Read Свето Писмо (Гаврилова) 1990 2. Ездра 1 Bible Online

2. Ездра 1 - Свето Писмо (Гаврилова) 1990 bible

2. Ездра 1

¹Јосија му направи Пасха на својот Господ во Ерусалим, го закла пасхалното јагне во четириниаесетиот ден на првиот месец

²и поставија во храмот Господов на смени свештеници во одежди.

³И им кажа на левитите, свештенослужители Израилеви: »Осветете се пред Господа, за да го поставите светиот Господов ковчег во храмот, направен од цар Соломона, син Давидов.

⁴Нема зошто да го носите на раменици: служете Му сега на Господа, вашиот Бог, и грижете се за народот Негов, Израилот, наредете се по вашите родови и племиња, според наредбата на Давида, цар Израилев, и според великолепието на синот негов Соломона;

⁵и откако ќе застанете во светилиштето, според родовите свои левитски, распоредете ги пред браќата свои, синовите на Израилот,

⁶заколете го пред уставот пасхалното јагне, пригответе жртви за браќата свои и направете Пасха според заповедта Господова, дадена на Мојсеја.«

⁷Јосиј му подари на народот, што се најде таму, триесет илјади јагниња и козли и три илјади телци; тоа беше дадено по ветување од царските стада на народот, свештениците и левитите.

⁸Хелкја, захарија и Јеил, начланици на храмот, им дадоа на свештениците за Пасха две илјади и шестотини овци и триста вола.

⁹А Јехонија, Самеј, Натанаил, негов брат, Асавија, Охиил и Јорам, илјадници, им дадоа на левитите за Пасха пет илјади овци и седумстотини вола.

¹⁰И кога стануваше тоа, свештениците и левитите стоеја благолепно, по поколенија и родови предимства, држејќи безквасници пред народот,

¹¹за да му принесуваат жртви на Господа, според она како што е заповедано во Мојсеевата книга. Тоа се вршеше рано изутрина.

¹²Тогаш го испекоа пасхалното јагне на оган, како што беше редот, а жртвите ги зготвија во бакарни садови и котли со пријатен мирис, и им принесоа на сите луѓе.

¹³А потоа зготвија за себеси и за своите браќа свештеници, синови Аронови.

¹⁴Зашто свештениците принесуваа лој до доцна, а левитите поради тоа готвеа за себеси и за своите браќа свештеници, синови Аронови.

¹⁵А свештениците, синови Асафови, беа по местата свои, според Давидовата наредба, и Асаф, и Захарија, и Единус, кој беше од царот.

¹⁶И на вратите при секоја порта не се дозволуваше да ја пропуштат смената своја, зашто готвеа за нив браќата нивни, левитите.

¹⁷И во тој ден се сврши сѐ, што спаѓаше во принесувањето жртви на Господа при извршувањето на Пасхата,

¹⁸и кон принесувањето на сепаленици врз Господовиот жртвеник, според заповедта на царот Јосија.

¹⁹И синовите Израилеви, што се наоѓаа во тоа време таму, славеа Пасха и — празникот Бесквасници седум дена.

²⁰Таква Пасха не беше празнувана во Израилот од времето на пророкот Самуила.

²¹И ниеден од сите Израилски цареви не направил таква Пасха, каква што направи Јосиј, заедно со свештениците, левитите, Јудејците и сите Израилци, што се наоѓаа тогаш во Ерусалим.

²²Таа Пасха беше празнувана во осумнаесеттата година од царувањето на Јосија.

²³И делата Јосиеви беа управени кон вистински пат пред Господа, полни со благочестивост.

²⁴А она што беше станало во негово време, односно за оние, што грешеа и постапуваа нечестиво против Господа повеќе од секој народ и царство, и како тие свесно Го оскрбуваа, и како зборовите Господови се кранаа против Израилот, — запишано е во поранешните летописи.

²⁵По сите работи на Јосија, се случи, Фараонот, царот египетски, да отиде да војува во Каркамист при Ефрат, и Јосиј му излезе во пресрет.

²⁶Египетскиот цар испрати да му кажат: »Што има меѓу мене и тебе, цару јудејски?

²⁷Не сум испратен против тебе од Господа Бога; мојата војна е Ефрат, и сега Господ е со мене и Господ ме поттикнува; отстапи и немој да Му се противставуваш на Господа.«

²⁸Но Јосија не се врати во колата своја, туку реши да војува со него, а да не ги послуша зборовите на пророкот Јеремеија од устата Господова.

