Read Maasai Bible – Biblia Sinyati 1 Samuel 1 Bible Online

1 Samuel 1 - Maasai Bible – Biblia Sinyati bible

1 Samuel 1

¹Etii apa oltung'ani obo le Ramataim, le ina kop oo ldoinyo e Efraim, oji enkarna enye Elkana olayioni le Yeroham, olayioni le Elihu, olayioni le Tohu, olayioni le Sufi ilo le Efraim.

²Neeta apa ninye inkituaak are; ore enkarna e ina e dukuya naa Hana, ore enkarna e nkae naa Penina. Neeta apa Penina inkera kake meeta apa Hana inkera.

³Naa keilep apa ele tung'ani te pooki ari te nkanasa enye alo aserem nepolosaki Olaitoriani loo lororani te Shilo, teine apa nerayie ilayiok pokira oaare le Eli, Hofni o Finehas ilapolosak lo Laitoriani.

⁴Ore apa teina olong napolosisho Elkana, neisho ninye irubat Penina, enkitok enye o layiok lenyena pooki o ntoyie enyena;

⁵naa, ore hoo nenyor apa Hana neisho ninye erubata nabo ake, amu eikeno Olaitoriani enguset enye.

⁶Ore apa Penina neitayunore enkaini enye neitagor ninye oleng neinosie osina, te nkaraki naikeno Olaitoriani enguset enye.

⁷Neikunari neijia te pooki ari. Ore anaake te nelo Hana enkaji o Laitoriani neitagor apa ina aini enye ninye. Ore te nkaraki ina neishir Hana ometaa menya endaa.

⁸Ore Elkana ilo payian lenye, nejoki ninye, “Hana, kainyoo peyie inchir? Naa kainyoo pee minya endaa? Naa kainyoo pee eeta oltau lino osina? Aimalusoo too ilayiok tomon te iyie?”

⁹Ore pee eidip ninche aainosa endaa, neokisho te Shilo nedumunye Hana. Netonita apa ina kata Eli ilo apolosani to lorika te mbata e ng'ape e kutukaji e ina aji o Laitoriani.

¹⁰Neeta apa ninye Hana emion sapuk to ltau neomon Olaitoriani, neishir te mion.

¹¹Nenya ninye olmumai nejo, “Olaitoriani loo lororani, tenaa ing'or iyie te sipata osina le sinka ino, nikidamu nanu, nimincho kirikino esinka ino, kake nincho esinka ino olayioni, naisho nanu ninye Olaitoriani inkolong'i pooki e nkishui enye, nemeetae olmurunya oiseyie endukuya enye.”

¹²Ore eomonito ninye te dukuya Olaitoriani, neing'or Eli enkutuk enye.

¹³Eirorita apa Hana to ltau lenye, inchonito enyena e nkutuk ake naaiseuseu nemening'o oltoilo lenye. Ore te nkaraki ina nejo Eli tenaa ketemere enkitok enye.

¹⁴Nejoki Eli ninye, “Imera ade o anu? Intalamai ina aisho ino.”

¹⁵Kake etawala Hana ajo, “A'a, Olkitok lai, kara nanu enkitok naata emion to ltau; eitu nanu aok enaisho naitemerisho, agira nanu abukoki Olaitoriani enyamali o ltau lai.

¹⁶Minko naa esinka ino aitaa enkitok e pesho, amu ore ena rishata pooki kagira alikioo eyieunoto ai o sina lai.”

¹⁷Neitoki Eli awaliki, “Shomo te seriani, mikinchoo Enkai oo Siraeli nena nitasayua te dukuya ninye.”

¹⁸Nejo ninye, “Inchoo esinka ino menoto omom too nkonyek inono.” Nelo ina kitok te nkoitoi enye nenya endaa, neitu ninye eitoki aisinanuo.

¹⁹Neinyototo ninche aayooki tadekenya neserem Olaitoriani; neitoki aashuko aapuo enkang enye te Rama. Neyiolou Elkana Hana ina kitok enye, nedamu Olaitoriani ninye;

²⁰ore pee ebaya enkata nenutayu Hana neiu ninye enkayioni, nejo ninye enkarna enye Samuel, amu etejo ninye, “Atoomonuo nanu ninye to Laitoriani.”

²¹Ore ilo tung'ani oji Elkana o enkaji enye pooki neilep aapuo aaitaiki Olaitoriani olasar te pooki ari, nelak ninye olmumai lenye.

²²Kake eitu ninye eilep Hana alo, amu etiaaka ninye olpayian lenye, “Te neoruni enkerai ilki, nayau nanu ninye, pee etum ataliooyu te dukuya Olaitoriani, neton teine intarasi.”

²³Nejoki Elkana ilo payian lenye, “Taasa ina naa ninye esidai te iyie; totona ometaba anaa neoruni ninye ilki; meibung'a ake duoo ninye Olaitoriani ororei lenye.” Neton ina kitok neing'or aitubulu olayioni lenye, ometaba anaa neere ninye.

²⁴Ore ake pee eoruni ilki neya ninye ailepie te nebo ninye, oloing'oni loo larin okuni o entemet nabo e nkurma o olbene lo lchoni le naisho oo sabibu, neyau ninye enkerai ina aji o Laitoriani natii Shilo; naa aikiti ina kerai.

²⁵Neyieng ninche ilo oing'oni, neitoki ninche aayau ina kerai enetii Eli.

²⁶Nejo ninye, “Olkitok lai! Ore anaa eninchu, Olkitok lai, kara nanu ina kitok apa naitashe tene te dukuya iyie, eomonito Olaitoriani.

²⁷Atoomonuo naaishori ena kerai, naaishoo nanu Olaitoriani eomonunoto ai apa natoomono ninye.

²⁸Metaa aishoo nanu ninye Olaitoriani. Ore anaa neishu ninye naa keaku olo Laitoriani.” Neserem ninche Olaitoriani teine.