Read Свето Писмо (Гаврилова) 1990 2 Летописи 14 Bible Online

2 Летописи 14 - Свето Писмо (Гаврилова) 1990 bible

2 Летописи 14

¹И почина Авија при татковците свои и го погребаа во Давидовиот град. Место него цар стана синот негов Аса. Во неговите дни земјата беше спокојна десет години.

²Аса го вршеше она, што беше добро и угодно пред очите на својот Господ Бог;

³тој ги премавна жртвениците на туѓите богови и идолските светилишта, ги скрши статуите и ги исече младите дубрави;

⁴им заповеда на Јудејците да Го бараат Господа, Бога на татковците нивни, да го исполнуваат законот Негов и заповедите;

⁵ги премавна од сите градови Јудините идолски светилишта и статуите на сонцето. И царството негово беше спокојно.

⁶И бидејќи беше спокојна земјата, тој изгради тврдина во Јудеја; тој не војуваше во тие години, зашто Господ му беше дал спокојство.

⁷И им рече Аса на Јудејците: »Да ги изградиме овие градови и да ги заградиме со ѕидиште и кули, со порти и клучеви; земјата е уште наша, зашто ние Го побаравме Господа, нашиот Бог; ние Го побаравме, и Он ни даде спокојство од сите страни.« И почнаа да градат, и успеваа.

⁸Воената сила на Аса беше: од Јудиното колено триста илјади вооружени со штитови и копја, од Венијаминовото колено двесте и осумдесет илјади јунаци, вооружени со штитови и стрелци со лак.

⁹И се крена против нив Зарај, Етиопјанин, со илјада илјади војска и триста коли, и стигна до Мариса.

¹⁰Му излезе Аса во пресрет, и се распоредија за борба во Софатската долина при Мариса.

¹¹Повика Аса кон Господа, својот Бог, и рече: »Господи, нели е во Твоја сила да им помагаш на силни и слаби? Тогаш помогни ни нам, Господи, Боже, наш, зашто ние на Тебе се надеваме и во Твое име излеговме против ова множество. Господи, Ти си наш Бог; да не биде човекот посилен од Тебе.«

¹²И Господ ги порази Етиопјаните пред Аса и пред Јуда, и Етиопјаните избегаа.

¹³Аса, пак, и народот со него ги гонеше до Гедор; Етиопјаните паднаа толку, што ниеден не остана жив, зашто беа поразени пред Господа и пред Неговата војска. И собраа прилично голем плен.

¹⁴Ги разрушија сите градови околу Гедор, зашто ужас од Господа налета врз нив; и ги ограбија сите градови и изнесоа од нив многу голем плен.

¹⁵Ги разрушија и пастирските колиби, ограбија многу стада од ситен добиток и камили, и се вратија во Ерусалим.