Read Maasai Bible – Biblia Sinyati Ilarishak 10 Bible Online

Ilarishak 10 - Maasai Bible – Biblia Sinyati bible

Ilarishak 10

¹Ore te siadi Abimelek nedumunye Tola olayioni le Pua, olayioni le Dodo pee ekordu Israel, oltung'ani le Isaakar, neton apa ninye te Shamir tiatua ina kop oo ldoinyo e Efraim.

²Neaku ninye olarishani le Israel ilarin tikitam ookuni. Neye ninye, nenukari te Shamir.

³Ore te siadi ninye nedumunye Yair, ilo le Gilead, laa ninye apa otaa olarishani le Israel ilarin tikitam oaare.

⁴Neeta apa ninye ilayiok tomoni uni ooked isirkon tomoni uni; neeta apa ninche nkanas tomoni uni, naaji Yair o metabaiki ena olong, apa naatii enkop e Gilead.

⁵Neye apa Yair nenukari te Kamon.

⁶Neitoki iltung'ana le Israel aas intorrok too nkonyek o Laitoriani, neisiaai inkaitin e Baal o Ashtarot, nena aitin e Siria o nkaitin e Sidon o nkaitin e Moab o nkaitin oo Lamori o nkaitin oo Filistia, neing'uaa ninche Olaitoriani neitu eisiaai ninye.

⁷Neyupuyup engoro o Laitoriani tialo Israel, nemir ninye ninche metijing'a atua enkaina oo Lfilisti o atua enkaina oo Lamori.

⁸Neisomit ninche neibooki enkop iltung'ana le Israel te ilo ari. Ore too larin tomon o isiet neibooki ninche enkop lelo tung'ana le Israel apa ootii lido kekun le Yordan te nkop oo Lamori, apa natii Gilead.

⁹Nelang'u Ilamori Yordan aapuonu sii aarare Yuda earare Benchamen nearare enkaji e Efraim; neaku etudupa osina Israel oleng.

¹⁰Neishiraki iltung'ana le Israel Olaitoriani, ejo, “Kitaasa iyiook eng'oki tialo iyie, te nkaraki nikitung'uaitie Enkai ang nikisiaai inkaitin e Baal.”

¹¹Nejoki Olaitoriani iltung'ana le Israel, “Keitu apa nanu akordu intae aitung'uaa Ilmisiri naitung'uaa Ilamori, naitung'uaa Ilamoni naitung'uaa Ilfilisti?

¹²Eibookito sii intae enkop iltung'ana le Sidon o Lmaleki o Lmaoni; nikinchirakiki intae nanu, nakordu nanu intae aitayu tiatua inkaik enye.

¹³Ore ake eyia kitung'uaitie intae nanu nipuopuo aaisiaai kulie aitin; neaku maitoki nanu akordu intae.

¹⁴Enchom enchiraki nena aitin nitudutaitie; nchoo ninche ekordu intae te nkata inyi o sina.”

¹⁵Nejoki iltung'ana le Israel Olaitoriani, “Kitaasa iyiook eng'oki; ntaasa iyiook anaa enidol eishiaakino te iyie; kake tokordu ake duoo iyie iyiook, kitoomono iyie ena olong.”

¹⁶Neiwuang'ie ninche nena aitin omon apa naatii atua ninche, neisiaai Olaitoriani, netum ninye emion oleng te nkaraki osina le Israel.

¹⁷Neipotuni apa iltung'ana le Amon metanapata, nepik ninche ilng'oborri lenye Gilead, neiturrurro sii ninche iltung'ana le Israel te nebo, nepik ilng'oborri lenye Mispa.

¹⁸Ore lelo tung'ana, lelo arikok le Gilead, nejokino maate, “Kalo tung'ani oiteru aarare ile Amon? Ore ilo oiteru naa ninye oaku olkitok te lelo pooki oomanya Gilead.”