

²⁶Nelo ilo tung'ani enkop oo Lhiti nelo ashet enkanasa nejo enkarna enye Lus; ina enkarna enye o metabaiki ena olong.

²⁷Eitu apa earaa enkaji e Manase aipang'ie lelo oomanya Betshean o nkang'itie enyena kutiti, aashu Taanak o nkang'itie enyena kutiti, aashu lelo oomanya Dori o nkang'itie enyena kutiti aashu lelo oomanya Ibleam o nkang'itie enyena kutiti, aashu lelo oomanya Megido o nkang'itie enyena kutiti; kake eting'iria Ilkanaani aabik tiatua ina kop.

²⁸Ore ake pee egolu Israel, nepik ninche Ilkanaani enkisiaayiare nagol, kake eitu earaa ninche aaipang'ie tukul.

²⁹Eitu apa earaa enkaji e Efraim aipang'ie lelo Kanaani oomanya Geser; kake etobiko Ilkanaani tiatua Geser te nebo ninche.

³⁰Eitu apa earaa enkaji e Sebulon aipang'ie lelo oomanya Kitron, aashu lelo oomanya Nahalol; kake etobiko Ilkanaani tiatua ninche neaku ilenkisiaayiare nagol.

³¹Eitu apa earaa enkaji e Asheri aipang'ie lelo oomanya Ako, aashu lelo oomanya Sidon, aashu ile Ahalab, aashu ile Aksib, aashu ile Helba, aashu ile Afik, aashu ile Rehob;

³²kake etobiko apa ile Asheri tiatua Ilkanaani lelo oomanya ina kop; amu eitu earaa ninche aaipang'ie.

³³Eitu apa earaa enkaji e Naftali aaipang'ie lelo oomanya Bet-shemesh, aashu lelo oomanya Bet-anat, kake etobiko ninche tiatua lelo Kanaani oomanya ina kop; ore ake eyia, ore lelo oomanya Bet-shemesh, o le Bet-anat netaa ilenkisiaayiare nagol te ninche.

³⁴Eturrumokito apa Ilamori iltung'ana le Dan enkop oo ndoinyo, amu eitu apa eisho ninche meetu enkisiashata tiabori.

³⁵Neng'iri Ilamori aabik tiatua Har-heres o tiatua Aiyalon, o tiatua Sha-albim, kake eturokine enkaina e nkaji e Yosef ninche te ngolon, neaku ile nkisiaayiare nagol.

³⁶Ore olpolosie loo Lamori nelo te nkilepunoto e Akrabim ebaiki Sela neilep.