Read Maasai Bible – Biblia Sinyati 1 Samuel 31 Bible Online

1 Samuel 31 - Maasai Bible – Biblia Sinyati bible

1 Samuel 31

¹Nearare apa Ilfilisti Israel; neisik iltung'ana le Israel te dukuya Ilfilisti neidaikieki to Ldoinyo le Gilboa.

²Neinepu Ilfilisti Saul o layiok lenyena; near Ilfilisti Yonatan o Abinadab o Malikishua, lelo ayiok le Saul.

³Neitirrishaki olarrabal Saul oleng, netum ninye ilang'orok loo mbaa, netum olbae torrono te lelo ang'orok loo mbaa.

⁴Nejoki Saul ilo anapani lenye loo maasa o larrabal, “Intayu olalem lino taremoki meipang'a te nanu, maapuonu ake kulo lememurata aang'ung'ur nanu, naaitaa nanu enkiguran.” Kake meidim ilo anapani lenye loo maasa o larrabal; amu eturia oleng. Neaku eitayio Saul olalem lenye makewan, nebatatakino.

⁵Ore ake pee edol ilo anapani lenye loo maasa o larrabal ajo etua Saul, nebatatakino sii ninye olalem lenye, neye te nebo ninye.

⁶Neaku etua Saul o layiok lenyena pokira okuni, o lanapani lenye loo maasa o larrabal, o ltung'ana lenyena pooki, te nkolong nabo te nebo.

⁷Ore ake pee edol iltung'ana le Israel apa ootii likae kekun o erata o lekua ootii teidia alo Yordan nchere eisika iltung'ana le Israel, netua Saul o layiok lenyena, neing'uaa ninche inkang'itie enye neisik; nepuonu Ilfilisti nebik tiatua ninche.

⁸Ore pee ekenyu, ore pee epuonu Ilfilisti aapur lelo ootaraki metuata, netum ninche Saul o layiok lenyena pokira okuni eirrag to Oldoinyo le Gilboa.

⁹Nedung'oo ninche endukuya enye, neing'uaa imaasa o larrabal neirriwaa ilkiliku tiatua enkop pooki oo Filistia, mewaita ilomon sidain aayaki inkaitin enye o ltung'ana.

¹⁰Nepik imaasa o larrabal enkaji e nkitanyaanyukoto e nkai naji Ashtarot; nesheiki osesen lenye esuntai e Betshean.

¹¹Kake ore ake pee ening lelo oomanya Yabesh-Gilead ina naitaasa Ilfilisti Saul,

¹²nedumunye iltung'ana pooki oopi, nepuo enkewarie pooki, neitayu osesen le Saul o seseni loo layiok lenyena aaitung'uaa esuntai e Bet-shan; nepuonu ninche Yabesh nepejoo ninche teine.

¹³Neya iloik lenye nenukaa ti abori olchani oji olkuaju te Yabesh, nepukoo ninche inkolong'i naapishana.