Read Maasai Bible – Biblia Sinyati Embolunoto 22 Bible Online

Embolunoto 22 - Maasai Bible – Biblia Sinyati bible

Embolunoto 22

¹Naaitoki olmalaika aitodol nanu olkeju le nkare e mpuaan owang anaa oltotoi orukunye aing'uaa olorika le nkitoo le Nkai olo Lkuoo le Ker.

²Neruko aim empolos enkoitoi nalala e ina anasa. Ore sii too lkekuno pokira leilo keju netii ilo shani le mpuaan te nebo o mpukunot tomon o aare oo lng'anayio lenyena. Neiu ake to lapa lelo ng'anayio lenyena; ore imbenek e ilo shani naa ninche naaishiunye iloreren.

³Nemeitokini aekata aata hoo toki nadiaa, kake ilo orika le nkitoo le Nkai o lo Lkuoo le Ker, ninche kenya ootii atua ina anasa, naa keserem ninye isinkan lenyena;

⁴naa Kedol ninche enkomom enye, ore inkarn enye netii ilpurai loo nkomomi enye.

⁵Nemeitokini ai kata aata enkewarie nemeetayie ninche tipat ewang'an o ltaa aashu ene nkolong, amu Olaitoriani Enkai oaku ewang'an, naa keitoreisho ninche intarasi ontarasi.

⁶Naajoki olmalaika nanu, “Keisiligayu nesipa kulo rorei. Naa Olaitoriani Enkai o nkiyang'eta oo loibonok le Nkai nairriwua olmalaika lenye meitoduaa isinkan lenyena nena nemeeta nchere pee eitu epuonu aasieku.

⁷Naa toning'o kalotu asieku.” Emayiana ilo oibung ororei le naibon e na buku.

⁸Nanu Yohana ilo otoning'o nadol kuna baa. Ore ake pee aning nadol ninche, nabatata too nkejek e ilo malaika laaitoduaa ninche aserem ninye.

⁹Kake aatiaaka ninye nanu, “Mintoki aiko neijia! Kara nanu osinka te nebo iyie o lalashera linono lelo oibonok le Nkai, o lelo ooibung irorei le na buku. Enkai teserema.”

¹⁰Naajoki ninye nanu, “Minuk irorei le naibon ena buku, amu etinyikua enkata.

¹¹Inchoo olarruoni eton aas enkarruoisho, nchoo oloiduruk eton eiduruk, nchoo osupat eton aas isupati. Neton osinyati aa sinyati.”

¹²“Ng'ura, kalotu asieku naata olekoisiaayio lai te nebo nanu, pee alaaki pooki ng'ae anaa anataasa ninye.

¹³Kara nanu Alfa o Omega, ole dukuya o le siadi, enkiterunoto o enkiting'oto.”

¹⁴Emayiana lelo ooisuj ilkilani lenye pee etum esipata nabaikinye ilo shani le mpuaan netum sii aaima inchomito e ina anasa.

¹⁵Auluo etii ildiein, o lasakutok, o loololoito, o looitayu iloikop, o looserem inkitanyaanyukot, o pooki tung'ani onyor elejare nelejisho.

¹⁶“Nanu Yesu laairriwaka iyie olmalaika lai meeu enitii, ayau ena shakenisho te nkaraki sirito, nanu entonai e ishoi e Daudi, olakira owang le Nkakenya.”

¹⁷Ejo enkiyang'et o ina siankiki narikori. “Wou!” Nchoo ilo oning ejo, “Wou!” Nchoo ilo oata enkure, elotu, nchoo ilo oyieu eng'amu enkare e mpuaan metii enkinyiang'a.

¹⁸Aikok pooki ng'ae oning irorei le naibon ena buku: te neponaa ake oltung'ani, neponiki sii ninye Enkai lelo meita ootolimuoki tiatua ena buku.

¹⁹Ore pooki ng'ae oiwuang'ie tiatua ilo irorei le naibon ena buku, neiwuang'ie Enkai erubata enye tiatua ilo shani le mpuaan tiatua ina anasa sinyati, nalimuno imbaa enye tiatua ena buku.

²⁰Ore ilo oishakenoki kuna baa, “Ejo kalotu asieku!” Eesai. Wou, Olaitoriani Yesu!

²¹Metaa empiris o Laitoriani Yesu te nebo isinyat pooki. Eesai.