Read Maasai Bible – Biblia Sinyati 1 Samuel 10 Bible Online

1 Samuel 10 - Maasai Bible – Biblia Sinyati bible

1 Samuel 10

¹Neitayu Samuel oltulet le ilata nebukoki endukuya e Saul eilata aput, neng'utut ninye nejo, Keitu iyie kibukoki Olaitoriani eilata aput pee iaku olkitok oitore iltung'ana lenyena Isiraeli? Naa intore iyie iltung'ana lo Laitoriani, nintajeu iyie ninche aitung'uaa enkaina oo lmang'ati lenye oomanita. Neaku ele olmonekie te iyie nchere kitubukoko iyie Olaitoriani eilata aput pee iaku olkitok oitore enjung'ore enye.

²Tinikilo iyie aorore nanu taata nitum iltung'ana oaare te mbata e nkurare e Raeli te nkop e Benchamen pee etumo o Selsa, nikijoki ninche iyie, ‘Ore ilapa sirkon lishomo iyie aing'oru nenotoki; ore taata papaai lino etapala enadamu isirkon neaku intae edamu, ejo; “Kaji aiko to layioni lai?’

³Nilo iyie dukuya o tabaiki olchani onyanyukie olng'aboli otii Tabor; nikinang'are iyie teine iltung'ana okuni ooilep aapuo enetii Enkai te Betel, enapita obo ilkuoo okuni le kineji, nenapita olikae imukateni uni, ore olikae nenapita olbene lo lchoni le naisho oo sabibu.

⁴Nikiroroki ninche nikincho iyie imukateni are ning'amu iyie te nkaina enye.

⁵Ore te siadi ina nilotu iyie Gibeat-elohim, ine netii oltim loo Lfilisti; ore teine, ilotu ina anasa, ninang'are olturur loo loibonok edou aapuonu eing'uaa ine wueji e shumata eeta enkawuo oo sinkolioitin o ntampurini o endule, o lwulul loo usin, te dukuya ninche, eibonisho.

⁶Nelotu Enkiyang'et o Laitoriani te ngolon shumata iyie, naa imbonisho iyie te nebo ninche nikimbelekenyi iyie aaitaa likae tung'ani.

⁷Nchoo ake pee kinang'are iyie kulo monek, taasa enaba anaa enatum inkaik inono aataas, amu etii Enkai te nebo iyie.

⁸Nidoyio iyie alo Gilgal te dukuya nanu; naa ng'ura, kalotu nanu enitii aitayu olasar opejori napolos olasar le seriani. Too nkolong'i naapishana taanyisho, o metaba anaa nalotu pee aaitodol iyie eniaas.”

⁹Ore ake pee eibelekenya ninye aisho Samuel enkoriong enye, neisho Enkai ninye likae tau; nebaya lelo monek pooki ina olong.

¹⁰Ore ake pee epuonu ninche Gibea, nenang'are ninye olturur loo loibonok; nelotu enkiyang'et e Nkai te ngolon shumata Saul, neibonisho ninye tiatua ninche.

¹¹Ore apa lelo pooki ooyiolo ninye pee edol eneiko te neibonisho te nebo iloibonok, nejokino iltung'ana maate, “Kainyoo naewuo shumata olayioni le Kish? Ketii sii Saul atua iloibonok?”

¹²Newal oltung'ani le ine wueji ajo, “Naa kaing'ae papaai lenye?” Metaa etaa endung'et e rashe eji, “Ketii sii ninye Saul atua iloibonok?”

¹³Ore ake pee eidip Saul aibonisho nelotu ine wueji e shumata.

¹⁴Nejoki olenkapu lenye Saul o ilo sinka lenye, “Kaji apa ishomo?” Nejo ninye, “Kishomo aaing'oru isirkon; ore ake pee kidol aajo metumi, nikipuo enetii Samuel.”

¹⁵Nejo ilo le nkapu le Saul, “Tolikioki siaake enikitiaaka Samuel.”

¹⁶Nejoki Saul olenkapu lenye, “Etiaaka ninye iyiook aibalakinye nchere enotoki lelo sirkon.” Kake ore tialo ina bae e nkitoria natejo Samuel, eitu ninye eliki ai toki.

¹⁷Neipotu Samuel iltung'ana meiturrurrokinoto Olaitoriani te Mispa.

¹⁸Nejoki ninye iltung'ana le Israel, “Nji ejo Olaitoriani, Enkai oo Siraeli, ‘Ayaua nanu Israel ailepunye aitung'uaa Misiri, nalaku nanu intae aitung'uaa enkaina oo Lmisiri naitung'ua enkaina oo nkitoriat apa pooki naaisomita intae.’

¹⁹Kake itanyaita intae ena olong Enkai inyi, ilo oitajeu intae tiatua isinaitin linyi pooki o losilisili; nitejo intae, ‘A'a, kake tipika olaiguanani shumata iyiook.’ Ore naa taata eyautu ate dukuya Olaitoriani too loshon linyi o too nkalifuni inyi.”

²⁰Neriku Samuel iloshon pooki le Israel enetaana, nedoiki enkukuo olosho le Benchamen.

²¹Neyau olosho le Benchamen enetaana too lmareita lenyena, nedoiki enkukuo olmarei le Matrit; ore te siadi neyau olmarei le Matri enetaana olee o lee, nedoiki enkukuo Saul ole Kish. Kake ore ake pee eing'oru ninche ninye, neitu etumi ninye.

²²Neitoki ninche aaikilikuanu to Laitoriani, “Keewuo ele tung'ani ene?” Nejo Olaitoriani, “Ng'ura, eisudori ninye tiatua lolan.”

²³Neipirri ninche aayau ninye teine; ore pee eitashe tiatua iltung'ana, naa keado alang pooki tung'ani ebaiki ironyi lenyena neilep.

²⁴Nejoki Samuel iltung'ana pooki, “Idolitata olaa ninye etegelua Olaitoriani? Metii likae laaijo ninye tiatua iltung'ana pooki.” Nebuaku iltung'ana pooki aajo, “Metobikoi olaiguanani!”

²⁵Neliki Samuel iltung'ana enkitoo nairirikino olaiguanani isiaaitin enyena; neiger tiatua embuku neirragie te dukuya Olaitoriani. Neisho Samuel iltung'ana pooki meshomo, oltung'ani ake nelo enkang enye.

²⁶Nelo sii ninye Saul enkanasa enye te Gibea, ore te nebo ninye nepuo ilpayiani oogol ooiseyie Enkai iltauja lenye.

²⁷Kake ore ilkulikae tung'ana le pesho, nejo, “Kaji eiko ele tung'ani te neitajeu iyiook?” Nemenaa ninche ninye, neitu ninche eyaki ninye inkishoorot. Kake etigire ninye.