Read Maasai Bible – Biblia Sinyati Ilarishak 21 Bible Online

Ilarishak 21 - Maasai Bible – Biblia Sinyati bible

Ilarishak 21

¹Einosa apa iltung'ana le Israel olmumai te Mispa, nejo, “Meetae hoo obo te iyiook oisho entito enye meyama iltung'ana le Benchamen.”

²Nepuonu iltung'ana Betel netoni teine te dukuya Enkai ometaa teipa, neyietu aaishir te mion.

³Nejo ninche, “Olaitoriani Enkai e Israel, kainyoo pee eewuo ena atiu nji tiatua Israel, eji metaa keetae taata olosho obo lemeetae te Israel?”

⁴Ore pee ekenyu neyooki iltung'ana aadumunye enasirie, neshet olperere lo lasar teine, neitayu ilasarri oopejori o lasarri le seriani.

⁵Nejo iltung'ana le Israel, “Kalo osho too loshon le Israel leitu elotu ena umata o Laitoriani?” Amu einosa apa ninche olmumai kitok te nkaraki ilo osho leitu elotu eumata o Laitoriani te Mispa, ejo, “Keari ninye metua.”

⁶Keeta apa iltung'ana le Israel olng'ur te nkaraki Benchamen olalashe lenye, nejo ninche, “Eiwuang'ieki olosho obo aaitung'uaa Israel ena olong.

⁷Kaji kinko tenikincho nkituaak lelo ootelekutua, nikinosa apa olmumai to Laitoriani nchere, mikincho ninche hoo nabo oo ntoyie ang meyama.”

⁸Nejo ninche, “Kalo osho ilo too loshon le Israel leitu elotu enetii Olaitoriani te Mispa?” Naa ng'ura, meetae hoo obo ebaiki Yabesh-gilead oshomo ina umata.

⁹Amu ore ina kata eipotitoi iltung'ana inkarn, meetae hoo obo le lelo oomanya Yabesh-gilead oirukishe.

¹⁰Neaku eirriwayie apa ina umata iltung'ana inkalifuni tomon oaare oopi, neitanap aajoki, “Enchom entaar metuata lelo oomanya Yabesh-gilead to lalem, o nkituaak o nkera.

¹¹Ena intae enchom entaas. Ore pooki lee o pooki ng'oruoi naatayiolounote endakie ninche tukul.”

¹²Netum ninche tiatua lelo oomanya Yabesh-gilead iselenken iip ong'uan nemeyiolo olee, neriku ninche ilng'oborri te Shilo, naa enkop e Kanaan etii.

¹³Neitoki ina umata pooki aairriwaki olkilikuai ile Benchamen apa ooti endapidapoi e Rimon, neibalakinye ninche eseriani.

¹⁴Nerrinyunye Benchamen neisho ninche ile Benchamen nena kituaak apa neitu eari metuata te Yabesh-gilead, kake eitu eidip ninche.

¹⁵Neing'urrie apa iltung'ana Benchamen te nkaraki natipika Olaitoriani elusie iloshon le Israel.

¹⁶Neitoki ilpayiani leina umata aajo, “Kaa iyiook kiaas te nkaraki nkituaak e lelo ootelekutua, neidaikieki apa ing'oruo aaishie te Benchamen?”

¹⁷Nejo ninche, “Meeta nchere metumi enjung'ore te lelo ootelekutua le Benchamen, pee meimin ake ilo osho te Israel.

¹⁸Ore ake eyia, mikindim iyiook aaishoo ninche ntoyie ang meyama.” Amu einosa olmumai iltung'ana le Israel nchere, “Etediaaki ilo oisho Benchamen enkitok.”

¹⁹Neaku etejo ninche, “Keetae anaake to lari osirua lo Laitoriani te Shilo, aa taa moikuape e Betel, te nkalo o loosaen enkoitoi kitok nalo te Betel ometabaiki Shekem, o kopikop e Lebona.”

²⁰Neitanap ninche ile Benchamen aajoki, “Enchom erraga to lnukata tiatua nkurman oo sabibu,

²¹ning'orishosho, naa tenepuonu ntoyie e Shilo aaranyisho to sinkolio, nimpang'ung'u tiatua enkurma oo sabibu, neibung ake pooki lee enkitok enye aya, te nena toyie e Shilo, nelo enkop e Benchamen.

²²Naa tenepuonu loo menye anaa ilalashera lenye aailepilepaki iyiook, nikijoki iyiook ninche, ‘Enchoo iyiook mawaita ninche te mpiris, amu eitu iyiook kiya ninche aaitaa inkituaak ang to larrabal, neitu sii intae inchosho iyiook, anaata naa eaku eninyi entorroni.’ ”

²³Neas ile Benchamen ina, neya nkituaak enye te risioroto esiana enye te nena toyie apa naaranyisho naaibung'a ninche aaya. Neitoki ninche aapuo aarrinyokino enjung'ore enye, neshet inkang'itie nemany.

²⁴Neitoki iltung'ana le Israel aadumunye. Nelo ake oltung'ani olosho lenye, o lmarei lenye, neipang aapuo teine, nelo ake pooki ng'ae enjung'ore enye.

²⁵Ore apa te nena olong'i nemeetae olaiguanani te Israel; etaasa ake pooki tung'ani enaishiaakino too nkonyek enyena.