Read Maasai Bible – Biblia Sinyati 1 Samuel 21 Bible Online

1 Samuel 21 - Maasai Bible – Biblia Sinyati bible

1 Samuel 21

¹Nelotu Daudi Nob enetii Ahimelek olapolosani; nelotu Ahimelek anang'are Daudi eikirikira, nejoki ninye, “Kainyoo paa iyie openy, nemetii hoo obo te nebo iyie?”

²Nejoki Daudi Ahimelek ilo apolosani, “Aairriwayie nanu olaiguanani te mbae naje, naajoki nanu, ‘Mincho ake hoo ng'ae eyiolou ae toki ena bae naa ninye aairriwarie, naa ninye aaitanapa iyie.’ Aata nanu ndung'eta oo lbarnot te wueji neje.

³Ore naa, kainyoo iata? Nchooki nanu imukateni imiet, aashu entoki naba anaa enatii ene.”

⁴Newaliki ilo apolosani Daudi ajo, “Maata nanu imukateni e oshi ake tene, kake etii imukateni naasinya, te neitalama ake duoo ninche ilbarnot ate nkituaak.”

⁵Newaliki Daudi ilo apolosani ajo, “Ore te sipata eitalamayioki apa nkituaak te iyiook anaa oshi ake te nalo te nkisiaayiare eisinyat imasaa oo lbarnot, hoo duoo ninye tenaa elototo e oshi ake; kebaa naa taata aa sinyat imasaa enye?”

⁶Neaku eishoo olapolosani ninye emukate nasinya, amu metii apa emukate ine meteleku ake ina mukate nasinya, naa ninche eiwuang'ieki aaitung'uaa dukuya o Laitoriani, pee eitapaashikini imukateni naairowua ina olong naawaki.

⁷Netii apa oltung'ani oje loo sinkan le Saul ine ina olong, oikenoyioki te dukuya o Laitoriani; ore apa enkarna enye naa Doeg le Edom, olkitok loo lchekuti le Saul.

⁸Nejoki Daudi Ahimelek, “Amaa aimiaata iyie empere aashu olalem tene? Amu eitu duoo ayau olalem lai aashu empere ai te nebo nanu, te nkaraki naa ore enkisiaayiare o laiguanani neyieu enkisarrisar.”

⁹Nejo olapolosani, “Ore olalem le Goliat ilo Filisti litara apa to oerata le Ela, ng'ura, etii ene eirina te nkarasha ti oriong enkila dorrop; tenaa iya ilo, iwa, amu metii likae kake ele ake.” Nejo Daudi, “Meetae likae laaijo ilo; nchooki nanu.”

¹⁰Nedumunye Daudi neisik ina olong ailany Saul, nelo enetii Akish olaiguanani le Gas.

¹¹Nejoki ninye isinkan le Akish, “Aime Daudi ele olaiguanani le nkop? Keitu ninche eranyakino maate tialo ninye too sinkolioitin ejo: ‘Etasesekuana Saul nkalifuni enyena, Ore Daudi naa nkalifuni tomon enyena?’ ”

¹²Neya Daudi kulo rorei to ltau, neureyu oleng Akish ilo aiguanani le Gas.

¹³Neaku eibelekenya ninye olkuaak lenye te dukuya ninche, neitaakuno ko ltung'ani omoda, too nkaik enyena, nekord mbaoi oo milankoni e kishomi, neisho nkamulak edou aapuo olmunyei lenye.

¹⁴Nejoki Akish isinkan lenyena, “Eng'ura aajo kemoda ele tung'ani; kainyoo naa pee iyautua intae enatii?

¹⁵Aimaata nanu iltung'ana oomoda, pee iyautua ele tung'ani metaasa emodaisho te dukuya nanu? Kelotu ele tung'ani atua enkaji ai?”