Read Maasai Bible – Biblia Sinyati Ilarishak 20 Bible Online

Ilarishak 20 - Maasai Bible – Biblia Sinyati bible

Ilarishak 20

¹Nepuonu iltung'ana pooki le Israel, ebaiki Dan o metabaiki Beer-sheba te nebo enkop e Gilead. Ore ina umata neiturrurro anaa oltung'ani obo te dukuya Olaitoriani te Mispa.

²Ore ilaiguanak le lelo tung'ana pooki, too loshon pooki le Israel neyau ate atua ilo turrur loo ltung'ana le Nkai, naa nkalifuni iip ong'uan apa iltung'ana oopuo too nkejek ooata ilalema.

³Nening apa iltung'ana le Benchamen nchere eilepa iltung'ana le Israel aapuo Mispa. Nejo iltung'ana le Israel, “Entoliki iyiook, kaji apa eikununye ena torroni?”

⁴Ore ilo Lawi, ilo moruo apa le ina kitok nataraki metua, newal ajo, “Aewuo apa nanu Gibea, ina nara ene Benchamen, nanu o enkapiani ai, pee kirrag ina kewarie.

⁵Naadumakino nanu ilewa le Gibea, neman aang'adu ina aji natii kewarie; keyieu apa ninche naar nanu matua, neikony enkapiani ai, netua ninye.

⁶Naya nanu ina apiani ai nadung nanu aitaa ndung'udung'ot, nairriwaa nanu ninye aibulunye enkop pooki enjung'ore e Israel, amu etaasa apa ninche embae torrono naa olminong sapuk entorroni tiatua Israel.

⁷Eng'ura, intae iltung'ana le Israel, intae pooki, enchoru enkikoo inyi o eutaroto inyi tene.”

⁸Nedumunye iltung'ana pooki le Israel anaa nabo nejo, “Mikipuo iyiook hoo obo lang olng'obor lenye, nemeetae olalang orrinyo alo enkaji enye.

⁹Kake ore taata ena iyiook kintaas Gibea: eikipuo iyiook aarare ninye te oshoto e nkukuo,

¹⁰nikiya iltung'ana tomon te iip tiatua iloshon pooki le Israel, o iip tiatua enkalifu, o enkalifu too nkalifuni tomon, pee eyaki iltung'ana ndaiki, paa te nepuonu ninche netum aaitalaa Gibea e Benchamen elap, teina taboi pooki e ntorroni nataasa ninche tiatua Israel.”

¹¹Neaku eiturrurrote apa iltung'ana le Israel aaipirakinore ina anasa eibung'ate aaku nabo.

¹²Neirriwaa iloshon le Israel iltung'ana meshomo atua olosho pooki le Benchamen, ejo, “Kaa torroni ena nataase tiatua intae?

¹³Ore naa taata entayu lelo tung'ana, lelo arruok le Gibea, pee kitum iyiook aataar ninche metuata, nikiwuang'ie entorroni te Israel.” Kake eitu ening ile Benchamen oltoilo loo lalashera lenye, lelo tung'ana le Israel.

¹⁴Neiturrurrunye ile Benchamen te nebo aaipang'u too nkanas aapuonu Gibea, pee epuo olarrabal aarare iltung'ana le Israel.

¹⁵Neiturrurro ile Benchamen ina olong too nkanas enye iltung'ana inkalifuni tikitam o ile ooata ilalema, te nebo lelo oomanya Gibea ooiturrurrote iltung'ana iip naapishana gelunot.

¹⁶Ore tiatua kulo pooki netii iltung'ana iip naapishana gelunot kedienyiaa; laa keidim ake pooki lenye atanang'a oleinyuaa to soit le nkopito nemediak.

¹⁷Ore iltung'ana le Israel metii Benchamen neiturrur iltung'ana inkalifuni iip ong'uan ooata ilalema; ore kulo pooki naa iltung'ana lo larrabal.

¹⁸Nedumunye iltung'ana le Israel neilep aapuo Betel, neikilikuanishore Enkai, “Kalo lang oituruk alo aarare ile Benchamen?” Nejoki Olaitoriani, “Yuda ong'as alo.”

¹⁹Nedumunye iltung'ana le Israel tadekenya nepuo aaitayu ilng'oborri te nkipirakinoto e Gibea.

²⁰Neilep iltung'ana le Israel aapuo olarrabal aarare Benchamen; neluaakino iltung'ana le Israel ninche te Gibea.

²¹Neipang ile Benchamen te Gibea neirragieki te nkop ina olong iltung'ana inkalifuni tikitam o are loo Siraeli.

²²Kake ore lelo tung'ana, lelo lewa le Israel eitagoluote, neitoki aaluaakino olarrabal teine wueji netoluaare te nkolong e dukuya.

²³Nepuo iltung'ana le Israel aaishir te dukuya Olaitoriani o metaa teipa; neikilikuanishore Olaitoriani aajooki “Eikingil iyiook aaluaakino olarrabal aarare ilalashera lang lelo le Benchamen?” Nejo Olaitoriani, “Elepa enchom entaarare ninche.”

²⁴Neigutu iltung'ana le Israel aapuonu aarare lelo le Benchamen te nkolong e are.

²⁵Nelo Benchamen aarare ninche te Gibea te nkolong e are, nebatata te nkop iltung'ana inkalifuni tomon o isiet oo ltung'ana le Israel; ore kulo pooki naa iltung'ana loo lalema.

²⁶Neitoki iltung'ana pooki le Israel, enjore pooki, aailep aapuo Betel neishir; netoni ninche teine te dukuya Olaitoriani, neen ate aaitupukoo ina olong o metaa teipa, neitayu ilasarri oopejori o lasarri le seriani te dukuya Olaitoriani.

