Read Maasai Bible – Biblia Sinyati 1 Samuel 3 Bible Online

1 Samuel 3 - Maasai Bible – Biblia Sinyati bible

1 Samuel 3

¹Ore apa ina ayioni Samuel neisiaai Olaitoriani ti abori Eli. Nemeibala apa ororei lo Laitoriani nena olong'i. Meetae apa induaat oleng.

²Ore apa ina kata Eli, eidipa inkonyek aailiilai, metaa meekure edolisho, neirura apa ninye te wueji enye makewan;

³Ore oltaa lo Laitoriani neton eitu eye, neirragita Samuel tiatua enkaji o Laitoriani, teine apa netii osanduku le Nkai.

⁴Neipotisho Olaitoriani ajo, “Samuel! Samuel!” Nejo ninye, “Nele nanu!”

⁵Neipirri alo enetii Eli nejo, “Nele nanu, amu kimpoto iyie nanu.” Kake etejo ninye, “Eitu nanu aipot; nyaaki irraga.” Nelo ninye airura.

⁶Neitoki Olaitoriani aipotisho nejo, “Samuel!” Nedumunye Samuel nelo enetii Eli, nejo, “Nele nanu, amu kimpoto.” Kake etejo ninye, “Eitu nanu aipotisho, Enkayioni ai, nyaaki irraga.

⁷Neton apa eitu eyiolou Samuel Olaitoriani, neton eitu eibalunyeki ororei lo Laitoriani te ninye.”

⁸Neitoki Olaitoriani aipot Samuel enkata e uni. Nedumunye ninye nelo enetii Eli, nejo, “Nele nanu, amu kimpoto nanu.” Nemusu Eli ajo Olaitoriani oipotito enkayioni.

⁹Nejoki Eli Samuel, “Shomo, irraga; naa ti nikimpot ninye tejo, ‘Iroro, Olaitoriani, amu ening'ito osinka lino.’ ” Nelo Samuel airrag te wueji enye.

¹⁰Nelotu Olaitoriani aitashe teine, aipotisho anaa too nkulie katitin, ejo “Samuel! Samuel!” Nejo Samuel, “Iroro, amu ening'ito osinka lino.”

¹¹Nejoki Olaitoriani Samuel, “Ng'ura etaa nanu enaas embae tiatua Israel, naa ore nkiyiaa pokira are e ilo oning neitang'e.

¹²Ore teina olong naitabaya nanu tialo Eli nena pooki natejo naaipirta enkaji enye, ebaiki enkiterunoto o metabaiki enkiting'oto.

¹³Najoki nanu ninye nchere etaa nanu kaitame enkaji enye intarasi, teina torroni apa nayiolo ninye, te nkaraki apa namor ilayiok lenyena Enkai, neitu ninye eibooyo ninche.

¹⁴Metaa kanya nanu olmumai te nkaji e Eli nchere ore ina torroni e nkaji e Eli nemeipooyu aekata to lasar aashu enkishooroto intarasi.”

¹⁵Neirrag Samuel o mekenyu, neitoki ninye abol inkutukie oo nkajijik e nkaji o Laitoriani. Neureyu Samuel eliki Eli ina duaata.

¹⁶Kake eipoto Eli Samuel nejoki, “Samuel, enkayioni ai.” Nejo ninye, “Nele nanu.”

¹⁷Nejo Eli, “Kainyoo kitiaaka Olaitoriani? Misudoo iyie te nanu. Metaasa Enkai ena te iyie aitulus, ti nimiki pooki toki e nena pooki nikitiaaka ninye.”

¹⁸Neliki Samuel ninye pooki toki nemeeta entoki naisudoyie te ninye. Nejo ninye, “Olaitoriani, inchoo ninye eas ina naishaakino te ninye.”

¹⁹Nebulu Samuel, netii apa Olaitoriani te nebo ninye, neitu eisho obo loo rorei lenyena edoiki enkop.

²⁰Ore Israeli pooki ebaiki Dan o metabaiki Beersheba neyiolo nchere etudupe Samuel aaku oloiboni lo Laitoriani.

²¹Neitoki Olaitoriani alioyu te Shilo, amu eibalunye Olaitoriani kewan te Samuel te Shilo to rorei lo Laitoriani.