Read Maasai Bible – Biblia Sinyati Embolunoto 7 Bible Online

Embolunoto 7 - Maasai Bible – Biblia Sinyati bible

Embolunoto 7

¹Ore te siadi ena nadol ilmalaika oong'uan eitashe too lubot pokira ong'uan e nkop, eibooyo isiwuoishi pokira oong'uan le nkop, pee meitoki olkutati akutu te nkop aashu te naiposha aashu akutaki olchani ake pooki.

²Naitoki adol likae malaika eilepu te nkilepunoto e nkolong, neeta olmishire le Nkai naishu, neipot to ltoilo sapuk lelo malaika oong'uan ooishooki engolon meinyiala enkop o enaiposha.

³Nejoki, “Eminyial enkop aashu enaiposha aashu ilkeek, o metaba anaa nikimishir isinkan le Nkai ang inkomomi enye.”

⁴Naning esiana, e lelo ootimishiraki; naa nkalifuni iip artam o oong'uan ilootimishiraki eing'uaa iloshon pooki loo layiok loo Siraeli:

⁵inkalifuni tomon o aare ilo losho le Yuda,

⁶inkalifuni tomon o aare ilo losho le Ruben, inkalifuni tomon o aare ilo losho le Gad, inkalifuni tomon o aare ilo losho le Asheri, inkalifuni tomon o aare ilo losho le Naftali, inkalifuni tomon o aare ilo losho le Manase.

⁷Inkalifuni tomon o aare ilo losho le Simion, inkalifuni tomon o aare ilo losho le Lawi,

⁸inkalifuni tomon o aare ilo losho le Isaakar naa nkalifuni tomon o aare ilootimishiraki eing'uaa olosho le Sebulon, nkalifuni tomon aare ilo losho le Yosef, nkalifuni tomon oaare ilootimishiraki to losho le Benchamen.

⁹Ore te siadi ena, naing'orisho, nadol olorora kitok lemeeta oltung'ani oidim aikena, eing'uaa pooki orere, neing'uaa iloshon pooki, o ltung'ana o lng'ejepa pooki, eitashe te dukuya olorika le nkitoo o te dukuya ilo Kuoo le Ker, neishopito ilkilani ooibor, neibung'ita ilng'osil loo ltuka too nkaik enye.

¹⁰Nebuaku too ltoiloishi sapuki aajo, “Ene Nkai ang enjeunoto: ina natonita to lorika le nkitoo o ene ilo Kuoo le Ker.”

¹¹Neitashe ilmalaika pooki aaman olorika le nkitoo o lelo payiani o nena ng'uesi ong'uan naaishu, nebatata too nkomomi enye te dukuya ilo orika le nkitoo neserem Enkai.

¹²Ejoito, “Eesai, metaa emayianata o enkisisa o enkitoo, o eng'eno nagut o enkishooroto enashe o enkanyit o engolon o enkidimata ene Enkai ang intarasi o ntarasi. Eesai.”

¹³Naaitoki obo le lelo payiani airorie nanu ajoki, “Kakua tung'ana kulo ooishopito ilkilani ooibor, naa kaji eing'uaa ninche?”

¹⁴Najoki nanu ninye, “Olkitok, iyiolo iyie.” Naaitoki aajoki, “Kulo ninche lelo ooiturukutuo aaing'uaa ilo sina kitok neitukuo ilkilani lenye neiborrie to sarge lo Lkuoo le Ker.”

¹⁵Naa te nkaraki ina pee etii dukuya olorika le nkitoo le Nkai neisiaai ninche ninye dama o kewarie tiatua enkaji enye. Ore ilo otonita to lorika le nkitoo naa keitushur ninche teine netii ninye.

¹⁶Nemeitoki aekata ninche aaisumashu aashu aatum enkure. Nemedal enkolong ninche aashu ae kirowuaj napejisho.

¹⁷Amu ilo Kuoo le Ker otii empolos o lorika le nkitoo oaku olchekut lenye, naa kerikoo ninche too nchorroi oo nkariak naaishu. Naa kejut Enkai pooki kiyioi too nkonyek enye.