Read Maasai Bible – Biblia Sinyati 1 Samuel 18 Bible Online

1 Samuel 18 - Maasai Bible – Biblia Sinyati bible

1 Samuel 18

¹Ore ake pee eidip airorie Saul, neibung'a oltau le Yonatan oltau le Daudi, nenyorru Yonatan ninye anaa oltau lenye kewan.

²Nerik Saul ninye ina olong, nemeisho ninye metushukoyu alo enkang enye.

³Nenya Yonatan olmumai lo sotua te nebo Daudi, te nkaraki apa nanyor ninye anaa oltau lenye kewan.

⁴Neitayu Yonatan olkila apa oishopito neisho Daudi, o masaa enyena, o lalem lenye o enkawuo o enkeene e mpolos enye.

⁵Naa ore ake te neipang Daudi alo eneba anaa eneirriwayie Saul nedupoyu; neaku etipika ninye Saul shumata iltung'ana le njore. Naa aisidai apa ina too nkonyek oo ltung'ana pooki o too nkonyek sii oo sinkan le Saul.

⁶Ore egira aapuonu ang, ina kata pee eshukunye Daudi eing'uaa esesekuanata e ilo Filisti, neipang'u inkituaak aapuonu too nkanas pooki e Israel, eranyisho neiguran pee enang'are olaiguanani Saul, too ntampurini o too sinkolioitin le ng'ida o too nkinantani oo sinkolioitin.

⁷Neranyakino inkituaak maate neshipakino ejo, “Etasesekuana Saul inkalifuni enyena, nesesekuan Daudi inkalifuni tomon enyena.”

⁸Negoro Saul oleng, ore ena kiroroto neitu eitiship ninye; nejo ninye, “Eterrepakita ninche Daudi inkalifuni tomon, ore nanu naaterrepakita inkalifuni; kainyoo ae naitoki ninye aata meteleku enkitoria?”

⁹Neduaaki Saul Daudi olom ebaiki ina olong neito dukuya.

¹⁰Ore pee ekenyu nelotu enkiyang'et torrono naing'uaa Enkai nejing atua Saul, neiyiang'iyiang ninye tiatua enkaji enye, eoshito Daudi enkawuo oo sinkolioitin, anaa ake. Neeta apa Saul empere te nkaina enye;

¹¹neng'oroo Saul empere amu etejo ninye, “Kapudaki nanu Daudi esuntai.” Kake etapaashare Daudi ninye katitin are.

¹²Keure apa Saul Daudi, amu etii Olaitoriani te nebo ninye kake etung'uayie Saul.

¹³Neaku eiwuang'ie Saul ninye teine netii, neitaa ninye olkitok le nkalifu neipang alo nelo dukuya iltung'ana.

¹⁴Netum Daudi dupoto te nena pooki apa naataasa; amu etii Olaitoriani te nebo ninye.

¹⁵Ore ake pee edol Saul nchere enoto ninye dupoto sapuk, neureyu ninye.

¹⁶Kake ore Israel pooki o Yuda pooki naa kenyor apa Daudi amu eshomo apa ninye aipang nejing'u atua te dukuya ninche.

¹⁷Nejoki Saul Daudi, “Nena entito ai botor Merab; kaaisho nanu iyie pee intaa enkitok; kake tudupayu te nanu niarisho too larrabali lo Laitoriani.” Amu etejo Saul, “Mincho enkaina ai eaku shumata ninye, kake nchoo enkaina oo Lfilisti eaku shumata ninye.”

¹⁸Nejoki Daudi Saul, “Kara nanu ng'ae, naa kainyoo olmarei lai, olmarei le papaai te Israel, metaa kaaku nanu olaputani lo laiguanani?”

¹⁹Kake te nkata apa nataa keishori Merab, entito e Saul, Daudi, neishori ninye Adriel ilo Meholati meitaa enkitok.

²⁰Nenyor apa entito e Saul, Mikal, Daudi; neliki ninche Saul, neitiship ina toki ninye.

²¹Nejo Saul, “Intasho maishoo nanu ninye, pee etum ataa orreshet te ninye, pee etum sii enkaina oo Lfilisti ataarare ninye.” Metaa etiaaka Saul Daudi te nkata e are, “Iaku taata iyie olaputani lai.”

²²Neitanap Saul isinkan lenyena ejo, “Erorie Daudi too nkurrat nijokiki, ‘Aikishipakino iyie olaiguanani, naa aikinyor isinkan lenyena pooki; ore naa taata taa olaputani lo laiguanani.’ ”

²³Neiro isinkan le Saul lelo rorei too nkiyiaa e Daudi. Nejo Daudi, “Idolidolo intae aa entoki kiti te neaku oltung'ani olaputani lo laiguanani, idolitata aajo ara nanu oltung'ani aiterani lemening'o?”

²⁴Nejoki ninye isinkan le Saul, “Inji o nji eiroro Daudi.”

²⁵Neitoki Saul ajo, “Entoliki Daudi ijokiki, ‘Meyieu olaiguanani entoki e nkaputi meteleku isuaaten iip oo Lfilisti pee etum aitalaku elap too lmang'ati lo laiguanani.’ ” Naa kejo apa Saul pee eisho Daudi metua te nkaina oo Lfilisti.

²⁶Ore ake eliki isinkan lenyena Daudi kulo rorei, neitiship Daudi ina neaku olaputani lo laiguanani. Ore eton eitu eishunye enkata,

²⁷nedumunye Daudi nelo, te nebo iltung'ana lenyena, near metuata Ilfilisti iip are; neyau Daudi isuaaten enye, naaishooki apa te siana nalulung'a olaiguanani, pee etum ninye ataa olaputani lo laiguanani. Neisho Saul ninye ina tito enye Mikal meitaa enkitok.

²⁸Kake ore ake pee edol Saul neyiolou ajo etii Olaitoriani te nebo Daudi, o nchere kenyor Isiraeli pooki ninye,

²⁹neponari Saul aureyu Daudi oleng. Neaku etaa apa Saul olmang'atinta le Daudi anaake.

³⁰Neitoki ilkituaak loo Lfilisti aaipang'u aapuonu olarrabal, naa ore ake anaa te nepuonu netum Daudi dupoto sapuk alang isinkan pooki le Saul; neaku yioloti enkarna enye oleng.