Read Свето Писмо (Гаврилова) 1990 Битие 6 Bible Online

Битие 6 - Свето Писмо (Гаврилова) 1990 bible

Битие 6

¹А кога луѓето почнаа да се множат на земјата, и ќерки им се народија,

²тогаш синовите Божји, гледајќи ги ќерките човечки дека се убави, ги земаа, кои што ги сакаа, за жени.

³И рече Господ Бог: »Духот Мој нема вечно да пребива во луѓето, зашто тие се тело; ете деновите нивни нека им бидат сто и дваесет години.«

⁴А имаше во тоа време џинови на земјата, особено, пак, кога синовите Божји почнаа да влегуваа при ќерките човечки и тие почнаа да им раѓаат; тоа се силните луѓе, прочуени од старото време.

⁵И виде Господ Бог дека лошотиите меѓу луѓето на замјата се големи, и дека сите мисли и помисли во срцата нивни беа зли во секое време.

⁶И се покаја Бог што го беше создал човекот на земјата, па се огорчи во срцето Свое.

⁷И рече Господ: »Ќе ги истребам луѓето што сум ги создал, од земјата — од човекот до животното, ѕверовите и птиците небески — оти се кајам што ги создадов.«

⁸Но Ное најде милост пред очите на Господа Бога.

⁹Еве го животот на Ноја: Ное беше човек праведен и непорочен во својот род; Ное живееше секогаш според волјата Божја.

¹⁰И му се родија на Ное три сина: Сим, Хам и Јафет.

¹¹А земјата се израсипа пред лицето на Бога, и се исполни со неправда.

¹²И погледна Господ Бог на земјата, и ете — таа беше расипана: бидејќи секоја плот беше се отклонила од својот пат на земјата.

¹³И му рече Господ Бог на Ноја: »Крајот на секое тело пред очите Мои дојде, зашто се исполни земјата со неправда од нив; и, еве, Јас ќе ги истребам нив од земјата.

¹⁴Изгради си за себе ковчег од дрвото гофер, и направи прегради во ковчегот; потоа намачкај го со смола одвнатре и однадвор.

¹⁵А изгради го вака: должината на ковчегот да биде триста лакти, ширината негова педесет лакти, а во висина да е триесет лакти.

¹⁶Направи и прозорец на ковчегот, и засводи го на еден лакот одозгора; стави му и врата на ковчегот отстрана и нека има три ката во него: долен, среден и горен.

¹⁷Јас ќе пуштам потоп, вода, на земјата, за да ја истребам под небото секоја плот, во која има дух животен, сѐ, што е на земјата, ќе изгине.

¹⁸Но со тебе Јас ќе направам завет Свој, а во ковчегот ќе влезеш ти, и со тебе и синовите твои, и жената твоја, и жените на синовите твои.

¹⁹И внеси во него исто така од сите животни, од секој добиток и од сите влекачи, и од секоја плот да има по две, за да останат со тебе во живот; а од машки и женски пол да бидат.

²⁰Од птиците според родот нивни, и од добитокот според родот негов, и од сите влекачи според нивниот род, и тоа сѐ по две ќе влезат при тебе, за да останат живи со тебе, пород од машки и женски пол.

²¹И земи со себе секаква храна, со каква се хранат, и чувај ја при себе; тоа ќе биде храната за тебе и за нив!«

²²И направи Ное сѐ: направи така како што му заповеда Господ Бог.