Read Maasai Bible – Biblia Sinyati 1 Samuel 14 Bible Online

1 Samuel 14 - Maasai Bible – Biblia Sinyati bible

1 Samuel 14

¹Nejoki nabo olong Yonatan olayioni le Saul olbarnoti apa onap imasaa enyena o larrabal, “Wou, maape iyiook enetii oltim loo Lfilisti te lido kekun.” Kake eitu ninye eliki menye.

²Netonita apa Saul te netaaniki Gibea ti abori olchani otii Migron; ore iltung'ana apa ootii te nebo ninye nebaya iip ile,

³o Ahija olayioni le Ahitab, ilo alashe le Ikabod olayioni le Finehas, olayioni le Eli, ilo apolosani lo Laitoriani te Shilo eishop enkila dorrop. Neitu eyiolou iltung'ana aajo eshomo Yonatan.

⁴Ore te mpaash teine apa neim Yonatan elo eneti oltim loo Lfilisti netii apa emarti enchoto nabo o emarti te nkae shoto; neji nabo Boses neji enkae Sene.

⁵Ore emarti nabo neitashe te moikuape te dukuya Mikmash ore enkae te kopikop te dukuya Geba.

⁶Nejoki Yonatan ilo barnoti apa onapita imasaa enyena o larrabal, “Wou, maape iyiook enetii oltim le kulo lememurata; keidimayu pee eret Olaitoriani iyiook; amu meetae ae toki naidim aibooi Olaitoriani amitiki eitajeusho too lkumok aashu too lkuti.”

⁷Nejoki ilo onapita imasaa enyena o larrabal ninye, “Taasa anaa eniyieu niaas; ng'ura, atii nanu te nebo iyie, anaa enatiu indamunot inono neijia etiu inaainei.”

⁸Nejo ninye Yonatan, “Ng'ura, eikilang iyiook aapuo enetii ilewa, nikintodol ate ninche.

⁹Ore pee ejoki iyiook, ‘Entaanyisho o maetu iyiook enitii intae;’ nikintashe iyiook aaitirring'a te wueji ang, nimikilep iyiook aapuo enetii ninche.

¹⁰Kake te nejo ninche, ‘Wootu elepu enikitii,’ nikilep iyiook aapuo; amu eishorua Olaitoriani ninche apik enkaina ang. Neaku ele olmonekie te iyiook.”

¹¹Neitoduaaya pokira oaare ate oltim loo Lfilisti; nejo Ilfilisti, “Eng'ura, epuonu Ilbrania aaipang'u too ngumot te nenen apa neisudorie ate.”

¹²Neipotu lelo tung'ana lo ltim Yonatan o ilo anapani loo masaa enyena olarrabal nejo, “Elepu wootu enikitii, naa aikintodol intae entoki.” Nejoki Yonatan ilo anapani lenye, “Ilepu wou tusujuaki amu eishoo ninche Olaitoriani metijing'a atua enkaina e Israel.”

¹³Neked Yonatan ailep too nkaik enyena o too nkejek, nesuju olanapani lenye onap imaasa enyena olarrabal. Nebatata ninche te dukuya Yonatan near ilo anapani ninche metuata te siadi ninye.

¹⁴Ore lelo meneng'a le dukuya, ooitayutuo Yonatan o ilo anapani lenye, nebaya iltung'ana tikitam te rishata naba anaa olpisiai le eka.

¹⁵Nejing enkuretisho ilng'oborri o ong'ata o atua iltung'ana; ore enjore o lelo ooarisho neikirikira; neikirikira enkop neaku olkirutoto kitok.

¹⁶Neing'or ilarripok le Saul te Gibea e Benchamen; naa ng'ura, eidapashari olorora idie o idie.

¹⁷Nejoki Saul lelo tung'ana ootii te nebo ninye, “Enkenisho eng'urai kaing'ae oshomo tiatua iyiook.” Ore ake pee eidip aaikenisho, ng'ura, metii Yonatan o lanapani lenye loo masaa olarrabal ine.

