Read Свето Писмо (Гаврилова) 1990 1 Летописи 11 Bible Online

1 Летописи 11 - Свето Писмо (Гаврилова) 1990 bible

1 Летописи 11

¹Се собраа сите Израилци при Давида во Хеврон и рекоа: »Еве, ние сме коска твоја и плот твоја;

²и вчера и завчера, кога Саул беше уште цар, ти го изведуваше и го воведуваше Израилот: и Господ, Бог твој, ти рече: ‚Ти ќе го пасеш Мојот народ Израилот и ти ќе бидеш водач на Израилот, Мојот народ.‘«

³Тогаш сите старешини Израилеви дојдоа при царот во Хеврон, и Давид склучи со нив завет во Хеврон пред лицето Господово, и тие го помазаа Давида за цар над Израилот, според словото Господово преку Самуила.

⁴И тргна Давид и сиот Израил за Ерусалим, односно за Јевус. А таму беа Јевусејците, жители на таа земја.

⁵Жителите на Јевус му рекоа на Давида: »Нема да влезеш тука.« Но Давид ја презеде тврдината Сион: тоа е градот Давидов.

⁶И рече Давид: »Кој од сите вас најнапред ќе ги победи Јевусејците, ќе стане кнез и војвода.« Најнапред од сите излезе Јоав, Саруевиот син, и стана кнез.

⁷Давид живееше во таа тврдина, и затоа ја нерекуваа Давидов град.

⁸Тој изгради ѕидови околу градот, почнувајќи од Милон па сѐ наоколу; Јоав, пак, ги обнови другите делови на градот.

⁹Давид напредуваше и се воздигаше сѐ повеќе и повеќе, и Господ Саваот беше со него.

¹⁰Еве ги поглавните Давидови јунаци, кои се бореа храбро со него во царството негово, заедно со сиот Израил, за да го зацарат над Израилот според словото Господово.

¹¹Еве го и бројот на јунаците што беа при Давида: Јесвал, син Ахаманиев, прв од триесеттемина: тој го извелче мечот свој против триста души и наеднаш ги порази.

¹²По него Елеазар, синот на Ахохиецот Додо — еден од тројцата јунаци:

¹³Тој беше со Давида во Фаседомин, каде што Филистејците се беа собрале за војна. Таму еден дел од полето беше посеано со јачмен, и народот избега од Филистејците;

¹⁴но тие се запреа среде полето, ги забележаа и ги поразија Филистејците. И Господ даде големо спасение на Своите луѓе.

¹⁵Тие тројцата главни од триесеттемина водачи се качија на карпата при Давида во пештерата Одолам, а, пак, филистејскиот логор беше сместен во Рефаимската долина.

¹⁶Давид во тоа време беше во утврдено место, а стражата филистејска беше во Витлеем.

¹⁷Давид ожедне и рече: »Кој ќе ми донесе да пијам вода од Витлеемскиот извор, што е при портите?«

¹⁸Тогаш тие тројца се провреа низ филистејскиот логор, зафатија вода од Витлеемскиот извор, што е при портите, та му донесоа на Давида. Но Давид не сакаше да пие, туку ја излеа во слава на Господа.

¹⁹и рече: »Да ме чува Господ, тоа да го направам! Зар ќе ја пијам крвта на оние мажи, што ги изложија душите свои! Зашто со опасност по животот свој тие ја донесоа водата.« — И не сакаше да ја пие. Еве што извршија тие тројца јунаци.

²⁰И Авеса, братот Јоавов, беше главен меѓу тројцата: тој уби со мечот свој триста души и се прослави меѓу тие тројца.

²¹Од тројцата тој беше највиден и беше водач, но на тие тројца не им беше рамен.

²²Ванеја, синот на храбриот маж Јодај, голем по делата, родум од Кавасаил, ги уби двајцата синови на Ариила Моавски; тој истиот слезе и уби лав во еден ров по снежно време;

²³пак тој уби еден Египтјанец, кои беше пет лакти висок: Египтјанецот имаше во раката копје колу едно ткаечко кросно, а тој пристапи кон него со стап и, откако му го изби копјето од раката на Египтјаницот, го уби со неговото копје.

²⁴Тоа токму го изврши Јодаевиот син Ванеја, и беше славен меѓу тие тројца јунаци;

²⁵тој беше повиден од триесеттемина, но на оние тројцата не им беше рамен, и Давид го постави за најблизок исполнител на своите заповеди.

²⁶А главни од борците беа: Асаил, брат на Јоава; Елеанан, син на Додо, од Витлеем;

²⁷Самот Адитијанин, Хелки Афелонин;

²⁸Ореј, син на Кис Текуитски; Авиезер Анатотски;

²⁹Совохај Асотиски; Илиј Ахојски;

³⁰Воорај Нетофатец; Елад, син на Вајнак, Нетофатецот;

³¹Итај, син Ривеинов, од Гава Венијаминова; Ванеја Фаратонијев;

³²Уриј од Неал; Галсавил од Аравеја;

³³Азмот Варсамијски; Елијав Саламијски; Ирас Гоиниски.

³⁴Синови на Гизонецот Хасема: Јонатан син на Сагти, Арариецот;

³⁵Ахијам, син Сахаров, Арариец: Зифаил, син на Орин;

³⁶Афер Мехуратински; Ахија Фелониски;

³⁷Асарај Мармелински; Ноорај, син Авдиев;

³⁸Јоил, брат Натанов; Мехар, син Тараиев;

³⁹Селик Амонец; Наареј Виродин, оружјеносец на Јоава, син Саруев;

⁴⁰Ира Јетериин; Гарив и Териин;

⁴¹Урија Хетеецот; Вазат, син Олиев;

⁴²Адина, син на Саха, кнез на Рувимовците, и тој имаше триесет;

⁴³Анан, син на Мааха; Јосафат Татанин;

⁴⁴Озија Астарот; Сама и Јеил, синови на Хотан од Ароир;

⁴⁵Једил, син Самерин, и Јоза, негов брат Тосанец;

⁴⁶Јелиил од Маоин, и Арива и Осоја, синови Елијамови, Енам и Устем, Моавци;

⁴⁷Елиил, Овид и Јесиил од Месовија.