Read Maasai Bible – Biblia Sinyati 1 Samuel 15 Bible Online

1 Samuel 15 - Maasai Bible – Biblia Sinyati bible

1 Samuel 15

¹Nejoki Samuel Saul, “Olaitoriani apa laairriwua nanu maatubukoki eilata aput pee iaku olaiguanani te shumata iltung'ana lenyena Isiraeli; ore naa taata toning'o irorei lo Laitoriani.

²Inji ejo Olaitoriani loo lororani, ‘Kaitame nanu ina naitaasa Ilamaleki Israel teina naibooitie ninche te nkoitoi, apa eilepu eing'uaa Misiri.

³Shomo taata taara Amalek, inyala tukul nena pooki naata ninche; mileku ninche, kake taara metua oltung'ani pooki olee o enkitok, enkerai kiti o enanakita, olkiteng o enker, entames o sikiria.’ ”

⁴Neaku eipoto Saul iltung'ana neiken ninche te Telaim, netii apa iltung'ana oopuo too nkejek inkalifuni iip are, o nkalifuni tomon oo ltung'ana le Yuda.

⁵Nelotu Saul enkanasa oo Lamaleki neirrag arresh to erata.

⁶Nejoki Saul Ilkeni, “Entudumunye, enchom entadoi enchom entung'uai Ilmaleki, mamut ake nanu intae te nebo ninche; amu intodolutua apa intae esupatisho too ltung'ana pooki le Israel apa pee epuonu aailepu aapuku aaing'uaa Misiri.” Neaku etudumunye Ilkeni aapuku tiatua Ilameleki.

⁷Nemir Saul lelo Amaleki ebaiki Hafila o meshomo aabaiki Shur, aa ninye oloo saen le Misiri.

⁸Neibung Agag ilo aiguanani loo Lamaleki eishu, nemut tukul iltung'ana pooki te nepi o lalem.

⁹Kake etelekutua Saul o iltung'ana Agag, o nkerra sidain oleng o lmong'i o lasho o lkuoo le kerra o pooki nara sidai, neitu eyieng ninche amut; ore ina pooki apa nameni naa pesho neidaikie ninche tukul.

¹⁰Nelotu ororei lo Laitoriani enetii Samuel ejo:

¹¹“Airridua nanu pee aitaa Saul olaiguanani; amu eibelekenye ninye ashuko aing'uaa esujata ai, neitu eas inkitanapat aainei.” Netagore apa Samuel neishiraki ninye Olaitoriani enkewarie pooki.

¹²Neinyototo Samuel ayooki pee enang'are Saul tadekenya; netiaakaki apa Samuel, “Eewuo Saul Karmel, neteshetaka kewan esoit nadamunyeki neitoki ashuko, nelo agiroo, nedoyio alo Gilgal.”

¹³Nelotu Samuel enetii Saul, nejoki Saul ninye, “Mikitamayiana Olaitoriani; ataasa nanu enaaitanapa Olaitoriani.”

¹⁴Neitoki Samuel ajo, “Kainyoo naa ena orui oo nkerra too nkiyiaa aainei, o nkipurrot oo lmong'i naning'ito nanu?”

¹⁵Nejo Saul, “Eyautua ninche too Lamaleki; amu etelekutua iltung'ana nkerra sidain o lmong'i, pee epolosaki Olaitoriani Enkai; ore inkulie nikitumuta iyiook tukul.”

¹⁶Neitoki Samuel ajoki Saul, “Tigirayu! Ekaaliki nanu enaatiaaka Olaitoriani ena kewarie.” Nejoki Saul ninye “Tolimu.”

¹⁷Nejo Samuel, “Ore hoo nira oti too nkonyek inono, aimira iyie endukuya oo loshon le Israel? Kitubukoko iyie Olaitoriani eilata aput aitaa olaiguanani le Israel.

¹⁸Nikirriwayie iyie Olaitoriani esiaai, nejo, ‘Shomo, indaikie lelo aing'okok, Ilamaleki, niarare ninche o metaba anaa neishunye.’

¹⁹Kainyoo naa pee eitu ining oltoilo lo Laitoriani? Kainyoo pee ikuetikia nena tokitin nitaarutua, niaas embae torrono too nkonyek o Laitoriani.”

²⁰Nejoki Saul Samuel, “Atoning'o oltoilo lo Laitoriani, ashomo nanu esiaai naa ninye aairriwayie Olaitoriani, ayawua Agag olaiguanani le Amalek, natumuta aidaikie Ilmaleki.

²¹Kake eyautua iltung'ana nena tokitin naataarutua, nkerra o lmong'i, nena tokitin sidain apa naatejoki keidaikieki pee epolosaki Olaitoriani Enkai ino te Gilgal.”

²²Nejo Samuel, “Amaa keeta Olaitoriani enchipai sapuk too lasarri oopejori o nkishoorot, anaa te nening'i oltoilo lo Laitoriani? Ng'ura aisidai ening'unoto alang olasar, o enkinining'oto alang ilmeregeshi oopir.

²³Amu etiu empaasharoto anaa esakutore, ore engolon e nkong'u naa esuujisho anaa eseremata oo ntokitin neme Enkai. Ore te nkaraki nitanya ororei lo Laitoriani, kitanya sii ninye iyie pee miaku olaiguanani.”

²⁴Nejoki Saul Samuel, “Ataasa nanu eng'oki; amu atigila nanu enkitanapata o Laitoriani o rorei linono, amu aturia nanu iltung'ana naning oltoilo lenye.

²⁵Ore naa taata, aatoomono nanu, tapalikiaki eng'oki ai, nirrinyo te nebo nanu, pee atum nanu ateserema Olaitoriani.”

²⁶Nejoki Samuel Saul, “Marrinyo nanu te nebo o iyie; amu itanya iyie ororei lo Laitoriani, nikitanya iyie Olaitoriani pee miaku olaiguanani te Israel.”

²⁷Ore eshuko Samuel alo aing'uaa, neibung Saul olcholoi lo lkila lenye, nepolosa.

²⁸Nejoki Samuel ninye, “Etopolosayie Olaitoriani enkitoria e Israel te iyie ena olong, neishoo ninye olelatia ino, laa ninye osupat likilang iyie.

²⁹Ore sii Ilo ora Enkitoo e Israel nemelejisho aashu eirridu; amu mme oltung'ani ninye, metaa keirridu.”

³⁰Nejo ninye, “Ataasa nanu eng'oki; ore eyia; iyanyitaki taata te dukuya ilpayiani loo ltung'ana laainei o te dukuya Israel, nirrinyo te nebo nanu, pee atum nanu ateserema Olaitoriani Enkai ino.”

³¹Nerrinyo Samuel asuj Saul; neserem Saul Olaitoriani.

³²Neitoki Samuel ajo, “Iyau ene natii nanu Agag, ilo aiguanani loo Lamaleki.” Nelotu Agag enetii ninye eshipa. Nejo Agag, “Kesipa etulusoyie emion e keeya.”

³³Nejo Samuel, “Ore anaa enatooruo olalem lino inkituaak inkera, keaku sii ninye taata ng'utunyi enemeeta enkerai tiatua inkituaak.” Nedung Samuel Agag aitaa indung'ot te dukuya Olaitoriani te Gilgal.

³⁴Neitoki Samuel alo Rama; nelo Saul enkaji enye te Gibea e Saul.

³⁵Neitu ae kata eitoki Samuel adol Saul o metabau enkolong e keeya enye, kake eishiraka Samuel Saul. Neinosu Olaitoriani pee eitaa Saul olaiguanani le Israel.