Read Maasai Bible – Biblia Sinyati Embolunoto 12 Bible Online

Embolunoto 12 - Maasai Bible – Biblia Sinyati bible

Embolunoto 12

¹Neliooyu entoki sapuk enking'asia te shumata, enkitok naishopokoki enkolong netii olapa abori inkejek enyena. Ore te ndukuya enye, neeta enkopiyia e nkitoo oo lakir tomon o aare.

²Naa entuaa ninye, neishir te mion e saisai o te mion e ishoi.

³ Neitoki aliooyu enkae toki sapuk e nking'asia te shumata, nadol enkito tiamasi nanyokie, naata lukuny naapishana o mowuarak tomon, neishopokino nkishiliaa e nkitoria naapishana ilukuny enyena.

⁴ Neor olkidong'oe lenye ematua e uni oo lakir le shumata, nenang'aki ninche enkop. Neitashe ina tiamasi te dukuya ina tuaa nasaisai, pee enya enkerai enye te neini.

⁵Neiu enkayioni naa ninye oyooki aitore iloreren pooki te ng'udi e sekenkei, kake etawuapayioki ina kerai enye aailepie enetii Enkai o enetii olorika lenye le nkitoo.

⁶Neipirri ina kitok ong'ata, ewueji neitobiraka Enkai, naa ine eitotiyieki aaitagol ninye too nkolong'i enkalifu nabo o iip are o ntomoni ile.

⁷Nepuku olarrabal te Keper earare Mikael o lmalaika lenyena ina tiamasi. Nearare sii ninye ina tiamasi o lmalaika lenyana.

⁸Kake etimiraki ina tiamasi o lmalaika lenyena neaku meeta ewueji netii ninche te Keper.

⁹Nenang'uni ina tiamasi kitok enkop, ilo asurai musana, laa ninye eji Oloirirua o Sheitani, ilo alejani le nkop pooki, nenang'uni ninye enkop, ore ilmalaika lenyena nenang'akini enkop te nebo ninye.

¹⁰Naning oltoilo sapuk te Keper ejoito, “Eewuo taata enjeunoto, o engolon, o enkitoria e Nkai ang, o enkidimata e Kristo lenye. Amu etanang'akaki enkop olaitang'oroni loo lalashera lang, laa ninye oitang'or ninche dama o kewarie te dukuya Enkai ang.

¹¹Netimira ninche ninye te ilo sarge lo Lkuoo le Ker, o to rorei le shakenisho enye, amu eitu enyorru ninche enkishui enye o metabaiki keeya.

¹²Ting'idayu naa, iyie keper o intae lelo pooki ootii atua. Kake wooi, intae nakop o enaiposha, amu etadowuo Sheitani enitii te ngoro sapuk. Amu eyiolo ajo dorrop enkata enye.”

¹³Ore ake pee edol ina tiamasi ajo etanang'akaki enkop, nemir ina kitok natoiwuo enkayioni.

¹⁴Kake eishooki ina kitok inaipuko are naaijo ino lkurragos sapuk loo lmurran, pee elotie ti ai ailany ilo asurai, nelo ong'ata, ine wueji neitotiyieki aaitagol, te nkata, o too nkatitin, o lpisiai le nkata.

¹⁵Nebuku ina tiamasi enkare naaijo olkeju eing'uaa enkutuk enye te siadi ina kitok ejo pee eoroo to loirrag le nkare.

¹⁶Kake etaretuo enkop ina kitok, neng'a enkop enkutuk neijoo ilo keju otonotua ina tiamasi te nkutuk enye.

¹⁷Negorokino taa ina tiamasi ina kitok nelo aitainye olarrabal eishoi natelekua e ina kitok, lelo pooki leton eibung'ita nkitanapat e Nkai, neishakenoki Yesu.

¹⁸Neitashe ina tiamasi to sinyai le naiposha.