¹⁸Nejoki Saul Ahija, “Iyau ene ilo Sanduku le Nkai.” Amu kelo apa ilo Sanduku le Nkai ina kata te nebo iltung'ana le Israel.

¹⁹Ore egira Saul airorie olapolosani, neponari olodoo too lng'oborri loo Lfilisti oleng oleng; nejoki Saul ilo apolosani, “Tushuko enkaina ino.”

²⁰Ore Saul o lelo tung'ana pooki apa ootii te nebo ninye neipirri aapuo olarrabal; naa ng'ura, ore ake olalem lo ltung'ani near olikae, netii apa olmilo kitok oleng.

²¹Ore ina kata Ilbrania apa ootii te nebo Ilfilisti te dukuya ina kata, lelo ooshomo aailep atua ilng'oborri, eibelekenyate aaku te nebo Israeli apa ootii te nebo Saul o Yonatan.

²²Neijia eikununo, ore iltung'ana pooki le Israel apa ooisudoitie ate teina kop oo ldoinyo e Efraim nening nchere eisikita Ilfilisti; nesuju sii ninche te ngolon epuo enjore.

²³Neaku etokordua Olaitoriani Israel ina olong; ore olarrabal negiroo teidia alo Bes-afen.

²⁴Nenyamalu iltung'ana le Israel ina olong; amu einosie Saul iltung'ana olmumai, ejo, “Ediaa ilo tung'ani onya endaa o metaba anaa neaku teipa aitalakua too lmang'ati laainei.” Neaku meetae obo too ltung'ana oishamishama endaa.

²⁵Nepuonu iltung'ana pooki atua entim; netii apa enaisho enkop.

²⁶Ore ake pee ejing iltung'ana entim, ng'ura, eitong'ita olkenkei le naisho, kake meetae oltung'ani otipika enkaina enkutuk; amu etureita iltung'ana ilo mumai.

²⁷Kake eitu ening Yonatan eitanap papaai lenye iltung'ana ilo mumai; neaku eisuroko eng'udi apa natii enkaina, nepik atua lukuny oo naishi nepik enkaina enkutuk; newang'u inkonyek enyena.

²⁸Nejo obo loo ltung'ana, Eitanapa papaai lino iltung'ana akurraki to lmumai, ejo, Ediaa ilo tung'ani onya endaa ena olong. Nenaurate iltung'ana.

²⁹Nejo Yonatan, eitanyamala papaai enkop; ng'ura ajo etawang'ita inkonyek aainei te nkaraki naishamishama enkiti ena aisho.

³⁰Kebaa na keikash tenaa keinosa iltung'ana ena olong nena yarunot oo lmang'ati lenye naaineputua ninche. Amu ore taata earata olalem too Lfilisti neme kitok.

³¹Near ninche Ilfilisti ina olong ebaiki Mikmash o metabaiki Aijalon. Neaku enaurate iltung'ana,

³²nekuetiki iltung'ana nena tokitin apa naataarutua, neya ninche nkerra o lmong'i o lasho, neyieng te nkop nenya iltung'ana ninche te nebo osarge.

³³Nejoki ninche Saul, “Ng'ura, easita iltung'ana eng'oki to Laitoriani, aanya inkiri te nebo osarge.” Nejo ninye, “Itaasa te nkaldaroto; embeleleng'u osoit sapuk ene natii nanu.”

³⁴Neitoki Saul ajo, “Endapashaki ate atua olorere, nijokiki ninche, ‘Nchoo pooki tung'ani meyau olkiteng lenye aashu enker enye, neyieng ninche tene, nenya; nimiasiasa eng'oki to Laitoriani aanya inkiri te nebo osarge.’ ” Neaku eyaua pooki tung'ani olkiteng lenye te nebo ninye ina kewarie apa, neyieng ninche teine.

³⁵Neshetu Saul olperere lo lasar lo Laitoriani; naa olperere lo lasar le dukuya oitera Saul ashetaki Olaitoriani.

