Read Maasai Bible – Biblia Sinyati 1 Samuel 20 Bible Online

1 Samuel 20 - Maasai Bible – Biblia Sinyati bible

1 Samuel 20

¹Neitoki Daudi aisik aing'uaa Naios te Rama, nelotu ajoki Yonatan, “Kainyoo nanu ataasa? Kainyoo entorroni ai? Naa kainyoo eng'oki ai te dukuya papaai lino, metaa keing'oru ninye enkishui ai?”

²Nejoki Yonatan ninye, “Metalakuana ina! Miye iyie. Ng'ura, meas papaai toki aa kitok o aa kiti eitu aaimakinye nanu; naa kainyoo naa pee aamikinye nanu papaai ena? Mme neijia etiu.”

³Kake etawalikia Daudi ajoki, “Keyiolo papaai lino oleng nchere anoto nanu omom too nkonyek inono; nejo ninye, ‘Mincho Yonatan eyiolou ena, pee megoro ake.’ Kake kesipa, anaa enaishu Olaitoriani o anaa enaishu oltau lino, eroruata nabo ake natii erishata nanu o keeya.”

⁴Neitoki Yonatan ajoki Daudi, “Ore pooki nijo, naaitaas nanu iyie.”

⁵Nejoki Daudi Yonatan, “Ng'ura, olapa ng'ejuk taisere, nemajoyio nanu eitu aton te misa te nebo olaiguanani, kake nchooki nanu mashomo, pee atum aisudoi kewan ti ong'ata o metabau enkolong e uni teipa.

⁶Te naalau nanu papaai lino tukul, nijoki, ‘Etasaishe Daudi aomonu pee ekuet alo Betlehem, enkanasa enye; amu etii ine olasar anaake to lari to lmarei pooki.’

⁷Te nejo ninye, ‘Aisidai!’ Nesidanu to sinka lino; kake te negoro ninye, nitum atayiolo ajo eitobirita ninye entorroni.

⁸Neaku intaasa osinka lino te supatisho, amu iyaua osinka lino atua olmumai osinya lo sotua te nebo iyie. Kake te netii entorroni atua nanu, taaraki iyie nanu; amu kainyoo paa papaai lino kiyaki?”

⁹Nejo Yonatan, “Mikitalama kuna! Amaa naaji tenaa kayiolo nchere eitobirita papaai entorroni pee elotu shumata iyie, aimaaliki nanu iyie?”

¹⁰Neitoki Daudi ajoki Yonatan, “Kaing'ae laaliki nanu tenaa eikiwaliki papaai lino te nkisikong'ota?”

¹¹Nejoki Yonatan Daudi, “Wou, maipang'a aapuo ong'ata.” Neaku eipang'a pokira oaare aapuo ong'ata.

¹²Nejoki Yonatan Daudi, “Metaa Olaitoriani, Enkai oo Siraeli shakeni! Te naimakinye nanu papaai lai tena rishata taisere, aashu te nkolong e uni, ng'ura, tenaa esidai ninye tialo iyie, aimairriu nanu olkilikuai pee aaitayiolo iyie.

¹³Kake te nelo neaku keitiship papaai lai pee kintaas iyie entorrono, metaasa sii Olaitoriani ina te Yonatan, neitulusoo sii te nemaaitayiolo nanu, areu iyie shomo, pee itum ashomo te seriani. Metaa Olaitoriani te nebo iyie, anaa enataa te nebo o papaai lai.

¹⁴Te neton nanu aishu, intoduaaki nanu enyorrata nemeibelekenya o Laitoriani, pee maye nanu;

¹⁵nimidung esupatisho ino aitung'uaa enkaji ai intarasi. Te neiwuang'ie Olaitoriani adung'oo pooki ng'ae loo lmang'ati le Daudi aiwuang'ie ti oriong e nkop,

¹⁶mincho enkarna e Yonatan edung'ori aaitung'uaa enkaji e Daudi. Naa meitalaku Olaitoriani elap too lmang'ati le Daudi.”

¹⁷Neitoki Yonatan ainosie Daudi olmumai aigil tialo enyorrata enye te ninye; amu kenyor apa ninye anaa enanyor oltau lenye.

¹⁸Neitoki Yonatan ajoki ninye, “Ore taisere naa olapa ng'ejuk; naa eikilai iyie, te nkaraki nemetii toki olorika lino.

¹⁹Ore te nkolong e uni naa eikilai iyie oleng; neaku shomo ewueji apa nisudoriyie kewan aa torrok mbaa, niton te mbata oo soito oosoto.

²⁰Naa kang'oroo nanu mbaa uni embata enye anaa duoo kaata entoki nang'orito.

