Read Maasai Bible – Biblia Sinyati Ilarishak 6 Bible Online

Ilarishak 6 - Maasai Bible – Biblia Sinyati bible

Ilarishak 6

¹Etaasa apa iltung'ana le Israel entorrono too nkonyek o Laitoriani, neishooyo Olaitoriani ninche apik atua inkaik e Midian ilarin oopishana.

²Netum enkaina e Midian engolon alang Israel; ore te nkaraki Midian neitaiki iltung'ana le Israel ate ngumot too ldoinyo, o nkapuniaa o sempewueti.

³Amu ore ake enkata pooki naun Isiraeli ilanterera, nepuonu Ilmidian o Ilmaleki o iltung'ana lo loo saen aarasaki ninche.

⁴Nepuonu ninche aaitayu ilng'oborri aarare ninche neinyal nena daiki naatuunoki o metabaiki elatia enye Gasa, neing'uaa Israel metii endaa, nemetii enker aashu olkiteng aashu osikiria.

⁵Amu kepuonu apa ninche te nebo nkishu enye o lng'oborri lenye, nepuonu eba anaa olmaati te nkumoi; ore ninche o ntamesin enye meikenayu, neaku keinyal apa enkop te nepuonu.

⁶Neisomit apa Midian Israel oleng,

⁷neishiraki iltung'ana le Israel Olaitoriani te nkaraki Ilmidian.

⁸Neirriwaki Olaitoriani iltung'ana le Israel oloiboni; nejoki ninche, “Nji ejo Olaitoriani Enkai e Israel, Atorikoyie apa nanu intae ailepunye aitung'uaa Misiri, naipang'unye intae te nkop e sinkaisho;

⁹nakordu intae te nkaina oo Lmisiri o te nkaina e lelo pooki ooibooki intae enkop, naaraa ninche te dukuya intae, naisho intae enkop enye.

¹⁰Najoki nanu intae, ‘Kara nanu Olaitoriani Enkai inyi; mintokiki intae aayanyitu inkaitin oo Lamori, laa atua enkop enye imanyanya!’ Kake eitu intae ining'ining'i oltoilo lai.”

¹¹Nelotu apa olmalaika lo Laitoriani neton ti abori olchani apa laa ole Yoash te Ofra, Olabiesiri, ina kata apa eidong'ito olayioni lenye Gideon enkano te nkironyet oo sabibu, ejo pee eisudoo te nkaraki Ilmidian.

¹²Neipang'aki olmalaika lo Laitoriani ninye nejoki, “Etii Olaitoriani te nebo iyie, iyie oloing'oni magilani.”

¹³Nejoki Gideon ninye, “Aatoomono, olkitok, amaa tenaa ketii Olaitoriani te nebo iyiook, kainyoo naa pee etadoikitio iyiook kuna pooki? Naa koree nkiasin enyena pooki e nking'asia apa naainosakita iyiook iloo papa, ejo, ‘Keitu ninye eilepunye iyiook Olaitoriani aitung'uaa Misiri?’ Kake ore taata eiturrayie iyiook Olaitoriani neishooyie iyiook apik atua inkaik oo Lmidian.”

¹⁴Neibelekenyakino Olaitoriani ninye nejoki, “Shomo tena magilanisho ino tokordu Israel te nkaina e Midian; aime nanu laairriwayie?”

¹⁵Nejoki ninye, “Aatoomono, Olaitoriani, kaji nanu aiko te nakordu Israel? Ng'ura ajo ore olgilata lang naa ninye oloti te Manase, naa nanu oloti lo lmarei lang.”

¹⁶Nejoki Olaitoriani Gideon, “Ee, kake atii nanu te nebo iyie, naa iosh iyie Ilmidian anaa oltung'ani obo.”

¹⁷Nejoki ninye, “Tenaa taata kanoto omom te iyie, ntoduaaki naa olmonekie inchere iyie doi ilo likirorie nanu.

¹⁸Milo iyie aing'uaa ene, aatoomono o metaba anaa nalotu nanu enitii, pee ayau enkishooroto ai, nairragie te dukuya iyie.” Nejo ninye, “Katon nanu o metaba anaa nishukunye.”

¹⁹Neaku eshomo Gideon enkaji enye neyieng olkuoo, neitobir imukateni neitu eisuishieki e nkurma; nepik inkiri atua enkikapu, nepik imotori atua emoti, neyaki ninye ti abori olchani, neitarasaki ninche.

²⁰Nejoki ilo malaika le Nkai ninye, “Ntayu nena kiri o nena mukateni neitu eisuishieki tipika ninche enchumata ena dapidapoi nibukoki imotori shumata ninche.” Neiko ninye neijia.

