Read Свето Писмо (Гаврилова) 1990 Битие 25 Bible Online

Битие 25 - Свето Писмо (Гаврилова) 1990 bible

Битие 25

¹А Авраам зеде втора жена, по име Хетура.

²И таа му ги роди Зимрана, Јоксана, Медана, Мадијама, Јесвока и Соијена.

³Јоксан ги роди Темана и Дедана. А Деданови синови беа Рагуил, Навдеил и Асурим, Летусим и Лаудим.

⁴А синови Мадијамови: Ефа, Ефер, Ханох, Авид и Елдаг. Сите тие беа синови Хетурини.

⁵А Авраам целиот свој имот му го даде на Исака.

⁶На синовите, пак, од своите наложници им даде Авраам само подароци, и, уште додека беше жив, ги распрати на исток, во источниот крај — далеку од синот негов Исака.

⁷А деновите на Авраамовиот живот, што го поживе, беа сто и седумдесет и пет години.

⁸И откако ослабе, умре Авраам во добра старост, сит од животот, и се прибра во родот свој.

⁹А го погребаа неговите синови, Исак и Исмаил, во пештерата Макпела, во нивата на Ефрона, синот на Хетеецот Сахар, а која се наоѓаше спроти Мамре;

¹⁰во пештерата на нивата, што ја беше купил Авраам од синовите Хетеови, таму беше погребан Авраам со Сáра, жената своја.

¹¹А по смртта Авраамова го благослови Бог Исака, синот негов. Исак живееше, пак, во Беер Лахај Рој.

¹²Еве го родословот на Исмаила, синот Авраамов, кого му го роди на Авраама Агара Египтјанката, слугинката на Сáра.

¹³А ова се имињата на синовите Исмаилови, како што ги именуваа во родовите нивни: првенецот Исмаилов е Навајот, па Кидар, Навдеил и Масам,

¹⁴потоа Масма, Дума и Маса,

¹⁵Хадар, Теман, Јетур, Нафес и Кедма.

¹⁶Тоа се синовите Исмаилови, и тоа се имињата според селиштата, шаторите и населбите нивни. Тоа се дванаесетте кнезови над племињата нивни.

¹⁷А деновите на животот Исмаилов се сто триесет и седум години. Потоа ослабе и умре, и се прибра при својот род.

¹⁸Неговите синови живееја од Евилат дури до Сур, источно од Египет, од каде што се оди во Асирија. Тие се населија спроти сите браќа свои.

¹⁹А ова е родословот на Исака, синот Авраамов: Авраам го роди Исака;

²⁰А Исак имаше четириесет години кога се ожени со Ревека, ќерката на Арамеецот Ватуило од Месопотамија сириска, сестра на Арамеецот Лаван.

²¹И Исак Му се помоли на Господа за жената своја, бидејќи таа беше неплодна; и Бог го чу, па Ревека, жената негова, зачна.

²²Но децата се удираа едно со друго во утробата нејзина, и таа рече: »Ако биде така, зошто ми е ова?« И отиде да Го праша Господа.

²³А Господ ѝ рече: »Две племиња има во утробата твоја, и два народа ќе излезат од тебе; едниот народ ќе биде посилен од другиот и поголемиот ќе му служи на помалиот.«

²⁴И дојде времето да роди, а ете — близнаци во утробата нејзина.

²⁵Излезе синот првенец црвен, целиот рунтав како руно; и му дадоа име Исав.

²⁶А потоа излезе брат му, држејќи го Исава со рака за петата; нему му ставија име Јаков. А Исак имеше шеесет години, кога ги роди овие Ревека.

²⁷И децата пораснаа: Исав стана вешт ловец и љубител на полето, а Јаков беше човек кроток и престојуваше во шаторите.

²⁸Исак го сакаше Исава, зашто многу му се свиѓаше ловот негов; а Ревека повеќе го сакаше Јакова.

²⁹Еднаш Јаков зготви јадење, а Исав дојде од полето уморен.

³⁰И му рече Исав на Јакова: »Дај ми да јадам од тоа црвеникаво, зошто сум уморен.« Оттаму се нарече Едом.

³¹Но Јаков му рече на Исава: »Продај ми го денес првородството твое!«

³²А Исав одговори: »Еве, сакам да умрам, па што ќе ми е првородството?«

³³Но Јаков му рече: »Заколни ми се уште сега!« И тој му се заколна. Така Исав му го продаде своето првородство на Јакова.

³⁴И Јаков му даде на Исава леб и варена леќа, и тој јаде и пи, па стана и си отиде. Така Исав го презре првородството свое.