Read Свето Писмо (Гаврилова) 1990 2 Летописи 28 Bible Online

2 Летописи 28 - Свето Писмо (Гаврилова) 1990 bible

2 Летописи 28

¹Ахаз беше на дваесет години кога стана цар, и царуваше во Ерусалим шеснаесет години; и тој не го вршеше угодното во очите Господови, како што правеше таткото негов Давид;

²тој одеше по патот на израилските цареви, и дури направи излеани кипови на Вааловци;

³и тој кадеше во долината на Еномовите синови, и го протеруваше низ огин синовите свои, подражавајќи ги гнасотиите на оние народи, коишто Господ ги прогони пред лицето на Израилевите синови;

⁴принесуваше жртви и кадеше по оброчиштата и по ридовите и под секое разгрането дрво.

⁵Затоа Господ, неговиот Бог, го предаде во рацете на сирискиот цар, и Сиријците го разбија и му зедоа многу заробеници, кои ги одведоа во Дамаск. Беше предаден и во рацете на израилскиот цар, и тој му нанесе голем пораз.

⁶Факеј, син Рамалиев уби во еден ден сто и дваесет илјади Јудејци, луѓе воинствени, затоа што го беа оставиле Господа, Бога на татковците свои.

⁷А Зихриј, силен јунак од Ефремците, го уби Масеја, царевиот син, и Азрикама, началник на дворот, и Елкана, втор по царот.

⁸И зедоа синовите Израилеви од браќата свои, Јудејците, двесте илјади жени, синови и ќерки; ограбија и многу плен од нив, и го однесоа ограбеното во Самарија.

⁹Таму имаше пророк Господов, по име Одед. Тој излезе пред војската, која, одеше во Самарија, и им рече: »Ете, Господ, Бог на татковците ваши, во гневот Свој против Јудејците, ги предаде во ваше рака, и вие ги избивте со таква јарост, која стигна до небесата.

¹⁰И сега мислите да ги направите синовите на Јуда и Ерусалим ваши робови и робинки. А зар немате и вие вина пред Господа, вашиот Бог?

¹¹Затоа послушајте ме, и вратете ги плениците, што сте ги заробиле од браќата свои, зашто пламенот на гневот Господов е на вас.«

¹²И некои од началниците на синовите Ефремови: Азарија, син Јехохананов, Берехија, син Мешилемотов, Езекија, син Салумов, и Амаса, син Хадлеев, застанаа спроти оние што доаѓаа од војна.

¹³и им рекоа: »Не ги доведувајте плениците тука, зашто би згрешиле пред Господа. Зар мислите да придодадете уште кон гревовите наши и кон престапите наши? Нашата вина е голема, и пламенот на гневот Господов е врз Израилот.«

¹⁴И вооружените ги оставија плениците и пленот при воените началници и пред целото собрание.

¹⁵И станаа споменатите по име мажи, ги зедоа плениците, и сите што беа голи ги облекоа од ограбеното, — ги облекоа и ги обуа, и ги нахранија, и ги напоија, и ги помазаат со масло, и ги качија на осли сите слаби, и ги испратија во Ерихон, град на палмите, при браќата нивни, и се вратија во Самарија.

¹⁶Во тоа време царот Ахаз испрати до асирските цареви да му помогнат,

¹⁷зашто Идумејците уште напаѓаа и мнозина избија И пленија во Јудеја,

¹⁸а Филистејците се растурија по градовите во низината и во јужна Јудеја и го презедоа Ветсамис и Ајалон, Гадерот и Сохот со потчинетите му градови. Тимна со потчинетите ѝ градови и Гимзо со потчинетите му градови, и се населија таму.

¹⁹Така ја понижи Господ Јудеја поради Ахаза, царот јудејски, зашто тој ја разврати Јудеја и тешко грешеше пред Господа.

²⁰И дојде кај него асирскиот цар Теглатфеласар, но му беше од штета, наместо да му помогне,

²¹зашто Ахаз ги зеде ризниците од домот Господов, од царскиот дом и од кнезовите, и сѐ му даде на асирскиот цар, но и тоа не му помогна туку го ожалости.

²²И во таа притеснета положба тој продолжуваше да прави беззаконија пред Господа, тој — царот Ахаз;

²³им принесуваше жртви на дамаските богови, мислејќи, дека тие го поразија, па велеше: »Боговите на сириските цареви им помагаат; ќе им принесам жртва, тие и на мене ќе ми помогнат.« Но тие беа за паѓањето негово и на целиот Израил.

²⁴Ги собра Ахаз садовите на домот Божји и ги разби, ја затвори вратата на домот Господов и си изгради жртвеници по сите агли на Ерусалим,

²⁵по сите градови Јудини направи оброчишта, за да кади на туѓи богови, и Го дразнеше Господа, Бога на татковците свои.

²⁶Другите дела и сите негови постапки, првите и последните, се опишани во книгата на царевите јудејски и израилски.

²⁷И почина Ахаз при татковците свои, и го погребаа во градот, во Ерусалим, но не го внесоа во гробниците на израилските цареви. Наместо него стана цар синот негов Езекија.