²¹Neitoki ilo malaika lo Laitoriani aitorioo ina ng'udi apa natii enkaina enye, neiseyie nena kiri o nena mukateni apa neitu eisuishieki; neipang'u enkima teine te ndapidapoi nenya nena kiri o nena mukateni neitu eisuishieki; neimin ilo malaika lo Laitoriani too nkonyek enyena.

²²Nemusu taa Gideon inchere olmalaika lo Laitoriani ninye; nejo Gideon, “Oi nanu, Olaitoriani Enkai! Amu atoduare nanu olmalaika lo Laitoriani king'ura too nkomomi.”

²³Kake etiaaka Olaitoriani ninye, “Metaa eseriani te nebo iyie, miureishoyu, miye iyie.”

²⁴Neshetaki Gideon teine Olaitoriani olperere lo lasar, nejo ninye, “Olaitoriani eseriani.” Ore ebaiki ena olong neton eitashe ilo perere te Ofra nara enoo Ilabieseri.

²⁵Ore ina kewarie nejoki Olaitoriani Gideon, “Iwa oloing'oni li are le papaai lino, ilo loo larin oopishana, niuroki enkop ilo perere lo lasar le Baal oata papaai lino, nidung ina Ashera natii embata enye.

²⁶Nishet olperere lo lasar lo Laitoriani Enkai ino te nchumata o osempewuet tene, nirragie isoito aitobiraki, niyau ilo oing'oni li are nintaa olasar opejori te nena keek e ina Ashera nidung meirraga te nkop.”

²⁷Neya Gideon iltung'ana tomon te lelo aisiaayiak lenyena, neas anaa enatiaka Olaitoriani ninye, kake ore amu keure apa aataas dama te nkaraki olmarei lenye, o lelo tung'ana le ina ang, etaasa apa ninye ina kewarie.

²⁸Ore pee einyototo iltung'ana teina ang tadekenya enasirie nedol etigilaki olperere lo lasar le Baal, ore ina Ashera apa natii embata enye netudung'oki meirraga te nkop, ore ilo oing'oni li are neitaaki olasar te nchumata e ilo perere lo lasar oteshetaki.

²⁹Nejokino ninche maate, “Kaing'ae otaasa ena?” Ore ake pee eidip aatujurr neikilikuanu, nejo ninche, “Gideon olayioni le Yoash otaasa ena.”

³⁰Nejoki iltung'ana teina ang Yoash, “Mpang'unye olayioni lino, pee etum atua, amu etusulua ninye olperere lo lasar le Baal, netudung'o ina Ashera natashare.”

³¹Nejoki Yoash lelo pooki apa ooing'orunore ninye, “Ai Baal ing'oring'oro intae? Aashu orrekie lenye igolielie? Ore oloba anaa oloing'or ninye neyookini aar metua tadekenya. Tenaa ke nkai ninye nchoo eing'or kewan amu etusulayioki aauroo olperere lenye lo lasar.”

³²Neaku ore ebaiki ina olong etaa keji ninye Yerubaal, aa taa, “Nchoo Baal eng'or kewan” amu etusulayie ninye auroo olperere lenye lo lasar.

³³Neitoki iltung'ana le Midian o le Amaleki o iltung'ana le nkalo o loo saen aaipotuno te nebo, nelang'u Yordan neshet ilng'oborri to oerata le Yesreel.

³⁴Nelotu Enkiyang'et o Laitoriani shumata Gideon, neosh ninye esekekua neipotuni iltung'ana le Abiesiri metusujai ninye.

³⁵Neirriwaa ninye ilkiliku meshomo atua Manase pooki, neipotuni sii ninche metusujai ninche. Neitoki airriwaa ilkiliku meshomo Asher, o Sebulon, o Naftali neilep ninche aapuo aanang'are ninche.

³⁶Neitoki Gideon ajoki Enkai, “Tenaa eikordu iyie Israel te nkaina ai anaa enitejo,

³⁷ng'ura, kairragie nanu endapana e nker te wueji neidong'ieki enkano; ore ake pee ejing enkoileelio endapana ake, netoyio enkae wueji pooki, nayiolou taa ajo ikordu iyie Israel te nkaina ai, anaa enitejo iyie.”

³⁸Netiu neijia. Ore ake pee einyototo Gideon tadekenya enasirie neirony ina dapana, neironyu enkoileelio naiputa olbakuli enkare.

³⁹Neitoki Gideon ajoki Enkai, “Mincho iyie engoro ino eyupuyup tialo nanu, kake nchooki nanu mairoro ena kata nabo ake, aatoomono, nchooki nanu manyaaki atem ena kata nabo endapana; aatoomono, nchoo endapana ake metoyio, ore enkae kop pooki nchoo ejing enkoileelio.”

⁴⁰Neiko Enkai neijia ina kewarie; amu etoyio apa endapana ake, ore enkop pooki nejing enkoileelio.