²⁷Neikilikuanishore iltung'ana le Israel Olaitoriani (amu ore apa osanduku lo sotua le Nkai naa ine apa etii te nena olong'i.

²⁸Ore Finehas olayioni le Eliesa, olayioni le Aron, neisiaaisho te dukuya ilo sanduku apa te nena olong'i), ejo, “Eikingil iyiook aapuo olarrabal aarare lelo alashera lang lelo le Benchamen, anaa eikintirring'a?” Nejo Olaitoriani, “Elepa enchom; amu ore taisere kaishoru nanu ninche apik atua inkaik inyi.”

²⁹Neaku eirriwayie Isiraeli iltung'ana meshomo aajing ilnukat aaman Gibea.

³⁰Nepuo iltung'ana loo Siraeli aarare ile Benchamen te nkolong e uni, neitobirakino olarrabal pee earare Gibea, anaa enaikuna too nkulie katitin.

³¹Neipang iltung'ana le Benchamen aapuo aarare lelo tung'ana nerrumori aaitalam enkanasa. Ore anaa oshi ake too nkulie katitin neiteru aaoshisho near embata oo ltung'ana metuata, too nkoitoi, aa ore enkoitoi nabo nalala naa enailep alo Betel, nelo enkae Gibea. Ore teina kisiashata near iltung'ana oobaya tomoni uni o are loo Siraeli.

³²Nejo lelo tung'ana le Benchamen, “Ekueta ninche te dukuya iyiook anaa apa te dukuya.” Kake etejo iltung'ana loo Siraeli, “Maisika iyiook nikintalamaa ninche te nkanasa aarik inkoitoi kituaak.”

³³Nedumunye iltung'ana pooki loo Siraeli too wuejitin enye, neitobirakino olarrabal te Baal-tamar; ore lelo tung'ana loo Siraeli ootii olnukata neisarrisar too wuejitin enye aapuo enkalo o loo ntoluo le Geba.

³⁴Nepuonu aaimu enkalo e Gibea iltung'ana inkalifuni tomon oogeluno tiatua Israel pooki. Negolu olarrabal oleng. Neitu apa eyiolou iltung'ana le Benchamen aajo etataanikia ninche enkidaaroroto.

³⁵Nemir Olaitoriani Benchamen te dukuya Israel. Neidaikie iltung'ana le Israel iltung'ana inkalifuni tikitam o imiet o iip nabo oo ltung'ana le Benchamen teina olong. Ore kulo pooki naa iltung'ana loo lalema.

³⁶Neaku etoduaa ile Benchamen ina olong aajo etimiraki. Ekueta apa iltung'ana le Israel aailany ile Benchamen, amu eisiliga apa ninche lelo tung'ana ootii olnukata, otii embata e Gibea.

³⁷Nedumunye lelo tung'ana apa ootii olnukata, neisarisaru aakuetiki Gibea, nepuo lelo tung'ana ootii olnukata aar enkanasa tenepi o lalam.

³⁸Ore apa olmonekie otoning'oteki te rishata oo ltung'ana le Israel o ltung'ana ootii olnukata, naa nchere, teneitayu enkatampoi sapuk e mpuruo naailep shumata, te nkanasa,

³⁹neibelekenyakino iltung'ana le Israel olarrabal. Neiterua apa Benchamen aar iltung'ana loo Siraeli metuata oobaya tomoni uni, nejo ninche, “Kesipa etooshoki ninche aanang'ie enkop te dukuya iyiook, anaa apa to larrabal le dukuya.”

⁴⁰Kake ore pee eiteru ilo monekie ailepu te nkanasa, te mpuruo nairrusha, neing'or ile Benchamen siadi, naa nedol etaa duoo enkanasa pooki empuruo naijukujuku alo shumata.

⁴¹Neibelekenyuni taa iltung'ana loo Siraeli, neidang iltung'ana le Benchamen, amu etoduaa ninche aajo etataanikia ninche enkidaaroroto.

⁴²Ore te nkaraki ina, neibelekenya ninche te dukuya iltung'ana le Israel aaipirri ong'ata; kake einepuaki ninche, ore lelo ooipang'u tiatua nkanas nemut ninche te rishata enye.

⁴³Nedung'oo iltung'ana le Benchamen, nemir aasujaa ninche neitunyoo ninche ebaiki Noha o meitabaiki enkipirakinoto e Gibea te nkalo o loosaen.

⁴⁴Nebatata ile Benchamen inkalifuni tomon o isiet, ore pooki naa iltung'ana yiolot.

⁴⁵Neibelekenya ninche neisikaki enkalo e ong'ata aapuo endapidapoi e Rimon; neari metuata iltung'ana inkalifuni imiet too nkoitoi kituaak, neitirrishakini aasujaa o meitabaikini Gibom, nesesekuani iltung'ana inkalifuni are teine.

⁴⁶Neaku ore lelo pooki le Benchamen ootabatate teina olong naa nkalifuni tikitam o imiet le lelo ooenita ilalema, ore pooki naa iltung'ana yiolot.

⁴⁷Kake eibelekenyate iltung'ana iip ile neisik aapuo ong'ata enkalo e ndapidapoi e Rimon, nebik ninche teina dapidapoi e Rimon ilapaitin oong'uan.

⁴⁸Neitoki iltung'ana le Israel aaibelekenyakino iltung'ana le Benchamen neshurt ninche te nepi olalem, iltung'ana o ng'uesi o pooki naanoto ninche. Ore nkanas enye apa pooki naaitobira nepejoo te nkima.