Read Maasai Bible – Biblia Sinyati Embolunoto 18 Bible Online

Embolunoto 18 - Maasai Bible – Biblia Sinyati bible

Embolunoto 18

¹Ore te siadi ena nadol likae malaika edou aing'uaa keper neeta enkidimata sapuk, neitawang'i enkop teina sikar enye.

²Nebuaku to ltoilo le ngolon ejo, “Eturori, eturori Babilon kitok! Etaa emanyisho oo loiriruani, orrumat le pooki kiyang'et torrono, orrumat le pooki motonyi torrono naibaisho.

³Amu etooko iloreren pooki enaisho oo sabibu oo ng'uarrat enyena torrok. Ore laiguanak le nkop neloloito te ninye, netaa karsisi ilbiasharani le nkop te nkiborra enye oo nkonyek.”

⁴Naitoki aning likae toilo oing'uaa keper ejo, “Entupuku entung'uai ninye lo tung'ana laainei, pee mimbung'arere ake ninye ti atua ing'ok enyena, pee ming'arierie ake ilmeita lenyena.

⁵Amu eturupate ng'ok enyena oleng aabaya keper. Netadamua Enkai intorrok enyena.

⁶Entalaaki ninye anaa enaitalakishe sii ninye makewan. Entalaaki katitin are te risioroto oo nkiaasin enyena. Eng'oling'olaki ninye mboreitin are teina kikompe naing'ola sii ninye.

⁷Ore anaa ina naturupa ninye kewan neiborrie onyek nchoo sii ninye olosilisili o lkiyioi ntorisioki ena. Amu ejo to ltau lenye eton ara enkaiguanani, mara nanu enkoliai, ore olkiyioi madol aekata.

⁸Metaa kepuonu ilmeita lenyena te nkolong nabo, inkeyaitin o lkiyioi o lameyu. Naa kepejori ninye te nkima. Amu aimagilani Olaitoriani Enkai nadung'oki ninye enkiguana.”

⁹Ore ilaiguanak le nkop ootololoitore ninye neiborrie onyek te nebo ninye naa keyietu neishir neishiraki ina anasa te nedol empuruo enye e mpejoroto.

¹⁰Neitashe ninche te nelakua te nkuretisho o enkitamioto enye ejo, “Wooi ina anasa kitok, naa magilani Babilon! Te saa nabo eewuo endung'okinoto ino e nkiguana.”

¹¹Ore ilbiasharani le nkop neishir aaishiraki ninye amu meekure eetae hoo obo oitoki ainyiang'u imasaa enyena.

¹²Imasaa e saabu o enkosholai, o soito oogol enkinyang'a o lului, o lkarash oopuyiapui o lmorijo o loonyokie o mpukunot pooki oo lkeek oorropil o ntokitin pooki naaguetuni too lala loo lkanchaoni, o ntokitin pooki oo nkeek naagol enkinyiang'a, o suyai, o esekenkei o ltoto ooibor;

¹³o lmadalasini o ltankausi o enkorropil o emanoo narropil o lbani, o enaisho oo sabibu o eilata enkurma napuyiapui, o enkano o nkishu o nkerrai o mbartan o ngarrin oo mbartan o rrindiki, aa taa iltauja loo ltung'ana.

¹⁴“Ore ilo ng'anayioi oshi otang'uarra oltau lino nikitung'uayie iyie, ore intokitin inono pooki e nkuso o esikar kitung'uaitie ninche, nemeitokini aekata aatum.”

¹⁵Ore ilamirak le nena masaa ootudupore enkarsisisho naing'uaa ina anasa neitashe te nelakua te nkuretisho e mion enye, neishir neyietu abuaku ajo,

¹⁶“Wooi, wooi ena kito anasa naishopo apa too nkilani naapuyiapui o morijo o naanyokie, neikodi, te saabu o too soito oogol enkinyiang'a o too lului.

¹⁷Te saa nabo eidaikieki ena arsisisho pooki.” Ore ilkituaak pooki loo melin, o ltung'ana oopuo too naaiposha, ilaisiaayiak loo melin o pooki laa ore enkinyiang'a enye naa enaiposha etii neitashe te nelakua.

¹⁸Nebuaku aaishir ina kata pee edol empuruo e mpejoroto eina anasa nejo, kaa anasa nanyaanyukie enkanasa kitok?

¹⁹Neisuaaki enterit ilukuny enye, eishiraki ninye. Neyietu nebuaku aaishir nejo, “Wooi, wooi, te nkaraki ena anasa kitok natudupore kulo pooki ooata melin, te naiposha teina arsisisho enye. Te saa nabo eidaikieki.

²⁰Ting'idakinoyu iyie ninye na keper o intae isinyat, o lkipaareta, o loibonok le Nkai, amu etudung'oko Enkai ninye enkiguana te nkaraki intae.”

²¹Nedumu olmalaika ogol osoit kitok laaijo oloiwutuutishoreki nenang'aki atua enaiposha nejo, “Neijia eikunakini Babilon kitok ina ang kitok esuluni enkop te ngolon, nemeitokini aekata aatum;

²²ore iltoiloishi loo loowosh nkinantani o laranyak, o lakutak loo ndulen, o sekekuani, nemeitokini aekata aaning ti atua iyie. Nemeitokini aekata aatum ti atua iyie oltung'ani le nkiaas e nkarriyiano hoo nabo. Ore Oltoilo lo soit ooiwutuutishoreki nemeitokini aekata aaning ti atua iyie;

²³ore ewang'an o ltaa nemeitoki aekata awang'u ti atua iyie; ore oltoilo lo loyamisho o enayami nemeitokini aekata aaning ti atua iyie amu ore lbiasharani linono naa ninche apa iltung'ana kituaak te nkop, netelejaki nkuapi pooki teina sakutore ino.

²⁴Naa ti atua ninye enotoki osarge loo loibonok le Nkai o loo sinyat, o lelo pooki ootaraki te nkop.”