Read Maasai Bible – Biblia Sinyati 1 Samuel 16 Bible Online

1 Samuel 16 - Maasai Bible – Biblia Sinyati bible

1 Samuel 16

¹Nejoki Olaitoriani Samuel, “Inchiraki kenya Saul o anu, idolita ajo atanya nanu ninye pee meitoki aaku olaiguanani te Israel? Imputa ina mowuo eilata nilo; kaairriwaa nanu iyie enetii Yese, ilo Betlehemi, amu aing'uraka nanu kewan ai olaiguanani tiatua ilayiok lenyena.”

²Nejo Samuel, “Kaji nanu aiko te nalo? Te nening Saul ina naa kaar nanu matua.” Nejo Olaitoriani, “Iwa enkashe te nebo iyie nijo, ‘Aewuo pee apolosaki Olaitoriani olasar.’

³Nintoomon Yese meeu olasar, naa kaaitadol eniaas; nibukoki iyie eilata aput ilo laaipotoki enkarna enye.”

⁴Neas Samuel ina naitanapa Olaitoriani, nelotu Betlehem. Nepuonu ilpayiani le nkanasa eikirikira aanang'are ninye nejo, “Ilotu iyie te seriani?”

⁵Nejo ninye, “Te seriani; aewuo nanu apolosaki Olaitoriani; entisinya ate, nipuonunu te nebo nanu olasar.” Neitisiny ninye Yese o layiok lenyena, neitoomon ninche to lasar.

⁶Ore pee ebau ninche, neing'or ninye Eliab, nedamu ajo, “Esipa etii ilo otubukoko Olaitoriani eilata aput dukuya.”

⁷Kake etiaaka Olaitoriani Samuel, “Ming'or enaikununo ninye aashu enkadoro enye o lkitashei lenye, amu atanya nanu ninye; amu meing'or Olaitoriani anaa enaing'or oltung'ani, keing'or oltung'ani enaikununo oriong, kake oltau eing'or Olaitoriani.”

⁸Neitoki Yese aipot Abinadab, neisho ninye metogiroi te dukuya Samuel. Nejo ninye, “Eitu sii egelu Olaitoriani ele.”

⁹Neitoki Yese aisho Shamas metogiroi. Nejo ninye, “Eitu sii egelu Olaitoriani ele.”

¹⁰Neisho Yese ilayiok lenyena pokira oopishana metogiroi te dukuya Samuel. Nejoki Samuel Yese, “Eitu egelu Olaitoriani kulo.”

¹¹Nejoki Samuel Yese, “Ketii ilayiok linono pooki ene?” Nejo ninye, “Etiooyo ilo oti, kake etii ninye ntare.” Nejoki Samuel Yese, “Irriwai olkilikuai metorikuni ninye; amu mikitoni iyiook o metaba anaa nelotu ninye ene.”

¹²Neirriwaa ninye olkilikuai, nerikuni ninye aaitijing'u. Naa kenyokie apa ninye newang inkonyek enyena, neikishiaan. Nejo Olaitoriani, “Tudumunye, tubukoki ninye eilata; amu ninye ele.”

¹³Neya Samuel emowuo e ilata nebukoki Daudi eilata aput te mpolos oo lalashera lenyena; nelotu Enkiyang'et o Laitoriani te ngolon shumata Daudi ebaiki ina olong neito dukuya. Nedumunye Samuel nelo Rama.

¹⁴Nelo Enkiyang'et e Nkai aing'uaa Saul, nelotu enkiyang'et torrono naing'uaa Olaitoriani aitanyamal neisomit ninye.

¹⁵Nejoki isinkan lenyena Saul, “Kiyiolo taata aajo, kintanyamalita iyie enkiyang'et torrono naing'uaa Enkai.

¹⁶Inchoo taata olkitok lang eitanap isinkan linono ootii dukuya iyie, pee eing'oru oltung'ani oyiolo atoosho enkawuo oo sinkolioitin; ore ake pee eitoki atii shumata iyie enkiyang'et torrono naing'uaa Enkai, nerany ninye teina auo oo sinkolioitin, naa inchiu iyie.”

¹⁷Neaku etiaaka Saul isinkan lenyena, “Entorikokoki nanu oltung'ani oyiolo ataranya oleng, nirikuku ninye ene natii.”

¹⁸Newal obo loo lbarnot ajo, “Ng'ura, atoduaa nanu olayioni le Yese le Betlehem, laa kaarriyia te ranyare, oltung'ani opi, naa oltung'ani lo larrabal, arriyia te nkiroroto naa oltung'ani le nkishaa sidai; netii Olaitoriani te nebo ninye.”

¹⁹Neaku eirriwayie Saul ilkiliku enetii Yese nejo, “Irriwakaki nanu Daudi, olayioni lino, laa ninye otii intare.”

²⁰Neitayu Yese olkurrarru onap imukateni, olbene lo lchoni le naisho, o lkuoo le kine, neirriwaa ninche te Daudi, olayioni lenye, airriwaki Saul.

²¹Nelotu Daudi enetii Saul, nejing enkisiaayiare enye. Nenyorru Saul ninye oleng; neaku ninye olanapani lenye loo masaa o larrabal.

²²Neirriwaki Saul olkilikuai Yese, ejo, “Inchoo Daudi eton te nkisiaayiare ai, amu enoto ninye omom too nkonyek aainei.”

²³Naa ore ake pee elotu enkiyang'et torrono naing'uaa Enkai shumata Saul, nedumu Daudi enkawuo oo sinkolioitin neosh te nkaina enye; neaku eitagoloki apa Saul, nesupatu, neing'uaa ninye ina kiyang'et torrono.