Read Maasai Bible – Biblia Sinyati Embolunoto 17 Bible Online

Embolunoto 17 - Maasai Bible – Biblia Sinyati bible

Embolunoto 17

¹Neitoki olmalaika obo le lelo oopishana ooata ilbakulini oopishana alotu enatii naajoki, “Wou, maaitoduaa nanu iyie enkiguana nadung'okini ena mulayoi yioloti, natonita too nkariak kumok.

²Naa te ninye etololoitore ilaiguanak le nkop naa te naisho e loloito enye etemerate lelo ootii enkop.”

³Naaya ilo malaika nanu te nkiyang'et ong'ata nadol enkitok natonita te nkoriong e ng'ues nanyokie nabore nkarn e morore neeta ilukuny naapishana o mowuarak tomon.

⁴Netukusoki ina kitok too nkilani morijo o naanyokie. Neikodi te saabu o too ntoto sidain o museitani naagol o too lului. Neibung'ita te nkaina enye enkikompe e saabu nabore olminong o loirerioni le loloito enye.

⁵Ore to lpura le nkomom enye neigero enkarna e nkisudoroto: “Babilon kitok, ng'oto mulayoni o ilo minong le nkop.”

⁶Nadol ina kitok etemere to sarge loo sinyat le Nkai o to sarge loo lchakenini le Yesu. Ore pee adol nanu ninye naing'asia oleng.

⁷Kake aatiaaka olmalaika, “Kainyoo pee ing'asia? Kaaliki taata enkisudoroto e na kitok, o ene ina ng'ues naata ilukuny naapishana o mowuarak tomon naanapita ninye

⁸re ina ng'ues nitoduaa keishu apa, nemeekure eishu. Naa kepuku ailepu te ngumoto nemeeta enkiting'oto nelo atua enkidaaroto. Ore lelo oomanya enkop leitu esiri inkarn enye te mbuku e mpuaan ebaiki apa pee eitamanyuni enkop naa keing'asia te nedol ina ng'ues, amu etii apa, nemeetii taata, naa kelotu.

⁹Eyieu ena eng'eno nagut. Ore nena lukuny naapishana naa ildoinyo oopishana oogira ina kitok atonie.

¹⁰Naa ilaiguanak oopishana sii. Netabatatate imiet lenye, netii obo, neton eitu elotu olikae, naa ore te nelotu meeta nchere pee me nkiti kata ake eton.

¹¹Ore ina ng'ues apa natii nemetii taata, naa ene isiet kake ene nena naapishana sii, naa kelotu enkidaaroto.

¹²“Ore nena mowuarak tomon nitoduaa naa ilaiguanak tomon leton eitu eng'amu engolon naitoreishore. Kake keng'amu engolon anaa ilaiguanak te saa nabo te nebo ina ng'ues.

¹³Ile ndamunoto nabo kulo neishoo ina ng'ues engolon o enkidimata enye.

¹⁴Neitayunyie olarrabal ilo kuoo le ker, nemir Olkuoo le Ker ninche, amu ninye Olaitoriani loo laitoriak naa Olaiguanani loo laiguanak, ore lelo ooboitare ninye naa keipoto negeluno neisiligayu.”

¹⁵Naajoki ninye ilo malaika, “Ore nena ariak nitoduaa teine netonie emulayoi naa iltung'ana o lororani o nkuapi o lng'ejepa.

¹⁶Ore nena mowuarak tomon nitoduaa, ore ninche o ina ng'ues keibayu ina mulayoi, nekiny ninye aitalioo meishopo, nenya nkiri o sesen lenye nepejoo ninye te nkima.

¹⁷Amu Enkai natipika atua oltau lenye meitabai inaayieu ninye, neaku ile ndamunoto nabo, neishooyo engolon enye, e nkitoria aaisho ina ng'ues, o metaba anaa neitabari ororei le Nkai.

¹⁸Ore ina kitok nitoduaa naa ina anasa kitok naata enkitoria alang ilaiguanak le nkop.”