Read Maasai Bible – Biblia Sinyati 1 Samuel 2 Bible Online

1 Samuel 2 - Maasai Bible – Biblia Sinyati bible

1 Samuel 2

¹Neitoki Hana aomon nejo, “Keshipakino oltau lai Olaitoriani; eitaaki kitok engolon ai to Laitoriani. Etaboloki enkutuk ai, matakueniki ilmang'ati laainei, amu kang'idakino nanu enjeunoto ino.

²“Metii likae sinyati anaa Olaitoriani. Metii likae leme iyie, metii endapidapoi nanyaanyukie, Enkai ang.

³Emintoki aairo aabuaku to lwuasa, emincho enkitokoos eimu inkutukie inyi; amu ore Olaitoriani naa Enkai e ng'eno, naa te ninye eineneng'i iasat.

⁴Etigilate inkai e lelo magil. Kake eitagoloki lelo ooshal.

⁵Ore lelo apa ooiputakinote neisilenoitie ate pee etum endaa, kake ore lelo apa ooata esumashnemeekure eeta esumash. Etoiuo ina apa olupi inkera naapishana, kake ore ina apa naata inkera kumok nemeekure eeta.

⁶Olaitoriani oar metua naa ninye oitopiu. Eitadou ninye aya enemeneng'a neilepunye.

⁷Olaitoriani oitaa aisinani naa ninye oitaa karsis. Ninye oitadou, ninye sii oilepie.

⁸Ninye odumu olaisinani aitung'uaa enterit. Nedumu ilaisinak aitung'uaa olchala loo nkuruon. Neitoton ninche te nebo lelo kituaak nejung olorika le nkanyit. Amu ore ing'apeta e nkop naa ino Laitoriani naa shumata ninche eiteleikia enkop.

⁹“Kerrip ninye inkejek e lelo ooisiligayu lenyena. Kake keiturrarri lelo arruok tiatua enaimin; amu mme te magilanisho eisulu oltung'ani.

¹⁰Ore lelo mang'ati lo Laitoriani naa kegiligili aaitaa mbelibelat, kegilunore ninche naa kedaraki ninche te keper. Kedung'oki Olaitoriani enkiguana ineeiting'ie enkop, neisho ninye engolon ilo aiguanani lenye, neilepie ninye engolon eilo lenye otubukokoki eilata aaput.”

¹¹Nelo Elkana ang te Rama. Neisiaai ina ayioni Olaitoriani teine netii Eli ilo apolosani.

¹²Ore apa lelo ayiok le Eli naa iltung'ana le pesho; meyanyit apa ninche Olaitoriani.

¹³Ore apa olkuaak loo lapolosak loo ltung'ana naa nchere te neitayu pooki ng'ae olasar, nelotu osinka lo lapolosani, eton eitokitok inkiri, eeta enkisuret oo lala okuni te nkaina enye,

¹⁴neisuroki ina kisuret atua entereet aashu ene mbakuli aashu emoti oo nkulupuok aashu ae toki; ore ina pooki nayau ina kisuret neya olapolosani makewan. Neas ninche ina te Shilo too Siraeli apa ooetuo ine.

¹⁵Ore ake sii, eton eitu epeji eilata, nelotu osinka lo lapolosani nejoki ilo tung'ani oitayio olasar, “Nchoru inkiri o lapolosani naapeji. Amu meng'amaa ninye inkiri naayiara te iyie, kake inaajon ake.”

¹⁶Naa te nejoki ilo tung'ani ninye, “Inchoo ninche eng'as aapej eilata, pee intoki aya inaaba anaa iniyieu,” nejo ninye, “A'a, iyau tena kata; naa te neme neijia, naya nanu te ngolon.”

¹⁷Ei sapuk apa ina ng'oki e lelo barnot oleng te dukuya Olaitoriani amu eitu eyanyit lelo tung'ana olasar lo Laitoriani.

¹⁸Keisiaaisho apa Samuel te dukuya Olaitoriani, ina ayioni eishopito enkila sidai dorrop.

¹⁹Naa keripaki apa ng'otonye oloti kila neyaki ninye te pooki ari, te neilep alo te nebo olpayian lenye epuo aaitayu olasar lo lari.