²⁹И влезе против него во битка на полето Мегидо. И се собраа началниците при царот Јосија.

³⁰Тогаш царот им рече на слугите свои: »Изведете ме од бојното поле, зашто изнемоштев.« И слугите веднаш го изведоа од стројот.

³¹Тој се качи на втората кола своја и, откако се врати во Ерусалим, умре, и го погребаа во гробницата на татковците негови.

³²И плачеа за Јосија по цела Јудеја, плачеше за Јосија и пророкот Јеремија, и начлниците со жените свои го оплакуваа и до денес. И тоа му беше предадено за секогаш на целиот род Израилев.

³³Тоа е запишано во летописите на јудејските цареви, како и она што го изврши Јосија, и славата негова, и како тој го разбираше законот Господов; а поранешните негови дела и оние, што се спомнуваат сега, се опишани во книгата на царевите израилски и јудејски.

³⁴И народот го зеде Јехонија, синот Јосиев, та го постави за цар на место татка му Јосија, кога беше на дваесет и три години.

³⁵Тој царуваше во Јудеја и Ерусалим три месеци, и него го собори египетскиот цар, за да не царува во Ерусалим.

³⁶И му наложи на народот сто таланти сребро и еден талан злато.

³⁷Потоа го постави египетскиот цар братот негов Јоаким за цар на Јудеја и Ерусалим.

³⁸И ги врза големците, а братот негов Заракин го одведе во Египет.

³⁹А Јоаким беше на дваесет и пет години, кога стана цар над Јудеја и Ерусалим, и правеше зло пред Господа.

⁴⁰Против него излезе вавилонскиот цар, го окова во бакарни вериги и го одведе во Вавилон.

⁴¹И откако зеде некои од свештените садови Господови, Навуходоносор ги пренесе и ги постави во своето светилиште во Вавилон.

⁴²Расказите за него и за неговата расипаност и нечесност се запишани во книгата на царските летописи.

⁴³А место него стана цар синот негов Јоаким; тој беше на осумнаесет години кога го поставија за цар.

⁴⁴Тој царуваше во Ерусалим три месеци и десет дена и правеше зло пред Господа.

⁴⁵По една година Навуходоносор испрати по него, та го однесоа во Вавилон заедно со свештените садови Господови,

⁴⁶а за цар на Јудеја и Ерусалим го постави Седекија, кој беше на дваесет и една година. Тој царуваше единаесет години.

⁴⁷И тој правеше зло пред Господа, не слушајќи ги зборовите кажани преку пророкот Јеремија од Господовата уста.

⁴⁸И бидејќи врзан од царот Навуходоносор со клетва во името Господово, тој ја наруши клетвата, се одметна, и стана упорен и жестокосрдечен, ги погази законите на Господа, Бога Израилев.

⁴⁹Исто така и старешините народни и свештениците постапија многу нечесно, надминувајќи ги по сите нечистотии сите незнабошци, и го осквернија осветениот храм Госоподов во Ерусалим.

⁵⁰А Бог на татковците нивни испраќаше свои пратеници, повикувајќи ги да се обрнат, зашто ги чуваше и нив и своето живеалиште;

⁵¹но тие им се смееја на неговите пратеници; во истиот ден, кога Господ им говореше, тие им се подсмеваа на пророците Негови.

⁵²И Он се разгневи на народот Свој поради нечесноста, па им заповеда на халдејските цареви да се кренат против нив.

⁵³Тие ја сотреа со меч младината нивна околу нивниот свет храм, и не ги поштедија ни младичите, ни девиците, ни старите, ни младите, туку сите беа предадени во нивни раце.

⁵⁴Ги зедоа сите свештени садови Господови, мали и големи, и садовите оф Господовиот ковчег и царските ризници, и ги однесоа во Вавилон.

⁵⁵и го запалија Господовиот дом и ги разрушија ѕидовите ерусалимски, а кулите негови со оган ги изгореа;

⁵⁶и сета велелепност ја претворија во урнатини; а избеганите, пак, од меч ги одведоа во Вавилон.

⁵⁷И тие му беа робови нему и на синовите негови сѐ до владеењето на Персијците, за да се исполни зборот Господов од устата на Јеремија:

⁵⁸додека земјата не ги отпразнува своите саботи, за сето време на запустувањето свое, во текот на седумдесет години, таа ќе саботничи.