Read Maasai Bible – Biblia Sinyati Ilarishak 16 Bible Online

Ilarishak 16 - Maasai Bible – Biblia Sinyati bible

Ilarishak 16

¹Nelo apa Samson Gasa, nedol ninye emulayoi teine, nelo enetii ninye.

²Netiaakaki apa lelo le Gasa, “Eewuo Samson ene,” neman ninche ine wueji neirrag aanyu ninye enkewarie pooki te nkishomi e ina anasa. Negira ninche enkewarie pooki, ejo, “Mataanyu iyiook o mekenyu, pee kitum aataar ninye metua.”

³Kake eirure apa Samson o metaa empolos e nkewarie; ore te mpolos e nkewarie nedumunye neya nkikeneta e kishomi e ina anasa o ng'apeta pokira are, nedotu ninche, te nebo o esekenkei o pooki toki, neiteleiki ninche oloililai nenap ninche enchumata e ina doinyo apa natii dukuya Hebron.

⁴Ore te siadi ena nenyorru Samson enkitok apa natii oerata le Sorek, naji enkarna enye Delila.

⁵Nepuonu ilkituaak loo Lfilisti enetii Delila nejoki ninye, “Ilejileja Samson, pee idol enetii engolon enye kitok, naa tiaa oitoi kiindim aaitojoola ninye, pee kitum iyiook aateen ninye nikigilu ninye; nikisilisil; naa eikincho iyiook iyie oltung'ani ake mpisai enkalifu nabo o iip nabo e nkosholai.”

⁶Nejoki Delila Samson, “Tolikioki sii ake enetii ena golon ino kitok, naa kaji naaji kinkoni ti nikieni, pee kitum oltung'ani atigilu.”

⁷Nejoki Samson ninye, “Te naaeni nanu too mpi oo nkai ng'ejuko naapishana neton eitu etoyu, nashalu nanu, natiu anaa pooki tung'ani.”

⁸Neyaki ilkituaak loo Lfilisti Delila mpi oo nkai naapishana ng'ejuko neenie ninye.

⁹Neeta apa Delila iltung'ana ooisudori tiatua olgilata ti aji. Nejoki Delila Samson, “Kipuonu Lfilisti aaibung, Samson!” Nedung ninye nena pi anaa usin naaibung'a enkima. Neaku meyioloi apa enkisudoroto e ngolon enye.

¹⁰Neitoki Delila ajoki Samson, “Ng'ura, kitusukenya nanu nikiteleja nanu; tolikioki sii ake enikinkoni pee kimbung'i.”

¹¹Nejoki ninye, “Te naaeni nanu too lgoso ng'ejuko leitu aekata eenishoreki, nashalu nanu natiu anaa pooki tung'ani.”

¹²Neyau Delila lelo goso ng'ejuko neen Samson te ninche, nejoki ninye, “Kipuonu Ilfilisti aaibung, Samson!” Ore apa iltung'ana ooisudori netii olgilata tiatua aji, nedung lelo goso too nkaik enyena anaa empito.

¹³Neitoki Delila ajoki Samson, “Ore o tene kitusukenya nanu, nikilej nanu; tolikioki nanu enikinkoni ti nikimbung'i.” Nejoki Samson ninye, “Ti nishet kuna tukusi aainei naapishana e ndukuya ai te nkarasha nintirrish oleng te ncheitoi, nashalu nanu natiu anaa pooki tung'ani.”

¹⁴Neaku ore apa eirura Samson, neitayu Delila nena enat oolpapit pokira naapishana neshetaki enkarasha neitirrish ninche aunoki encheitoi, nejoki ninye, “Kipuonu Ilfilisti aaibung iyie Samson!” Neinyototo ninye too njio enyena nedotu encheitoi neshurtaa ina arasha nashetakino.

¹⁵Nejoki Delila ninye, “Kaji iyie inko ti nijo, ‘Kaanyor nanu iyie,’ te nemetii oltau lino te nebo nanu? Kitusukenya iyie kuna katitin pokira uni, neitu iyie kiliki enetii engolon ino kitok.”

¹⁶Ore ake pee eitirrishaki Delila ninye too rorei lenyena anaake, neitagor Samson, nenauru oltau lenye oleng.

