Read Maasai Bible – Biblia Sinyati Rusi 2 Bible Online

Rusi 2 - Maasai Bible – Biblia Sinyati bible

Rusi 2

¹Keeta apa Naomi oltung'ani le sotua lo lmarei lo lpayian lenye, oltung'ani karsis, lo lmarei le Elimelek, oji enkarna enye Boas.

²Ore Rusi ina oo Lmoabu nejoki Naomi, “Nchooki nanu mashomo enkurma asotu e nkano te siadi ilo latumie nanu ninye omom.” Nejoki Naomi ninye, “Shomo entito ai.”

³Neaku etudumunye Rusi alo asotisho tiatua enkurma asuj lelo ooikes, nelotu apa ninye ewueji enkurma e Boas laa olo lmarei le Elimelek.

⁴Nelotu Boas eing'uaa Betlehem, nejoki lelo ooikesita enkurma, “Metaa Olaitoriani te nebo intae!” Newal ninche aajo, “Mikitamayiana Olaitoriani.”

⁵Neitoki Boas ajoki ilo aisiaayiani lenye oitasheiki lelo ooikesisho, “Keneng'ae ena sila?”

⁶Nejoki ilo sinka aitasheikinoni, “Entito oo Lmoabu apa nairiamunore Naomi te nkop e Moab.

⁷Netejo ninye, ‘Aatasayia nchooki nanu matasotu naiturrur tiatua irridat le shairi o le nkano te siadi ilooikes.’ Neaku eewuo ninye, netasotishe ebaiki tadekenya o metabaiki ena kata, eitu ninye eyagie te nkiti rishata.”

⁸Neitoki Boas ajoki Rusi, “Ore taata, toning'o, entito ai, milo asotisho ti ai kurma, nimilo aing'uaa ena, kake tataaniki intoyie aainei.

⁹Ing'ura iyie ewueji nepuo ninche aikesishore, nilo iyie asujaa ninche. Keitu nanu aitanap ilbarnot pee mikintanyamal ninche iyie? Naa te niata enkure shomo enetii motioo tooko ina natookutuo ilbarnot.”

¹⁰Negilaki kung neirugokino enkop nejoki ninye, “Kainyoo nanu pee anoto omom too nkonyek inono, eji nikitishilayie hoo nara enkomoni?”

¹¹Kake etawalikia Boas ninye ajoki, “Ore nena pooki nintaasa enkaputani ino ebaiki keeya o lpayian lino aatolikioki nanu aaitobiraki o ina apa nitung'uayie papaai lino o yieyioo lino o enkop inyi nilotu enkop oo ltung'ana apa limiyiolo.

¹²Mikitalaaki Olaitoriani ina apa nitaasa, nikincho Olaitoriani olerrinyore te nkiputakinoto Enkai oo Siraeli, naa abori inaipuko enyena iewuo asaru!”

¹³Neitoki Rusi ajo, “King'urie iyie nanu, olkitok lai, amu kintagolo nanu oshoke nirorie esinka ino te supatisho, hoo ninye nemara nanu nabo oo nkaisiaayiak inono.”

¹⁴Ore te nkata nainosi endaa nejoki Boas, “Wou ene, pee inya emukate nintadoiki oldung'oti lino atua enaisho oo sabibu.” Neaku etotona ninye te nebo nena aikesak, neitarasaki ninye emukate natapejoki; nenya ninye o metaraposhoyu, neleku.

¹⁵Ore pee edumunye ninye alo asotisho, neiguan Boas ilbarnot lenyena ajoki, “Enchoo ninye metasotisho ninye tiatua o metasotu irridat, nimibuakiki ninye.

¹⁶Ore sii entaiki ninye kulie rridat naatii enkano, ning'ueikiki ninye metasotu, nimibuakiki ninye.”

¹⁷Neaku etasotishe Rusi tiatua enkurma o metaa teipa; neitoki aidong nena naatasotuo ninye, neaku efa nabo e ntapa naji shairi.

¹⁸Nedumu ninye aya nelo atua enkanasa; neitodol enkaputani enye entoki natasotuo ninye, neyaua sii aisho ninye endaa duoo natelekua ninye etaraposhe.

¹⁹Nejoki enkaputani enye ninye, “Kaji duo taata ishomo asotishore? Naa kaji itaasishore? Metamayiani ilo tung'ani likitisirua iyie.” Neaku etolikio ninye enkaputani oltung'ani duo oshomo aaisiaai, nejoki, “Ore enkarna e ilo tung'ani duo lashomo aaisiaai naa keji Boas.”

²⁰Nejoki Naomi ina tito o layioni lenye, “Metamayiana Olaitoriani ilo leitu eing'uaa esupatisho enye ilooishu aashu ilootuata!” Neitoki sii Naomi ajoki ninye, “Olo lmarei lang ilo tung'ani, obo le ntaloishi ang.”

²¹Nejo Rusi, ina tito oo Lmoabu, “Ore te nebo nena, aatiaaka ninye, ‘Tataaniki ilaisiaayiak laainei, o metaba anaa neidip enkikesare.’ ”

²²Neitoki Naomi ajoki Rusi, ina tito o layioni lenye, “Keishiaakino entito ai te nilo iyie te nebo nkaisiaayiak enyena, pee mikintanyamali ake ti ae kurma.”

²³Neaku etataanikia apa Rusi inkaisiaayiak e Boas, esotisho o metabau enkiting'oto e nkikesare e shairi o enkano; neton ninye te nebo o enkaputani enye.