Read Maasai Bible – Biblia Sinyati Ilarishak 17 Bible Online

Ilarishak 17 - Maasai Bible – Biblia Sinyati bible

Ilarishak 17

¹Etii apa oltung'ani le nkop oo ndoinyo e Efraim oji enkarna enye Mika.

²Nejoki ninye ng'otonye, “Ore inapa pisai enkalifu nabo o iip nabo e nkosholai apa nikitooruoki iyie, naa ninche itedekishore, nidekisho too nkiyiaa aainei, ng'ura ajo aata nanu nena oshola; nanu apa oowa.” Nejo ng'otonye, “Metamayiana Olaitoriani enkayioni ai.”

³Nerrinyu ninye nena oshola apa enkalifu nabo o iip nabo aisho ng'otonye; nejo ng'otonye, “Kaiteng'el nanu kuna oshola aisho Olaitoriani aiwuang'ie te nkaina ai te nkaraki olayioni lai, pee eitayunyeki enkitanyaanyukoto e Nkai naguetuni o enkitanyaanyukoto nasholuni; ore naa taata kaarrinyoki nanu iyie.”

⁴Neaku ore apa pee errinyoki Mika ng'otonye nena pisai, neya ng'otonye mpisai iip are e nkosholai, neisho ninche ilkunono oopej enkosholai laa ninye oitobira enkitanyaanyukoto naguetuni o enkitanyaanyukoto nasholuni; nepiki apa enkaji e Mika.

⁵Neeta apa oltung'ani oji Mika enkaji oo nkaitin. Neitobiru ninye nkitanyaanyukot o enkila o lgoo oo lapolosak; neput olayioni obo loo layiok lenyena aitaa olapolosani lenye.

⁶Ore apa te nena olong'i nemeetae olaiguanani te Israel; keas apa pooki ng'ae enaba anaa enaitiship too nkonyek enyena makewan.

⁷Etii apa oltung'ani le Betlehem tiatua Yuda, lo lmarei le Yuda, laa olawi apa ninye; neidurraki apa ninye ine.

⁸Nelo apa ilo tung'ani aing'uaa enkang e Betlehem te Yuda alo aton te wueji neidim anotie enemany; ore eidurrita ninye nelotu ina kop oo ldoinyo e Efraim enetii enkaji e Mika.

⁹Nejoki Mika ninye, “Kaji iyie ing'uaa?” Nejoki ninye, “Kara nanu Olawi le Betlehem tiatua Yuda, naa kalo amany ewueji naidim anotie erishata.”

¹⁰Nejoki Mika ninye, “Totona te nebo nanu pee iaku te nanu papa o lapolosani naaisho nanu mpisai tomon e nkosholai to lari o nkilani o endaa.”

¹¹Nenyorraa ilo Lawi abik te nebo ilo tung'ani; netiu ilo barnoti te ninye anaa obo loo layiok lenyena.

¹²Neput Mika ilo Lawi, neaku ilo barnoti olapolosani lenye, netii apa ninye atua enkaji e Mika.

¹³Nejo apa Mika, “Kayiolo taata ajo kaaitopok Olaitoriani, amu etaa olawi olapolosani lai.”