Read Свето Писмо (Гаврилова) 1990 4 Царства 22 Bible Online

4 Царства 22 - Свето Писмо (Гаврилова) 1990 bible

4 Царства 22

¹Јосиј беше на осум години кога стана цар, и царуваше во Ерусалим триесет и една година; мајка му се викаше Једида, ќерка Едеева, од Васурот.

²Тој го вршеше она што беше угодно пред очите на Господа, во сѐ одеше по патот на татка си Давида и не се отколнуваше ни десно, ни лево.

³Кога беше на осумнаесет години, царот Јосиј го испрати писарот Сафан, син на Езелија, Месоламов син, во домот на Господа, велејќи:

⁴»Оди при првосвештеникот Хелкија, нека го преброи среброто, донесено во домот на Господа, што го собраа од народот вратарите,

⁵и нека го дадат во рацете на распоредниците, поставени при храмот Господов, а тие да го потрошат за работниците во домот Господов за поправка на штетите во домот:

⁶на дрводелците, на каменарите, на ѕидарите и за купување дрва и делкани камења за поправка на домот;

⁷но да не се бара од нив сметка за среброто, предадено во рацете нивни, бидејќи тие постапуваат чесно.«

⁸И му кажа првосвештеникот Хелкиј на писарот Сафан: »Јас ја најдов во домот Господов книгата на законот.« И Хелкиј му ја подаде книгата на Сафана, и тој ја читаше.

⁹Дојде писарот Сафан при царот и му донесе на царот одговор, велејќи: »Твоите слуги го зедоа среброто, најдено во домот, и го предадоа во рацете на распоредниците, поставени при домот Господов.«

¹⁰Писарот Сафан му соопшти уште на царот и рече: »Една книга ми даде свештеникот Хелкиј.« И Сафан ја читаше пред царот.

¹¹Кога царот ги чу зборовите од книгана на законот, ја раскина облеката своја.

¹²Тогаш царот заповеда на свештеникот Хелкиј, на Ахикама, Сафанов син, на Ахвора, Михеев син, на писарот Сафан и на царскиот слуга Асаиј, велејќи:

¹³»Одете, прашајте Го Господа за мене, за народот и за цела Јудеја во врска со зборовите на таа најдена книга, зашто голем е гневот Господов, што се разгорел против нас, поради тоа што нашите татковци не ги послушаа зборовите на таа книга, за да постапуваат според она што ни е заповедано во неа.«

¹⁴И отиде свештеникот Хелкиј со Ахикама, Ахвора, Сафана и Асаија при пророчицата Олдама, жена на одеждочуварот Салум, син на Текуја, Арасов син, — а таа живееше во Ерусалим, во вториот дел, — и зборуваа со неа.

¹⁵А таа им рече: »Вака вели Господ, Бог Израилев: кажете му на човекот, што ве испрати при мене:

¹⁶вака вели Господ: ќе испратам зло во тоа место и врз жителите негови — сите зборови од книгата, што ги прочита јудејскиот цар.

¹⁷Поради тоа што ме оставија и кадат да други богови, за да ме предизвикуваат со сите работи на рацете свои, се разгневи гневот Мој против тоа место, и нема да угасне.

¹⁸А на јудејскиот цар, што ве испратил да Го прашате Господа, кажете му: — вака вели Господ, Бог Израилев, за зборовите што ги чу:

¹⁹поради тоа што смекна срцете твое, и ти се смири пред Господа, откако го чу ова, што Јас го изреков против тоа место и против жителите негови, дека тие ќе бидат за ужас и проклетство, и ти ја раскина облеката своја и плачеше пред Мене, Јас те чув — вели Господ.

²⁰Поради тоа, еве, Јас ќе те приберам при татковците твои, и ќе бидеш ставен во гробницата своја во мир, и твоите очи нема да ги видат сите тие зла, што ќе ги испратам во тоа место.« И му донесоа на царот одговор.