Read Maasai Bible – Biblia Sinyati Ilarishak 3 Bible Online

Ilarishak 3 - Maasai Bible – Biblia Sinyati bible

Ilarishak 3

¹Kulo apa iloshon ootelekua Olaitoriani pee etemie ninche Israel, aa taa lelo pooki tiatua Israel leitu ae kata eyiolou likae arrabal obo te Kanaan.

²Te nkaraki ena apa pee etum iishoritin oo ltung'ana le Israel aatayioloito olarrabal, pee etum ninye aiteng'ena ninche olarrabal, amu eitu apa eyiolou.

³Kulo ninche lelo oreren: Ilkituaak imiet loo Lfilisti o Lkanaani pooki, le Sidon o Lhafi apa oomanya oldoinyo le Lebanon, ebaiki oldoinyo le Baalhermon ebaiki enejing'ieki Hamat.

⁴Ilootemieki Israel apa ninche, pee eyiolouni tenaa keidim Israel aibung'a inkitanapat o Laitoriani apa naaitanapa ninye loo menye te Musa.

⁵Neaku etobiko apa iltung'ana le Israel tiatua Ilkanaani o Ilhiti, Ilamori, Ilperisi, Ilhifi o Lyebusi;

⁶neyam ninche ntoyie enye aaitaa inkituaak enye, ore ntoyie enye maate neisho ilayiok le lelo oreren, neisiaai inkaitin enye.

⁷Neas iltung'ana le Israel entorroni too nkonyek o Laitoriani, nerikino ninche Olaitoriani Enkai enye, neisiaai inkaitin e Baal o Asherot.

⁸Neaku eyupuyupo apa engoro o Laitoriani tialo Israel nemir ninche metijing'a atua enkaina e Kushan-rishataim olaiguanani le Mesopotamia neisiaai iltung'ana le Israel Kushan-rishataim ilarin isiet.

⁹Kake ore ake pee eishiraki iltung'ana le Israel Olaitoriani, neisho Olaitoriani olakordunoni te nkaraki iltung'ana le Israel, laa ninye apa otokordua ninche, Otiniel olayioni le Kenas, olalashe oti le Kaleb.

¹⁰Nelotu Enkiyang'et o Laitoriani shumata ninye, neaku ninye olarishani te Israel; neilep ninye alo olarrabal neishooyo Olaitoriani Kushan-rishataim, olaiguanani le Mesepotamia apik atua enkaina enye; neisulu enkaina enye Kushan-rishataim.

¹¹Netum taa enkop enkiyeng'iyeng ilarin artam. Neye Otiniel olayioni le Kenas.

¹²Neitoki iltung'ana le Israel aaigil aas entorroni too nkonyek o Laitoriani; neitagol Olaitoriani Eglon olaiguanani le Moab metaarare Israel, te nkaraki nataasa ninche entorroni too nkonyek o Loitoriani.

¹³Neiturrurroki ninye kewan Ilamori o Lmaleki nelo amir Israel neya ninche ina anasa oo ltuka aaitaa enenye.

¹⁴Neisiaai iltung'ana le Israel Eglon olaiguanani le Moab ilarin tomon o isiet.

¹⁵Kake ore ake pee eishiraki iltung'ana le Israel Olaitoriani neisho Olaitoriani ninche olakordunoni, Ehudi, olayioni le Gera, lo losho le Benchamen, oltung'ani kedianye. Neirriwaa iltung'ana le Israel ninye meyaki Eglon olaiguanani le Moab kodi.

¹⁶Neitobiraki Ehudi kewan olalem opi nkaloli pokira are laa entemet nabo e nkaina o lpisiai enkadoro, neeniki ninye enkupes enye e nkeju e tatene aitabolu nkilani enyena.

¹⁷Neitarasaa ninye ina kishooroto aisho Eglon olaiguanani le Moab, naa oltung'ani apa opir oleng.

¹⁸Ore ake pee eidip Ehudi aitarasai ina kodi, neisho lelo tung'ana meshomo apa ooyautua ina kodi.

¹⁹Kake eibelekenyunye ninye makewan ashukunye te nena kitanyaanyukot oo soito naaguetuno naatii embata e Gilgal, nejo, “Kaata nanu olkilikuai laakurraki olaiguanani.” Nejo ninye, “Entigirata.” Ore apa lelo pooki ooisiaaita ninye neipang aapuo aaing'uaa ninye.

²⁰Nelotu Ehudi enetii ninye, etonita openy tiatua olgilata lenye oirobi le shumata. Nejo Ehudi, “Kaata olkilikuai oing'uaa Enkai te nkaraki iyie.” Nedumunye Eglon to lorika lenye.

²¹Neitorioo Ehudi enkaina enye e kedianye, neshutu olalem te nkupes enye e tatene neisuroki atua enkoshoke o laiguanani.

²²Nejing pooki o olkidong'oi lenye, neibung enkurriny ilo alem, amu eitu apa eshutu ilo alem te nkoshoke enye; nebukunye enkorotik e nkoshoke.

²³Neipang'u Ehudi boo, neiken inkutukie oo nkajijik e ilo gilata le shumata, neen.

²⁴Ore eidipa ashomo, nepuonu ilaisiaayiak; ore pee edol aajo keikeno nkutukie e lelo gilat le shumata, nejo ninche, “Ebaiki naa kewan ebakita tiatua ilo gilata oirobi.”

²⁵Neanyisho ninche o metaba anaa nepalari; kake ore ake eton eitu ebol ninye nkutukie e lelo gilat le shumata, neitayu ninche olbolet nebol; neirragita teine olkitok lenye to ltiren etua.

²⁶Neisika duoo Ehudi aluaya ina kata eanyisho ninche, nelo agiroo nena kitanyaanyukot naaguetuno too soito, neisik alo Se-ira.

²⁷Ore ake pee ebaya neosh esekekua teina kop oo ndoinyo e Efraim, nepuo iltung'ana le Israel te nebo ninye aadoyio teina kop oo ndoinyo, etii ninye dukuya ninche.

²⁸Nejoki ninye ninche, “Entusujuaki; amu eishorua Olaitoriani ilmang'ati linyi lelo Moabu apik atua enkaina inyi.” Neaku etadoitie apa ninche aasujaa ninye, neibung ilang'at o lkeju le Yordan naaimu Ilmoabu, neitu ninche eisho hoo oltung'ani obo metalang'u.

²⁹Near ninche ina olong iltung'ana oobaya nkalifuni tomon loo Lmoabu, oogol pooki, eitu ninye eimisho obo.

³⁰Neaku etimiraki apa Moab ina olong nejing abori enkaina e Israel. Netum apa ina kop enkiyeng'iyeng too larin intomoni isiet.

³¹Ore te siadi Ehudi naa Shamgar olayioni le Anat oowa erishata enye, apa laa ninye otara metuata iltung'ana iip ile loo Lfilisti te ng'udi nareyieki lmong'i, netokordua sii ninye Israel.