¹⁷Neliki Samson Delila mbaa enyena pooki, nejoki Delila, “Eitu ae kata eim olmurunya endukuya ai; amu ataa apa nanu Olnasarayoi te Nkai atii enkoshoke e yieyio. Ore ake naaji pee aabarni, naaing'uaa nanu engolon ai, nashalu nanu natiu anaa pooki tung'ani.”

¹⁸Ore ake pee edol Delila ajo etolikio ninye mbaa enyena pooki, neirriwaa olkilikuai aipotu ilkituaak loo Lfilisti pooki, nejoki, “Elepu wootu ena kata nabo, amu aatolikio mbaa enyena pooki.” Neilepu ilkituaak loo Lfilisti aapuonu enetii Delila, neyau mpisiai too nkaik enye.

¹⁹Neisho ninye meirurayu too nkejek enyena; neipotu ninye oltung'ani, neisho ninye metabarnu nena enat naapishana oo lpapit le ndukuya enye. Neiteru aitanyamal ninye, neing'uaa engolon enye ninye.

²⁰Nejo Delila, “Kimbung'ita iyie Ilfilisti, Samson!” Neinyototo ninye too njio, nejo, “Kaipang nanu alo boo anaa oshi ake nkulie katitin, narerio.” Neitu apa eyiolou ninye ajo etung'uayie Olaitoriani ninye.

²¹Neibung Ilfilisti ninye nekurtu nkonyek enyena neitadou ninye aayau Gasa, neen ninye too lpisia lo suyai; neidong apa ninye enkano etii atua jila.

²²Kake enyaakita apa ilpapit le ndukuya enye aabulu ina kata eidipaki aatabarn.

²³Neiturrurro apa ilkituaak loo Lfilisti pee etum aaitaiki olasar kitok Dagon, enkai enye, neshipa sii, amu etejo apa ninche, “Eishorua enkai ang Samson ilo mang'atinta lang apik atua inkaik ang.”

²⁴Ore ake pee edol iltung'ana ninye neisis enkai enye; amu etejo ninche, “Eishorua enkai ang olmang'atinta lang apik atua enkaina ang, laa ninye apa otumuta enkop ang, netasesekuana ilkumok lang.”

²⁵Ore eting'idate iltauja lenye, nejo ninche, “Empoto Samson pee elotu aitiship iyiook.” Neipotu ninche ninye tiatua jila, pee eitiship ninye ninche. Neisho ninche Samson meitasho te rishata oo ng'apeta are.

²⁶Nejoki Samson enkayioni apa naa ninye narik aibung enkaina, “Ntasho sii iyie mairrapirrapa ng'apeta naairishaa ena aji, pee atum aigarakinoyu ninche.”

²⁷Nebore apa ina aji ilewa o nkituaak; netii apa ilkituaak pooki loo Lfilisti ine; ore enchumata enkaji netii apa iltung'ana oobaya nkalifuni uni ilewa o nkituaak, ooing'orisho ina kata eiguran Samson.

²⁸Neipot Samson Olaitoriani ajo, “Olaitoriani Enkai, tadamuaki nanu, nikintagol nanu aatasayia ena kata nabo, Na Ai, pee atum aitalaku too Lfilisti nabo oo nkonyek aainei.”

²⁹Neibung nena ng'apeta pokira are apa naatii empolos enkaji, naa ninche apa nairishaa enkaji, neirishakino te ngolon enye pooki shumata ninche, neibung te nkaina enye e tatene nabo ng'ape neibung tene kedianye enkae.

³⁰Nejo Samson, “Ntasho nanu matua te nebo Ilfilisti.” Neirrugo ninye te ngolon enye pooki; neurokino ina aji lelo kituaak o lelo tung'ana pooki apa ootii atua. Neaku ore iltung'ana apa ootuata te keeya enye naa eikumok aalang lelo apa ootasesekuana ninye eton eishu.

³¹Nepuonu ilalashera lenyena o lmarei lenye pooki aaya ninye neilepunye ninye aapuonu aanukaa te rishata e Sora o Eshtaol te nkurare e Manoa papaai lenye. Etaa apa ninye olarishani le Israel ilarin tikitam.