Read Maasai Bible – Biblia Sinyati Embolunoto 2 Bible Online

Embolunoto 2 - Maasai Bible – Biblia Sinyati bible

Embolunoto 2

¹“Tisiraki ilo malaika le sirit natii atua Efeso nchere, ‘Irorei le ilo oibung'ita ilakir oopishana te nkaina enye e tatene, olo tiatua ilkilang'ilang'eta oopishana le saabu.

²“ ‘Kayiolo nkiaasin inono o eekenyata ino o eng'iriata ino, nchere mindim aisiritore iltung'ana torrok kake itetema lelo oojo ate ilkipaareta neme ninche, nirrasha ninche ajo ilalejak.

³Kayiolo ajo iata enyuaata niting'iria te nkaraki enkarna ai, neitu inauru.

⁴Kake kaata ena namen te iyie. Nchere, itung'uaiyie enyorrata apa niaata te dukuya.

⁵Tadamu naa eneba enitusulunore, irridu niaas isiaaitin niaasita apa te dukuya. Naa ti nimiaas, naa kalotu enitii naiwuang'ie olkilang'ilang'et lino te wueji enye, te neitu irridu.

⁶Kake iata ena nabo, imba isiaaitin oo Lnikolatin naiba sii nanu.

⁷Ore oloata enkiok inchoo ening enajoki Enkiyang'et nena sirito. Ore ilo omirisho naisho meinosa ilng'anayio te ilo shani le mpuaan otii atua olchampa le Nkai.’

⁸“Naa ore olmalaika le sirit natii atua Smirna, tisiraki nchere, ‘Irorei le ilo le Nkiterunoto o le nkiting'oto, otua apa, nenyaaka apiu.

⁹“ ‘Kayiolo osomit lino o aisinanisho ino, kake ira karsis, nayiolo sii imorot e lelo oojo ate Ilyahudi neme ninche, kake enkaji e ntumo e Sheitani ninche.

¹⁰Miureyu ilo sina olotu. Ng'ura, etaa enajo pee enang'aki Sheitani lkulikae te intae atua jila pee etum atetema intae, naa ore too nkolong'i tomon nitumutumu intae osomit. Taa oloisiligayu o tabaiki keeya naa kaaisho iyie enkopiyia e nkitoo e nkishui.

¹¹Oloata enkiok, inchoo ening enajoki Enkiyang'et nena sirito. Ore ilo omirisho nemeitame ninye ina keeya e are.’

¹²“Naa ore olmalaika le sirit natii atua Pargamam, tisiraki nchere, ‘Irorei lo loata olalem opi nkaloli pokira are.

¹³“ ‘Kayiolo enikimanya, ine etii olorika le nkitoo le Sheitani; nimbung'ita enkarna ai akurraki, neitu imiki enkirukoto ai ebaiki inkolong'i e Antipas olchakeni lai asipani otaraki metua tiatua intae teine nemanya Sheitani.

¹⁴Kake kaata nkuti namen te iyie; iata kulikae teine ooibung inkiteng'enat e Balaam oiteng'ena Balak metipiki eloket narror inkera oo Siraeli pee etum aainosa indaiki oo lasarri ootopolosaki leme le Nkai, neas intorrok e loloito.

¹⁵Metaa iata sii iyie kulikae ooibung inkiteng'enat oo Lnikolatin.

¹⁶Irridu naa. Naa te neitu, nalotu enitii asieku naitainyie ninche olarrabal to lalem le nkutuk ai.

¹⁷Oloata enkiok inchoo ening enajoki, Enkiyang'et nena sirito. Ore ilo omirisho naa kaisho ninye eoroti e mana naisudoro, naisho osoit oibor, osirakino enkarna enye ng'ejuk, nemeyiolo likae tung'ani meteleku ilo ake ong'amu.’

¹⁸“Ore olmalaika le sirit natii atua Tiatira, tisiraki nchere, ‘Irorei lo Inoti le Enkerai e Nkai, otiu nkonyek enyena anaa lng'ejepa le nkima, netiu nkejek enyena anaa isuyan ootisikaki.

¹⁹“ ‘Kayiolo isiaaitin inono, o enyorrata ino, o enkirukoto o enkisiaayiare, o eng'iriata, o nchere etalang'a isiaaitin inono e det ine dukuya.

²⁰Kake kamen ena te iyie nchere, itapalayie ina kitok naji Yesebel naitaa kewan enkoiboni pee eiteng'enisho neitapong'oo isinkan laainei metaasa imbaa e loloito nenya indaiki naatopolosakaki inkitanyaanyukot.

²¹Aishoo ninye enkata meirridu, kake etanya eirridu te loloito enye.

²²Neaku, ekanang'aki ninye erruat e muoyian, ore lelo oololoito te nebo ninye nanang'aki atua olosilisili kitok aashu te neirridu inkiaasin enye.

²³Naa kaosh inkera enyena metuata. Naa keyiolou isirito pooki aajo nanu ilo ojur indamunot o ltau, naa nanu oisho pooki ng'ae linyi anaa erisioroto e siaai enye.

²⁴Kake ore intae kulikae ootii atua Tiatira leitu eibung ena kiteng'enare, leitu eiteng'en ate te nena naajo kulikae imbaa naagut e Sheitani, ajoki intae, maitoki aiteleiki intae likae ola.

²⁵Embung'a ake intae entukurraki ina niaatata, o metaba anaa nalotu.

²⁶Ore ilo omirisho neibung isiaaitin aainei o metabau enkiting'oto naisho ninye engolon meitoria iloreren.

²⁷Naa keitore ninche te ng'udi e sekenkei anaa te nedanyi motioo oo nkulupuok metaa mbelibelat, anaa sii ninye nanu enatang'amua engolon eing'uaa Papa lai.

²⁸Naa kaisho ninye olakira le nkakenya.

²⁹Oloata enkiok nchoo ening enajoki Enkiyang'et nena sirito.’