Read Maasai Bible – Biblia Sinyati Ilarishak 13 Bible Online

Ilarishak 13 - Maasai Bible – Biblia Sinyati bible

Ilarishak 13

¹Neitoki iltung'ana le Israel aas entorroni too nkonyek o Laitoriani; neishooyo Olaitoriani ninche apik atua enkaina oo Lfilisti too larin artam.

²Netii apa oltung'ani obo le Sora, lo losho le Dan, oji enkarna enye Manoa; naa koolupi apa enkitok enye nemeeta nkera.

³Neipang'aki olmalaika lo Laitoriani ina kitok nejoki ninye, “Ng'ura ajo ira iyie olupi nimiaata nkera; kake inutayu iyie niiu olayioni.

⁴Metaa ng'ura kewan, miok enaisho oo sabibu aashu enaisho napi, niminya entoki nemesinya,

⁵amu inutayu iyie niiu olayioni. Nemeetae olmurunya opiki shumata endukuya enye, amu ore ina ayioni naa keaku Olnasarayoi[2] te Nkai ebaiki einoto enye; naa keiteru ninye akordu Israel aitung'uaa enkaina oo Lfilisti.”

⁶Nelotu ina kitok ajoki olpayian lenye, “Eewuo oltung'ani le Nkai enatii nanu, ore empukunoto enye nenyaanyukie empukunoto o lmalaika le Nkai, keitureisho oleng; eitu nanu aikilikuan ninye eneing'uaa neitu ninye aaliki enkarna enye;

⁷kake aatiaaka ninye nanu, ‘Ng'ura ajo inutayu iyie niiu enkayioni; metaa naa miok enaisho oo sabibu aashu ae aisho napi niminya entoki nemesinya, amu keaku ina ayioni Olnasarayoi te Nkai ebaiki einoto o metabaiki keeya enye.’ ”

⁸Neomon Manoa Olaitoriani, nejo, “Olaitoriani lai, aatoomono iyie, nchoo ilo tung'ani le Nkai lirriua menyaaki alotu enikitii iyiook, aiteng'en iyiook enikintaas ina ayioni naini.”

⁹Nening Enkai oltoilo le Manoa, neigil ilo malaika le Nkai alotu enetii ina kitok etonita te nkurma; kake metii apa Manoa olpayian lenye te nebo ninye.

¹⁰Nekuet ina kitok nabo kata alo ajoki olpayian lenye, “Ng'ura ajo ore olapa tung'ani oewuo enatii enapa olong aanyaaka aipang'aki.”

¹¹Nedumunye Manoa nelo asuj enkitok enye, nelotu enetii ilo tung'ani nejoki ninye, “Kaiyie apa ilo tung'ani oirorie ena kitok?” Nejoki ilo tung'ani, “Nanu ilo.”

¹²Nejo Manoa, “Amaa, kenya te nebaya irorei linono, kaji kenya etiu ina ayioni, naa kaa kenya eas?”

¹³Nejoki ilo malaika lo Laitoriani Manoa, “Ore nena pooki natiaaka ena kitok nchoo ninye eing'or.

¹⁴Menya ninye ae toki naing'uaa isabibu nemeok enaisho aashu ae toki nemesinya. Ore nena pooki naitanapa ninye nchoo ninye eas.”

¹⁵Nejoki Manoa ilo malaika lo Laitoriani, “Aatoomono, nchoo iyiook maiboo iyie pee kintobiraki iyie olkuoo le kine.”

¹⁶Nejoki ilo malaika lo Laitoriani Manoa, “Tinikimbok iyie nanu, nemanya nanu endaa ino; kake ti nintobir olasar opejori, ntobiraki naa Olaitoriani.” (Amu eitu apa eyiolou Manoa nchere olmalaika lo Laitoriani ninye.)

¹⁷Nejoki Manoa ilo malaika lo Laitoriani, “Eikiji ng'ae enkarna, pee aa te nelo kenya nebaya irorei linono, nikitum aaishoo iyie enkanyit?”

¹⁸Nejoki ilo malaika lo Laitoriani ninye, “Kainyoo pee inkilikuanu enkarna ai, itoduaa ajo enenking'asia?”

¹⁹Neya Manoa olkuoo le kine te nebo enkishooroto e ntapa, neitaiki te nchumata endapidapoi Olaitoriani olasar, ilo laa ninye oas inenking'asia.

²⁰Ore ake pee eilep olng'ejep le nkima alo shumata epuku te ilo asar, neilep ilo malaika lo Laitoriani te ilo ng'ejep le nkima lo lasar eing'orita Manoa o enkitok enye; nebatata aaitabaiki nkomomi enye enkop.

²¹Eitu aekata eigil ilo malaika lo Laitoriani aipang'aki Manoa o enkitok enye. Neyiolou apa Manoa nchere olmalaika lo Laitoriani ninye.

²²Nejoki Manoa enkitok enye, “Kesipa eikiye iyiook, amu kitoduaa iyiook Enkai.”

²³Kake etiaaka enkitok enye ninye, “Tenaa keyieu apa Olaitoriani near iyiook matuata, anaata eitu ninye eng'amu ilo asar opejori o lasar le ntapa too nkaik ang, aashu eitodol iyiook kuna baa pooki, aashu eliki iyiook mbaa naaijo kuna.”

²⁴Neiu ina kitok olayioni, neipot enkarna enye ajo Samson; nebulu ina ayioni, nemayian Olaitoriani ninye.

²⁵Neiteru Enkiyang'et o Laitoriani aputu ninye tiatua Mahane-dan te rishata e Sora o Eshtaol.