²⁰Nemayian Eli Elkana o enkitok enye, nejoki ninye, “Mikinchoo iyie Olaitoriani inkera tena kitok teina sile apa naisilenoki ninye Olaitoriani,” neitoki ninche aashuko aapuo enkang enye.

²¹Neitoki Olaitoriani amayian Hana, nenutayu ninye neiu ilayiok okuni o ntoyie are. Nebulu ina ayioni Samuel te dukuya Olaitoriani.

²²Etamorua apa Eli oleng ina kata, nening ninye nena pooki naaitaasita ilayiok lenyena Israel pooki, neboitare ninche nena kituaak naasisho te kutukaji e ilo ng'obor le ntumo.

²³Nejoki ninye ninche, “Kainyoo pee iasiasa kuna baa? Amu atoning'o nanu iasat inyi torrok too ltung'ana pooki.

²⁴A'a, ilayiok laainei, ime lomon supati lelo latoning'o iltung'ana eidapashaa.

²⁵Te neas oltung'ani eng'oki tialo oltung'ani neitobiraki Enkai osotua, kake amaa teneas oltung'ani eng'oki tialo Enkai, kaing'ae namitu ninye.” Kake mening ninche oltoilo le papaai lenye; amu eyieunoto apa o Laitoriani pee ear ninche metuata.

²⁶Nebulu ina ayioni Samuel to sesen netum omom to Laitoriani o too ltung'ana.

²⁷Nelotu oltung'ani le Nkai enetii Eli, nejoki ninye, “Inji ejo Olaitoriani, ‘Aitodolua apa nanu kewan te nkaji e papaai lino apa etii ninche Misiri, eisiaaisho te nkaji e Farao.

²⁸Nagelu nanu ninye tiatua iloshon pooki le Israel pee eaku olapolosani lai, pee eilep alo olperere lai lo lasar, apej enkorropil, neishop ina kila dorrop te dukuya nanu; naisho nanu enkaji e papaai lino ilasarri pooki le nkima ooing'uaa iltung'ana le Israel.

²⁹Kainyoo naa pee ing'or too nkonyek o lorok lelo asarri laainei o nkishoorot aainei apa naitanapishe, niyanyitu ilayiok linono aitalang nanu, intopiro ate too rubat nigelulu te pooki kishooroto oo ltung'ana laainei Israel?’

³⁰Ore te nkaraki ena eibalunye Olaitoriani Enkai oo Siraeli: Aitisipa nanu inchere, ore enkaji ino o enkaji e papaai lino naa kejing atua neipang te dukuya nanu intarasi; kake eibalunye taata Olaitoriani; Metalakuana ena te nanu; amu ore lelo laayanyit nanu nayanyit si nanu, ore lelo laamen nanu neitololoikini.

³¹Ng'ura ajo kepuonu inkolong'i, pee adung nanu engolon inyi o engolon e nkaji e papaai lino, metaa meitoki atii oltung'ani kitok atua enkaji ino.

³²Ore to sina ning'or iyie te nkong'u o lom ina karsisisho pooki nayookini aaisho Israel; nemeitoki aekata atii oltung'ani kitok atua enkaji ino intarasi.

³³Ore oltung'ani te intae leitu aiwuang'ie aitung'uaa olperere lai lo lasar nelekuni pee eishir inkonyek enyena neisinanuo oltau lenye; ore emponaroto pooki e nkaji ino neye to lalem loo ltung'ana.

³⁴Naa ore ena nadoiki ilayiok linono pokira oaare, Hofni o Finehas neaku olmonekie te iyie! Keye ninche pokira te nkolong nabo.

³⁵Nadumaki nanu kewan olapolosani supat, oas ninye te risioroto e ina natii atua oltau lai o atua endamunoto ai; nashetaki nanu ninye enkaji nasipa, nejing'u ninye neipang boo te dukuya ilo gelunoti lai intarasi.

³⁶Ore pooki ng'ae oing'uari tiatua enkaji ino nelotu airrugo asai ninye te nkosholai nabo aashu emukate, naa kejo; Tipikaki nanu aatoomono iyie, atua ewueji nabo oo lapolosak, pee atum ainosa embelati e mukate.”