Read Maasai Bible – Biblia Sinyati Rusi 1 Bible Online

Rusi 1 - Maasai Bible – Biblia Sinyati bible

Rusi 1

¹Ore apa te nena olong'i naaitoreisho ilarishak, netii olameyu enkop, ore oltung'ani obo le Betlehem tiatua enkop e Yuda nelo amany enkop e Moab. Eshomo ninye te nebo enkitok enye o layiok lenyena oaare.

²Ore apa enkarna e ilo tung'ani naa Elimelek, ore enkarna e nkitok enye naa Naomi. Ore inkarn oo layiok lenyena pokira oaare naa Mahalon o Kilion. Ile Frati apa ninche ooing'uaa Betlehem tiatua enkop e Yuda. Eshomo apa ninche enkop e Moab nepuo aabik teine.

³Kake etua apa Elimelek ilo payian le Naomi, neing'uari Naomi aa ninye ake o layiok lenyena pokira oaare.

⁴Ore kulo pokira neyam intoyie oo Lmoabu; ore apa enkarna e nabo naa Orpa ore enkarna e nkae naa Rusi. Etobiko apa ninche teine ilarin oobaya tomon.

⁵Ore Mahalon o Kilion neye sii ninche, neaku enoto Naomi olkiyioi lo lpayian lenye o loo layiok lenyena.

⁶Nedumunye Naomi o nena toyie oo layiok lenyena pee errinyo teina kop e Moab, amu etoning'o apa ninye teina kop e Moab nchere etamayiana Olaitoriani iltung'ana lenyena neisho ninche endaa.

⁷Nedumunye teine aapuo teine wueji netii ninye te nebo o ntoyie are oo layiok lenyena, neibung enkoitoi aapuo enkop e Yuda.

⁸Kake enyaaka Naomi ajoki nena toyie are oo layiok lenyena, “Enchom entorrinyoto, shomo ake oltung'ani enkaji e ng'otonye. Naa meitaasa intae Olaitoriani isupati, anaa apa enintaasa intae ilootuata o nanu.

⁹Meidimie intae Olaitoriani enoto inkang'itie, oltung'ani ake te intae netum olpayian!” Neitoki ang'utut ninche, neyietu ninche aaishir.

¹⁰Nejoki ninche ninye, “A'a, eikirrinyo iyiook te nebo aapuo enetii iltung'ana linono.”

¹¹Kake etejo Naomi, “Entorrinyoto enchom intoyie aainei, kainyoo pee kiriamariyieyie nanu? Keton nanu aata ilayiok te nkoshoke ai eji pee eyooki aayam intae?

¹²Entorrinyoto enchom, intoyie aainei, shomo ake oltung'ani enkoitoi enye, amu atamorua nanu meekure atum olpayian. Amaa naaji ninye te najo kaata osiligi, anaa naaji ninye tenaa katum olpayian ena kewarie naiu ilayiok,

¹³iyanyunyu naa o metubulu? Itonini intae miyamama. A'a, intoyie aainei, amu keme oleng te nanu te nkaraki intae, nchere aatigilunore nanu enkaina o Laitoriani.”

¹⁴Neitoki ninche aayietu aaishir, neng'utut Orpa enkaputani enye kake etamuatakine Rusi ninye.

¹⁵Nejoki Naomi ninye, “Ng'ura esintani ino ajo eshomo olorere lenye nelo enetii inkaitin enyena; torrinyoyu tusuja esintani ino.”

¹⁶Kake etejo Rusi, “Mikisai nanu maatung'uai iyie aashu pee arrinyo eitu aasuj iyie; amu ore ewueji nilo ninye nanu alo, ore ewueji nirrag naa ninye nanu airrag; ore iltung'ana linono naa keaku iltung'ana laainei, neaku Enkai ino Enkai ai;

¹⁷ore ewueji ninang ninye nanu anang, naa teine aanukari nanu. Maaitaasa nanu Olaitoriani ena aitulus tenaa ninye kaarishie keeya iyie.”

¹⁸Ore ake pee edol Naomi ajo eteenikine Rusi asuj ninye, neitu eitoki ajo ae.

¹⁹Neaku eshomo ninche pokira are ometabai Betlehem. Ore ake pee ebau Betlehem neing'asia enkang pooki te nkaraki ninche; nejo inkituaak, “Ai Naomi ena?”

²⁰Nejoki ninye ninche, “Emikimpot nanu aajo Naomi, entejoki nanu Mara[1], amu aaitaasa nanu Olmagilani imbaa e mion.

²¹Ashomo apa nanu abore, naatorrinyuo nanu Olaitoriani arok. Kainyoo pee kimpotipoto nanu aajo Naomi, aaisilisilo nanu Olaitoriani neyaua Olmagilani entaboi shumata nanu?”

²²Neaku etorrinyunye Naomi o Rusi ina oo Lmoabu nara entito o layioni lenye. Etorrinyunye ninche eing'uaa enkop e Moab. Nepuonu ninche Betlehem te nkiterunoto e nkikesare e shairi.