Read Maasai Bible – Biblia Sinyati Yuda 1 Bible Online

Yuda 1 - Maasai Bible – Biblia Sinyati bible

Yuda 1

¹Nanu Yuda, osinka le Yesu Kristo naa olalashe le Yakobo, oigeroki lelo ooipotoki, oonyorri ti atua Enkai Papa lang ooiteng'elaki te nkaraki Yesu Kristo.

²Metoponikini intae olng'ur o eseriani o enyorrata.

³Ilanyor laainei, ore anaa eyieunoto naata naleng pee aigeroki intae mbaa naaipirta enjeunoto ang niking'ar, nadol ajo meeta nchere pee maigeroki intae, asai intae erishisho aamitu enkirukoto e Nkai naishooki apa nabo kata te lulung'ata lelo sinyat.

⁴Etijing'akita atua intae te mpurrokinoto ilkulikae laa ninche apa etegelakaki endung'okinoto e nkiguana, iltung'ana lemeiruk Enkai ookur empiris e Nkai ang aaitaa enkoitoi naasie ntorrok nemiki ilo laa ninye ake olkitok lang, naa Olaitoriani lang Yesu Kristo.

⁵Kayieu naitoki aitadamu intae, hoo naidipa apa aitayiolo intae nchere ore ilo oitajewuo iltung'ana aitung'uaa enkop e Misiri, nenyaaka amut lelo leitu eiruk.

⁶Ore lelo malaika leitu egolie ewueji enye neing'uaa emanyisho enye naishiaakino, neteenaki ninche too lpisia loo ntarasi ti abori te nemisimis ometabau ina olong kitok e nkiguana;

⁷anaa enaikunaki Sodom o Gomora o nena ang'itie naamanita naatusuja sii ninche ng'uarrat oo loirerioni torrok, neitamioki ninche te nkima oo ntarasi pee eaku enkitanyaanyukoto te pooki.

⁸Neton ake eiko neijia kulo tung'ana too nkidetidetat enye neidurukie osesen, neany enkitoria, nemor ilo oata enkitoo le shumata.

⁹Kake ore Mikael ilo malaika kitok, eishankarra o loirirua eorro osesen le Musa, eitu ninye eitasim aipotoki emoroto e nkiguana, Kake etiaaka, “Metaa Enkai nikisikong.”

¹⁰Kedekisho lelo tung'ana too ldeketa lemening'u ninche, ore too naayiolo te mpukunoto o sesen anaa pee eyiolo ng'uesi, neyaki ate embatisho nemuti ninche.

¹¹Oi ninche! Amu etusujaitie orrekie le Kain netapalakita ate enkitapong'oroto e Balaam te nkaraki dupoto, nemuti ninche te nkiseroto e Kora.

¹²Ore ninche naa iltipot ooiduruk ti atua isiruai linyi le nyorrata epepeeno te nebo meeta osul negolie ate meeta isura. Inkatampo nemeeta enkare, naaya osiwuo, o lkeek lemeeta ilng'anayio te siadi ari ootuata katitin are, ootadotuoki.

¹³Ilopir le naiposha ootarasutua ooitokitoku ilabur le nkurruna enye, ilakir oopuaya laa ninche eitaanyitai emisimisi e naimin o lodo le nkop ntarasi.

¹⁴Kuna apa sii eibonuo Enok ilo apa le ishoi e naapishana ebaiki Adam ejo, “Ng'ura eewuo Olaitoriani te nebo iip inkuyu oo sinyat lenyena,

¹⁵pee edung'oki enkiguana pooki ng'ae nemir lelo pooki lemeure Enkai, too nkiaasin enye pooki torrok nemetii euriata e Nkai naatasa too rrekiei lemetii olturiaki le Nkai, o too mbaa pooki e nkisikong naatejo ilaasak loo ng'ok lemeure Enkai neiba ninye.”

¹⁶Kulo laing'unyung'unyak, ilooata olorok, iloosuj ing'uarrat oo seseni lenye, iloorup ate te njartano enye, nepakas iltung'ana ejo pee edupore.

¹⁷Kake entadamu intae ilanyor laainei nena apa naatolimutuo ilkipaareta lo Laitoriani lang Yesu Kristo.

¹⁸Etiaakita intae, “Ore te nkata e nkiting'oto naa kepuonu ilasukenyak, oosuj ing'uarrat enye nemetii euriata e Nkai.”

¹⁹Kulo ninche ooyau eoro, ile na kop ninche lemeeta Enkiyang'et Enkai.

²⁰Kake ore intae ilanyor laainei, enteshetu ate ti atua ina kirukoto inyi nasinya, entoomon te Nkiyang'et Sinyati.

²¹Entotoni intae maate ti atua enyorrata e Nkai, entaanyu olng'ur lo Laitoriani lang Yesu Kristo oitabaiki intae ina kishui oo ntarasi.

²²Entudupa ilkulikae leton eing'ashing'ash.

²³Entajeu ilkulikae entawuapu ninche tiatua enkima, eng'urrie lelo kulikae to lturiaki nimbayuyu ebaiki ninye enkila naidurukie osesen.

²⁴Ore taata ilo oidim atorripo intae pee mibatatata, neitoduaaya intae te dukuya enkitoo enye miaatata eleyiata, iatata eng'ida,

²⁵olaa ninye ake Enkai Olaitajeunoni lang, tiatua Yesu Kristo Olaitoriani lang. Metaa enenye enkitoo o enkisisa, o enkitoria, o engolon, te dukuya nkatitin pooki taata o ntarasi. Eesai.