Read Свето Писмо (Гаврилова) 1990 2 Царства 20 Bible Online

2 Царства 20 - Свето Писмо (Гаврилова) 1990 bible

2 Царства 20

¹Случајно таму се наоѓаше еден лош човек, по име Савеј, син Вохоров, тај затруби со труба и рече: »За нас нема дел со Давида и нема за нас наследство со Јесеевиот син; Израилци, сите во шаторите!«

²И сите Израилци се одделија од Давида и отидоа по Савеј, синот Вохоров, а Јудејците останаа од страната на царот свој, од Јордан до Ерусалим.

³Давид дојде во домот свој во Ерусалим; и ги зеде царот десетте жени наложници, што ги беше оставил да ја чуваат куќата; ги смести во одделна куќа под надзор; ги хранеше, но не одеше при нив. И тие престојуваа таму сѐ до смртта своја и живееја таму како вдовици.

⁴А Давид му рече на Амесај: »Свикај ги за три дни Јудејците при мене и ти самиот дојди тука!«

⁵И Амесај отиде да ги свика Јудејците, но се задржа повеќе од одреденото време.

⁶Тогаш Давид му рече на Амесаја: »Вохоровиот син Савеј сега ќе ви донесе повеќе зло, отколку Авесалом; земи ги слугите на господарот свој и следи го, да не би да најде утврдени градови и да се сокрие од очите наши.«

⁷И излегоа по него Јоавовите луѓе, и Хелетејците и Фелетејците, и сите јунаци тргнаа од Ерусалим да го прогонуваат Вохоровиот син Савеј.

⁸А кога се доближија до големиот камен, што е при Гаваон, ги сретна Амесај. Јоав беше облечен во воената облека своја и препашан со меч, кој висеше на колкот во ножница и кој лесно се вадеше од неа и влегуваше.

⁹Јоав му рече на Амесаја: »Здрав ли си, брате?« Јоав ја фати со десната рака своја брадата на Амесаја, за да го бакне.

¹⁰Амесај, бидејќи не се претпази од мечот, што беше во раката на Јоава, и тој го прободе со него во стомакот, така што внатрешнината му се истури на земја, а не го удри по вторпат, и тој умре. Јоав и братот негов Авеса го подгонија Савеја, Вохоровиот син.

¹¹Еден од Јоавовите слуги стоеше над Авесаја и велеше: »Кој му е верен на Јоава и кој е за Давида, нека оди по Јоава!«

¹²А умрениот Амесај лежеше во крвта среде патот. И тој човек, гледајќи, дека сите луѓе се запираат над него, го одвлече Амесаја од патот во полето и стави врз него облека, бидејќи виде, оти секој, што минуваше, се запираше над него.

¹³Но кога тој беше одвлечен од патот, сиот народ Израилев тргна по Јоава да го гони Савеја, Вохоровиот син.

¹⁴А тој мина низ сите Израилски племиња до Авел и Вет-Мах и преку целиот Берим; и сите жители од градовите се собираа и одеа по него.

¹⁵И дојдоа и го опсадија Авел и Вет-Мах; издигнаа насип пред градот, се приближија до ѕидот, и сите луѓе што беа со Јоава, напнаа да го соборат ѕидот.

¹⁶Тогаш една умна жена извика од градскиот ѕид: »Чујте, чујте, кажете му на Јоава да дојде ваму, и јас ќе поразговарам со него.«

¹⁷Јоав се приближи до неа, и жената праша: »Ти ли си Јоав?« И тој одговори: »Јас сум.« Таа рече: »Чуј ги зборовите на слугинката твоја.« А тој одговори: »Слушам«.

¹⁸Таа рече: »Едно време велеа: кој сака да праша, нека праша во Авел; и така го решаваа делото. Има ли уште такви, кои се решиле да останат верни Израилци? Нека прашаат во Авел, има ли уште?

¹⁹Јас сум од мирните, верни градови израилски, а ти сакаш да го сосипеш градот, и тоа мајката (на градовите) во Израилот. Зошто да го разурнуваш наследството Господово?«

²⁰Јоав одговори и рече: »Далеку е од мене да сосипувам или да разурнувам!

²¹Тоа не е така; но еден човек од Ефремовата гора, по име Савеј, синот Вохоров, крена рака против царот Давида; само него дајте ми го, и јас ќе отстапам од градот«. А жената му рече на Јоава: »Еве, неговата глава ќе ти биде фрлена од ѕидот.«

²²Жената отиде пред сиот народ со умните зборови свои и му зборуваше на целиот град да му ја пресечат главата на Савеј, Вохоровиот син. И му ја пресекоа главата на Савеј, Вохоровиот син, и му ја фрлија на Јоава. Тогаш Јоав затруби со труба, и сите луѓе се разотидоа од градот по шаторите свои; а Јоав се врати во Ерусалим при царот.

²³Јоав беше поставен над сета израилска војска, додека Ванеја, Јодаевиот син, над Хелетејците и над Фелетејците;

²⁴Адорам — над даноците; Јосафат, Ахилудовиот син, — за летописец;

²⁵Суса — за писар; Садок и Авијатар — за свештеници;

²⁶исто така и Ирас Јаирецот беше свештеник при Давида.