Read Свето Писмо (Гаврилова) 1990 2 Царства 23 Bible Online

2 Царства 23 - Свето Писмо (Гаврилова) 1990 bible

2 Царства 23

¹Еве ги последните Давидови зборови, словото на Јесеевиот син Давида, беседата на оној маж, кој е високо поставен, на помазаникот на Бога Јаковов и на слаткопевецот Израилев:

²»Духот Господов говори во мене, и словото Негово е на јазикот мој.

³Рече Бог Израилев, говори за мене карпата Израилева: Оној, што господари со луѓето, нека биде праведен, да господари со страв Божји.

⁴И како што изутрина на разденување, при изгрејсонце на безоблачно небо, од греењето по дожд израснува од земјата трева,

⁵така е и со мојот дом во Бога. Зашто Он склучи со мене завет вечен, цврст и неизменлив. Така излегува од Него сето мое спасение и сета моја желба.

⁶А нечестивите ќе бидат како исфрлено трње, кое не се фаќа со рака;

⁷но кој сака да се допре до него, се вооружува со железо или со дрво од копје, и на местото во оган го изгорува.«

⁸Еве ги имињата на јунаците Давидови: Хананеецот Евостеј, главен меѓу тројцата: тој го крена копјето свое против осумстотини души и ги порази наеднаш.

⁹По него беше Елеазар, син од братот на татка му, еден од тројцата јунаци што беа со Давида и кои со префрлувања ги предизвикуваа Филистејците, кога тие се беа собрале да војуваат.

¹⁰Израилците излегоа против нив, и тој застана и ги поразуваше Филистејците дотаму, додека му се измори раката и се прилепи до мечот. И во тој ден Господ даде голема победа, и народот тргна по него, само за да ги собира убиените.

¹¹По него — Сама, син на Харовитецот Агеј. Кога Филистејците се собраа во Тирија, каде што имаше нива засеана со леќа, народот избега од Филистејците,

¹²но тој застана среде нивата и ја заштити и ги порази Филистејците. И тогаш Господ даде голема победа.

¹³Тие тројца главни меѓу триесетте војводи отидоа и влегоа по жетва при Давида во Одоламската пештера, кога филистејските војници стоеја во долината на Рефаим.

¹⁴Тогаш Давид беше во укрепено место, а филистејската војска во Витлеем.

¹⁵Давид побара да пие и рече: »Кој ќе ми донесе да пијам вода од Витлеемскиот кладенец, што е при портите?«

¹⁶Тогаш тие тројца јунаци се провреа низ Филистејскиот логор, зафатија вода од Витлеемскиот кладенец, што е при портите, и зедоа, па му донесоа на Давида. Но тој не сакаше да ја пие, туку ја излеа во слава на Господа,

¹⁷и рече: »Да ме чува Господ да го направам тоа! Не е ли тоа крв на луѓето, што одеа, со опасност по животот свој?« И не сакаше да пие. Ете што извршија тие тројца јунаци!

¹⁸А Авеса, братот на Саруевиот син Јоав, беше главен меѓу тројцата; тој уби со копјето свое триста души и се прослави меѓу тие тројца.

¹⁹Меѓу тројцата тој беше највиден и им стана началник, но на оние тројца не им беше рамен.

²⁰Ванеја, син на храбиот маж Јодаја, од Кавсаил, голем по делата, ги порази двајцата синови на Ариила Моавски; тој истиот слезе во еден ров и уби лав по снежно време;

²¹тој уби и еден Египтјанин, виден човек; Египтјанинот имаше во раката копје, а тој излезе против него со стап и го грабна копјето од раката на Египтјанинот и го уби со неговото копје, —

²²ете, тоа го изврши Јодаевиот син Ванеја, и беше славен меѓу тројцата јунаци;

²³тој беше повиден од триесетте, на оние тројца не им беше рамен. И Давид го постави за најблизок извршител на заповедите свои.

²⁴Еве ги имињата на силните при царот Давида: Асаил, братот на Јоава — во бројот на триесетте; Елхаанан, синот на Додо, од Витлеем,

²⁵Сама Харотитецот, Елика Харотитецот,

²⁶Хелис Келотецот, Ира, синот на Екиса,

²⁷Авиезер Анатотецот, Савукеј од Асотит,

²⁸Елаон Неотитски, Махарај Нетофатецот,

²⁹Хелев Нетофатецот, син Ванин, Итај, син на Ривеја од синовите Венијаминови во Гива,

³⁰Ванеас Фаратоитски, Идај од Нахле-Гааш.

³¹Ави-Албои Арабатитецот, Азмавет Бархумитецот,

³²Елихајба Шалбонецот; од синовите на Јашена — Јонатан,

³³Сама Арарарин, Ахијам, син Сараров,

³⁴Елифелет, син Асвезов, син на Маахатинец, Елијам Гилонецот, син на Ахитофела,

³⁵Серај Кармелитец, Фареј Арбитец,

³⁶Игал, Натанов син — од Сова, Вани од Гад,

³⁷Селек Амониецот, Нахареј Беротецот, оруженосец на Јоава, Саруев син,

³⁸Ирас Етирски, Гарев Јетрејски,

³⁹Урија Гетејски. Сѐ — триесет и седум.