Read Maasai Bible – Biblia Sinyati 1 Samuel 26 Bible Online

1 Samuel 26 - Maasai Bible – Biblia Sinyati bible

1 Samuel 26

¹Nepuonu Ilsifi enetii Saul te Gibea, nejo, “Aimeisudori Daudi to ldoinyo le Hikila, otii enchoto o loo saen le Yeshimon?”

²Neaku etudumunye Saul nedoyio alo ong'ata e Sif, te nebo iltung'ana inkalifuni uni oogeluno le Israel, pee eing'oru Daudi ti ong'ata e Sif.

³Neitayu Saul olng'obor to ldoinyo le Hikila, otii embata enkoitoi nalala te nchoto o loosaen le Yesimon. Kake etotona Daudi to lpurkel; ore ake pee edol ajo eewuo Saul asuju ninye atua olpurkel,

⁴neirriwaa Daudi ilaikitalak, pee eyiolou aasipu ajo eewuo Saul.

⁵Nedumunye Daudi nelotu ine wueji apa netipika Saul olng'obor, nedol Daudi ine wueji neirragie Saul, te nebo Abna olayioni le Ner, olkitok le njore enye; neirragita apa Saul tiatua olng'obor nemanita enjore pooki ninye.

⁶Nejoki Daudi Ahimelek ilo Hitati; o lalashe le Yoab Abishai olayioni le Seruiya, “Kaing'ae odoyio alo te nebo nanu atua olng'obor enetii Saul?” Nejo Abishai, “Kadoyio nanu alo te nebo o iyie.”

⁷Neaku eshomo Daudi o Abishai enetii ina jore kewarie; neirragita Saul teine airura tiatua olng'obor, neunokino empere enye enkop te mbata e ndukuya enye; ore Abna o enjore neirrag aaman ninye.

⁸Nejoki Abishai Daudi, “Eishorua Enkai olmang'atinta lino apik atua enkaina ino ena olong; ore naa nchooki nanu matupudaki ninye enkop te remoto nabo e mpere, nemaitoki nanu arem ninye kat are.”

⁹Kake etiaaka Daudi Abishai, “Minyal ninye, amu kaing'ae oidim aitorioi enkaina enye metaarare ilo otubukoko Olaitoriani eilata aput, neaku meeta entioto?”

¹⁰Nejo Daudi, “Anaa enaishu Olaitoriani, kear Olaitoriani ninye; aashu elotu enkolong enye pee eye; aashu elo ninye atua olarrabal neari metua.

¹¹Metomito Olaitoriani nchere kadumu nanu enkaina ai aar ilo otubukoko Olaitoriani eilata aput; kake iwa taata ina pere natii embata endukuya enye, o ina moti e nkare, pee kipuo iyiook.”

¹²Neaku ewa Daudi empere o emoti e nkare aitung'uaa endukuya e Saul, nepuo ninche. Metii oltung'ani otoduaa ina, aashu otayiolo ina, aashu einyo hoo likae; amu keirura apa pooki, te nkaraki eetuo injo naairoishi naaing'uaa Olaitoriani shumata ninche.

¹³Neitoki Daudi alang alo lido kekun, neitashe te nelakua te nchumata o ldoinyo, etii erishata sapuk erishata enye.

¹⁴Neipot ina jore, o Abna olayioni le Ner, ejo, “Aimiwal iyie, Abna?” Newal Abna, “Ira ng'ae ilo oipot olaiguanani?”

¹⁵Nejoki Daudi Abna, “Aimira iyie olee? Kaing'ae likinyaanyukie iyie tiatua Israel? Kainyoo naa pee eitu iyie irrip olkitok lino olaiguanani? Amu eewuo obo loo ltung'ana atua pee eidaikie olaiguanani olkitok lino.

¹⁶Ore ena toki nitaasa iyie neme sidai. Anaa enaishu Olaitoriani, kinchiaakinore iyie niye, te nkaraki neitu iyie irrip olkitok ilo otubukoko Olaitoriani eilata aput. Naa ore taata ing'ura enetii empere o laiguanani, o ina moti e nkare duoo natii embata endukuya enye.”

¹⁷Neyiolou Saul oltoilo le Daudi, nejo, “Koltoilo lino ele, enkerai ai, Daudi?” Nejo Daudi, “Oltoilo lai, olkitok lai, olaiguanani.”

¹⁸Nejo ninye, “Kainyoo pee esuj olkitok lai osinka lenye? Amu kainyoo nanu ataasa? Kaa torroni natii inkaik aainei?

¹⁹Ore naa taata nchoo olkitok lai olaiguanani ening irorei lo sinka lenye. Tenaa Olaitoriani likituputuo iyie taaraki nanu, metang'amu ninye olasar; kake tenaa iltung'ana, metaa kediaa ninche te dukuya Olaitoriani, amu aataaraitie ninche aaipang'ie ena olong pee matum nanu eng'arata e njung'ore o Laitoriani, ejo, ‘Shomo isiaayia kulie aitin.’

²⁰Ore naa, mincho osarge lai ebukokino enkop te nelakuaniki ine netii Olaitoriani; amu eipang'ua olaiguanani le Israel alotu aing'oru enkishui ai, anaa oltung'ani orresh enkurle too ldoinyo.”

²¹Neitoki Saul ajo, “Ataasa nanu entorrono; tushukunye, enkerai ai, Daudi, amu maaitoki nanu aitaas iyie entorrono, amu keeta enkishui ai tipat ena olong too nkonyek inono.”

²²Neitoki Daudi awalu ajo, “Nena empere o laiguanani! Nchoo obo loo lbarnot elang'u alotu aya.

²³Ekelaaki Olaitoriani pooki tung'ani te supatisho enye o te nkisiligata enye; amu kinchorua iyie Olaitoriani apik atua enkaina ai taata, nemadumu nanu enkaina ai aarare ilo otubukoko Olaitoriani eilata aput.

²⁴Ng'ura, anaa enaata enkishui ino tipat ena olong too nkonyek aainei, neaku metaa enkishui ai ene tipat too nkonyek o Laitoriani, naa maatokordu ninye aitayu tiatua isinaitin pooki.”

²⁵Neitoki Saul ajoki Daudi, “Mikitamayiani iyie, enkerai ai, Daudi! Ias iyie imbaa kumok naa idupoyu te pooki.” Neaku eshomo Daudi enkoitoi enye neshuko Saul alo ewueji enye.