Read Свето Писмо (Гаврилова) 1990 Неемија 13 Bible Online

Неемија 13 - Свето Писмо (Гаврилова) 1990 bible

Неемија 13

¹Тој дена читаа од Мојсеевата книга гласно пред народот и најдоа напишано вака: Амонитец и Моавец на смеат да влегуваат во Божјото општество дури до века.

²Зашто тие не ги пресретнаа синовите на Израилот со леб и вода, а го најмија против него Валаама, за да го проколне; но Бог наш ја претвори клетвата во благослов.

³Кога го слушнаа тој закон, тие ги одделија од Израилот сѐ она што беше од друго племе.

⁴А пред тоа свештеникот Елијасив, поставен над одделите при домот на нашиот Бог, близок роднина на Товија,

⁵одреди за него една голема соба, во која пред тоа ставаа лебен принос, ливан и садови, и десеток од житото, виното и елејот, определени со закон за левитите, певците и вратарите, и приносите за свештениците.

⁶Кога се случуваше сето тоа, јас не бев во Ерусалим, зашто во текот на триесет и втората година на вавилонскиот цар Артаксеркс бев кај царот и по неколку дена пак се измолив од царот

⁷Кога дојдов во Ерусалим и дознав за злото, што го беше направил Елијасив, определувајќи за Товија соба во дворот на Божјиот дом,

⁸ми стана многу непријатно, и јас ја исфрлив сета покуќнина на Товија надвор од собата,

⁹и реков да ја исчистат собата и порачав пак да ги внесат таму садовите на Божјиот дом, лебниот принос и ливанот.

¹⁰Дознав уште, дека на левитите не им биде давани деловите, и дека левитите и певците, што ја вршеа службата своја, се разбегале секој на нивата своја.

¹¹Јас ги искарав за тоа началниците и реков: »Зошто го напуштивме Божјиот дом?« И јас ги собрав и ги поставив по местата нивни.

¹²И сите Јудејци почнаа одново да принесуваат десеток од житото, виното и зејтинот во одделите.

¹³И ги поставив како настојници Селемија, и книжникот Садока, и Федаија од левитите, а при нив и Анана, синот Закхуров, син Матаниев, зашто се сметаа за верни. И таму беше наложено да раздаваат делови на браќата свои.

¹⁴Спомни ме, Боже мој, за тоа, и не ги бриши сесрдните работи мои, што ги напрвив за домот на мојот Бог и за службата при него!

¹⁵Во тие дни видов во Јудеја, дека во сабота гмечат грозје, возат снопја и товараат осли со вино, грозје, смокви и секаков товар и го носат во саботен ден во Ерусалим. И јас ги искарав строго во истиот ден, кога ја продаваа таа храна.

¹⁶И Тирци живееја во Јудеја и довезуваа риба и секаква стока и ја продаваа во сабота на јудејските жители и во Ерусалим.

¹⁷Јас ги искарав првенците Јудејски и им реков: »Зошто вршите такво зло и го осквернувате саботниот ден?

¹⁸Така правеа татковците ваши, та затоа Бог наш ги испрати врз нас и врз овој град сето тоа зло? А вие го зголемувате гневот Негов против Израилот, осквернувајќи ја саботата.«

¹⁹Потоа, штом ќе зајдеше сонцето зад ерусалимските порти, спроти сабота, заповедав да ги затворат вратите и порачував да не ги отвораат до утредента по сабота. А при портите ги поставија своите слуги, и никаков товар да не премине во саботен ден.

²⁰Така трговците и продавачите на секаква стока ноќеваа еднаш и двапати надвор од Ерусалим.

²¹Но јас ги скарав строго и им реков: »Зошто ноќевате до ѕидот? Ако го сторите тоа уште еднаш, ќе ставам рака на вас.« Оттогаш тие не доаѓаа во сабота.

²²И им реков на левитите, да се очистат и да дојдат да чуваат стража при портите, за да го светат саботниот ден. Спомни ме и за тоа, Боже мој, и поштеди ме по големата Своја милост!

²³Во тие денови видов уште Јудејци, што си беа зеле жени азотки, амонитки и моавки;

²⁴и затоа синовите нивни зборуваа полу азотски, или според јазикот на другите народи, а по јудејски не знаеја да говорат.

²⁵Јас ги искарав за тоа и ги проколнував, а некои мажи дури и ги тепав, косата им ја кубев и ги заколнував во Бога да не ги даваат ќерките свои за синовите нивни и да не ги земаат ќерките нивни за синовите свои и за себеси.

²⁶Нели поради тоа, си зборував, грешел и Соломон, царот Израилев? Во многу народи немало таков цар како него. Тој беше љубимец на својот Бог, и Бог го постави за цар над сите Израилци; но, пак, другоземни жени го натераа во грев и него.

²⁷И можно ли ни е да слушаме за вас, дека го вршите сето тоа големо зло, бидејќи грешите пред нашиот Бог, земајќи другоземни жени?

²⁸Еден од синовите на Јоада, син на големиот свештеник Елијасив, беше зет на Санвалата Уротинат, Јас го изгонив од себеси.

²⁹Спомни им, Боже мој, дека тие го осквернија свештенството и заветот свештенички и левитски!

³⁰Така го очистив од сѐ другоземно и ги установив службите на свештениците и левитите, на секого во неговата работа,

³¹и довозот на дрва во определено време и првините. Спомни ме, Боже мој, за мое добро!