Read Maasai Bible – Biblia Sinyati Embolunoto 14 Bible Online

Embolunoto 14 - Maasai Bible – Biblia Sinyati bible

Embolunoto 14

¹Naitoki aing'orisho, nadol te nchumata o Ldoinyo le Sion eitashe Olkuoo le Ker. Netii te nebo ninye iltung'ana nkalifuni iip artam o oong'uan ooata enkarna enye o ene menye lenye eigero too lpurai loo nkomomi enye.

²Naning oltoilo eing'uaa keper laaijo enkikurrukur oo nkariak kumok, netiu sii anaa enkikurrukur sapuk. Ore ilo toilo latoning'o netiu anaa oltoilo loo laoshok loo nkinantani eoshito inkinantani enye.

³Nerany osinkolio ng'ejuk te dukuya olorika le nkitoo o te dukuya nena ng'uesi ong'uan naaishu, o te dukuya lelo payiani. Nemeetae hoo obo oidim atayiolo ilo sinkolio meteleku ake lelo nkalifuni iip artam o ong'uan ooidipaki aatokordu te nkop.

⁴Naa kulo leitu eidurukie ate too ng'oruo, amu meyiolo ninche inkituaak. Naa kulo ooirukurukore ilo Kuoo le Ker pooki wueji nelo. Etokorduaki kulo ti atua ltung'ana, pee eaku ilng'anayio le dukuya le Nkai o ilo Kuoo le Ker.

⁵Neitu etumieki nkutukie enye emonkoi, amu meeta eleyiata.

⁶Naitoki adol likae malaika eipirri te mpolos o loing'ang'e, neeta ilomon supati loo ntarasi olo aliki lelo oomanya enkop, pooki kop, o pooki osho o pooki ng'ejep o ltung'ana.

⁷Nejo to ltoilo sapuk, “Entureita Enkai ninchosho ninye enkisisa. Amu eewuo e nkiguana enye. Enteserem ilo oitobira keper o enkop, o enaiposha o nchorroi oo nkariak.”

⁸Ore likae malaika, li aare, nesuju, ejo, “Eturori, eturori Babilon kitok, ina naitooko iloreren pooki enaisho e mpushuna e loloito enye.”

⁹Nelotu likae malaika liokuni asuju ninche, ejoito to ltoilo sapuk, “Ore pooki ng'ae oserem ina ng'ues o enkitanyaanyukoto enye, netum olmishire to lpura le nkomom enye aashu te nkaina enye,

¹⁰neyooki sii aok e naisho e ngoro, e Nkai, natubukokoki enkikompe e ngoro eirrusha. Naa keitamei te nkima o te nkibiriti te dukuya lelo malaika sinyat o te dukuya ilo Kuoo le Ker?

¹¹Ore empuruo e nkisilisiloto enye neilep intarasi o ntarasi. Nemeeta enkiyeng'iyeng'ata dama o kewarie lelo aseremak le ina ng'ues o enkitanyaanyukoto enye, o pooki ng'ae ong'amu olmishire le nkarna enye.”

¹²Ene taa etii enkipototo e ng'iriata e lelo sinyat, lelo ooibung inkitanapat e Nkai o enkirukoto e Yesu.

¹³Naning oltoilo oing'uaa keper ejo, “Ngero ena, Emayiana lelo ootuata laa ti atua Olaitoriani eye taata o kenya.” “Esipa emayiana,” ejo enkiyang'et, “Pee etum aayeng'iyengata too sinaitin lenye, amu kesuj ninche inkiaasin enye.”

¹⁴Naitoki aing'orisho nadol enkatampoi naibor. Netonita teina atampoi obo onyaanyukie Enkerai e Tung'ani, neishopito te lukunya enye enkopiyia e nkitoo e saabu, neibung'ita olalem opi oololo te nkaina enye.

¹⁵Nepuku likae malaika eing'uaa atua enkaji e Nkai, eipotito to ltoilo sapuk ilo otonita te nkatampoi amu ejo, “Tudung'ishore ilo alem lino oololo ninkesisho amu enkata e nkikesare, eo abaya enkikesare e nkop.”

¹⁶Neyuk ilo otonita te nkatampoi olalem lenye oololo neikesishoe te nkop.

¹⁷Neitoki apuku likae malaika teina aji e Nkai natii keper, neeta sii ninye olalem opi oololo.

¹⁸Neitoki likae malaika apuku eing'uaa olperere lo lasar, laa ninye oata engolon naitoreyie enkima. Neipot to ltoilo sapuk ilo oata olalem opi oololo nejoki, “Tudung'ishore olalem lino oololo tasotu nkimarrimarrat oo sabibu te nkop, amu eoto isabibu lenyena.”

¹⁹Neaku eyuko olmalaika olalem lenye oololo te nkop nesotu isabibu le nkop. Nenang'aki ninche atua enkironyet e ngoro e Nkai.

²⁰Neitunyi lelo sabibu teina kironyet ti auluo ina anasa, nerukunye osarge teina kironyet, o metabaiki mbartan inkeenta oo nkutukie, neba te nkadoro anaa inkilomitani iip uni.