³⁶Neitoki Saul ajo, “Matadoi aapuo aasujaa Ilfilisti nikimbung, nikiya intokitin enye nikiar kewarie ninche o mekenyu; miking'uaa iyiook oltung'ani obo te ninche.” Nejo ninche, “Taasa enaba anaa enidol aa sidai te iyie.” Kake etejo olapolosani, “Maigutu iyiook aanyikaki Enkai tene.”

³⁷Neikilikuanishore Saul Enkai, “Amaa, kalo nanu adoyio asujaa Ilfilisti? Amaa inchoru ninche apik atua enkaina e Israel?” Kake eitu ninye ewaliki Enkai ina olong.

³⁸Neitoki Saul ajo, “Wootu ene, intae ilarikok pooki loo ltung'ana; entayiolo nidolidolo eneikununye ena ng'oki taata.

³⁹Amu ore anaa enaishu Olaitoriani, ilo oitajeu Israel, hoo tenaa atua Yonatan, olayioni lai etii meeta nchere pee eitu eye ninye.” Kake metii apa oltung'ani tiatua iltung'ana pooki otawalikia ninye.

⁴⁰Neitoki ninye ajoki Israel pooki, “Entijing intae enkalo nabo, ore nanu o Yonatan, olayioni lai, nikijing enkae shoto.” Nejoki iltung'ana Saul, “Taasa ina nidol aa sidai te iyie.”

⁴¹Neaku etejo Saul, “Olaitoriani Enkai oo Siraeli, kainyoo pee eitu iwaliki osinka lino ena olong? Tenaa atua nanu etii ena torroni aashu atua Yonatan, olayioni lai, Olaitoriani Enkai oo Siraeli, inchoru Urim; kake tenaa atua iltung'ana linono Israel etii ena torroni, inchoru Tummin.” Neyae Yonatan o Saul, nepok iltung'ana.

⁴²Neitoki Saul ajo, “Entoosh enkukuo te rishata nanu o layioni lai Yonatan.” Neyae Yonatan.

⁴³Nejoki Saul Yonatan, “Tolikioki nanu ina nitaasa.” Neliki Yonatan ninye, “Aishamishama nanu enkiti aisho te ndukuya e ng'udi apa natii enkaina ai; nele nanu, naa kaye.”

⁴⁴Nejo Saul, “Metaasa Enkai ena te nanu neitulus; meeta nchere pee miye iyie, Yonatan.”

⁴⁵Nejoki iltung'ana Saul, “Keye Yonatan laa ninye oisula te nkisulata sapuk e Israel? Ekelakua ina! Anaa enaishu Olaitoriani, meetae ninye olpapita le ndukuya enye odoiki enkop; amu etaasishe ninye te nebo Enkai ena olong.” Neaku eitopuaa iltung'ana Yonatan, metaa eitu eye.

⁴⁶Neilep Saul alo aing'uaa emirata oo lfilisti; nepuo Ilfilisti ewueji enye.

⁴⁷Ore apa pee eya Saul enkiguana te Israel, nearare ninye ilmang'ati lenyena pooki te pooki shoto, etaarare Moab o Ilamoni o le edom o laiguanak le Soba o Lfilisti; naa ore ake eneibelekenyakine neisulu ninye.

⁴⁸Nearisho te mpijan nemir Ilmaleki, nekordu Israel aitung'uaa inkaik e lelo apa ooibung'a ninche.

⁴⁹Ore apa ilayiok le Saul naa Yonatan o Ishfi o Malkishua; ore inkarn oo ntoyie enyena pokira are ninche kuna; eji ina kikau Merab, neji ina kiti Mikal;

⁵⁰neji enkitok e Saul Ahinoam, entito e Ahimaas. Neji olkitok lenye le Njore Abna olayioni le Ner, olenkapu le Saul;

⁵¹Kish apa menye le Saul, ore Ner menye le Abna naa olayioni apa le Abiel.

⁵²Eetae apa olarrabal ogol too Lfilisti too nkolong'i pooki e Saul, naa ore ake pee edol Saul oltung'ani ogol, aashu oltung'ani opi, neitinyikaki ninye kewan enye.