²¹Naa ng'ura, kairriu nanu enkerai, ajoki, ‘Shomo, ing'oru mbaa.’ Ore ake pee ajoki enkerai, ‘Ng'ura ena shoto ino etii mbaa, iyau ninche’; nilotu iyie, amu, ore anaa enaishu Olaitoriani, keserian te iyie nemetii embatisho.

²²Kake te najoki nanu ilo barnoti, ‘Ng'ura etii mbaa teidia alo iyie;’ shomo, amu Olaitoriani likirriwayie iyie shomo.

²³Ore tialo ina bae nikiimakitia nanu o iyie, ng'ura, etii Olaitoriani erishata iyie o nanu intarasi.”

²⁴Neaku eisudoyie Daudi kewan tiatua enkurma; ore ake pee elotu olapa ng'ejuk, neton olaiguanani anya endaa.

²⁵Neton olaiguanani to lorika lenye, anaa too nkulie katitin, to lorika otii embata e suntai; neton Yonatan aipirakinore, neton Abna atashare Saul kake keisiu ewueji e Daudi.

²⁶Ore eyia eitu ejo Saul ae ina olong; amu etejo ninye, “Keeta ake enaanoto ninye; mesinya ninye, kesipa mesinya ninye.”

²⁷Kake ore te nkolong e are, taisere e tulusoyie olapa ng'ejuk, neisiu ake ewueji e Daudi. Nejoki Saul Yonatan, olayioni lenye, “Kainyoo pee eitu elotu olayioni le Yese anya endaa, ng'ole aashu taata?”

²⁸Newaliki Yonatan Saul ajoki, “Aatasayia nanu Daudi aomonu pee elo Betlehem;

²⁹etejo ninye, ‘nchooki nanu mashomo; amu eeta olmarei lang olasar tiatua enkanasa, naaitanapa nanu olalashe lai pee atii ine. Neaku taata, te nanoto nanu omom too nkonyek inono, nchooki mashomo, pee adol ilalashera laainei.’ Te nkaraki ena eitu ninye elotu emisa o laiguanani.”

³⁰Neyupuyup engoro e Saul tialo Yonatan, nejoki ninye Yonatan “Iyie olayioni le nkitok modai nemening'isho, aimayiolo nanu ajo itegelua iyie olayioni le Yese te nkurruna ino makewan, o te nkurruna e masipaisho e ng'utunyi?

³¹Amu ore anaa enaishu olayioni le Yese ti oriong enkop, mibul iyie nemebul enkitoria ino. Metaa irriwai olkilikuai niyau ninye enatii, amu kesipa keye ake.”

³²Neitoki Yonatan awaliki Saul, papaai lenye ajoki, “Kainyoo pee eari ninye metua? Kainyoo etaasa ninye?”

³³Kake etang'oroyie Saul empere enye ajo ang'or ninye; neaku etayiolo Yonatan nchere enyokita apa papaai lenye ajo aar Daudi metua.

³⁴Nedumunye Yonatan aing'uaa emisa te ngoro napi neitu enya endaa te nkolong e are o lapa, amu eishirieki te nkaraki Daudi, te nkaraki naitukurrua papaai lenye ninye.

³⁵Ore tadekenya neipang Yonatan alo atua enkurma ewueji netoning'okinote o Daudi, nelo te nebo ninye enkiti ayioni.

³⁶Nejoki ninye enkerai enye, “Kueta ing'oru nena baa natang'oroyie nanu.” Ore ekuet enkayioni neng'oroo Yonatan embae teidia alo ninye.

³⁷Ore ake elotu enkayioni ewueji netii ina bae natang'oroyie Yonatan, neipot Yonatan enkayioni nejoki,

³⁸“Aimetii embae teidia alo iyie?” Neipot Yonatan enkayioni, “Tasiooi, isarisara, miton.” Neaku etasotuo enkayioni e Yonatan mbaa, nelotu enetii olkitok lenye.

³⁹Kake meyiolo apa ina ayioni ae toki; Yonatan ake o Daudi ooyiolo ina bae.

⁴⁰Neisho Yonatan imasaa enyena olarrabal ina ayioni nejoki ninye, “Shomo iwa ninche enkanasa.”

⁴¹Ore eidipa enkayioni ashomo nedumunye Daudi te mbata oo soito oorupa, nebatata ninye te nkomom enye abaiki enkop, neirrugo katitin uni; neng'ututa maate, neishirakino maate, o metaba anaa neyagaa Daudi.

⁴²Neitoki Yonatan ajoki Daudi, “Shomo te seriani, amu ore anaa enikinosa olmumai iyiook pokira te nkarna o Laitoriani, kijo, Olaitoriani otii erishata nanu o iyie, o erishata e ishoi ai o eshoi ino, intarasi.” Nedumunye Daudi ninye nelo; nelo Yonatan ajing enkanasa.