Read Свето Писмо (Гаврилова) 1990 2. Ездра 9 Bible Online

2. Ездра 9 - Свето Писмо (Гаврилова) 1990 bible

2. Ездра 9

¹Стана Ездра од хармовиот притвор, та отиде во живеалиштето на Јоанана, син Елијасивов,

²и, останувајќи таму, не јадеше леб и не пиеше вода, тагувајќи поради големите беззаконија на народот.

³Тогаш излезе повик по цела Јудеја и Ерусалим до сите оние што се вратија од пленство, да се соберат во Ерусалим;

⁴на оние, што не ќе се јават внатре за два или три дена, по решение на старешините — претседатели, ќе им биде одземен имотот, и тие самите ќе бидат одвоени од мнозинството на бившите пленици.

⁵И во три дни се собраа во Ерусалим сите, што беа од коленото Јудино и Венијаминово: тоа беше во деветиот месец, на дваесеттиот ден од тој месец.

⁶Сиот народ седеше во дворот на храмот, треперејќи од настанатата зима.

⁷Ездра стана и им рече: »Ете извршивте беззаконие и живеете со жени туѓинки, додавајќи уште гревови на Израилот.

⁸Затоа воздајте сега исповед и слава кон Господа, Бога на татковците наши,

⁹извршете ја волјата Негова и одделете се од народите на таа земја и од другоплеменските жени!«

¹⁰Тогаш целото множество извика и рече со висок глас: »Како што рече, така и ќе направиме.

¹¹Но множеството е големо, а времето е зимно, и ние не сме во можност да стоиме на отворено небо; а таа работа за нас не е за еден ден, ниту за два дена, зашто многу сме згрешиле во тоа;

¹²затоа нека бидат поставени началници над множеството, и сите од нашите села, што имаат другоплеменски жени, да доаѓаат своевремено при нив

¹³со старешините и судиите на секое место, додека не се одврати од нас Божјиот гнев поради таа работа.«

¹⁴Го зедоа тоа врз себе Јонатан, синот Асаилов, и Езекија, синот Токанусов, А Месулам, Левис и Саватеј им помагаа.

¹⁵И вратените од пленство извршија според сето тоа.

¹⁶Свештеникот Ездра си избра главни родоначалници, сите поименично, и тие се собраа во новомесечјето на десеттиот месец, за да ја испитаат работата.

¹⁷Испитувањето на мажите, што држеа при себеси другоплеменски жени, се заврши во новомесечјето на првиот месец.

¹⁸И се најдоа од собраните свештеници, што имаа другоплеменски жени:

¹⁹од синовите на Исуса, Јоседеков син, и од браќата негови — Матилас, Елеазар, Јорив и Јоадан,

²⁰кои дадоа рака да ги напуштат жените свои, и принесоа овни за умилостување поради гревот свој;

²¹од синовите Емирови — Ананија, Завдеј, Јанин, Самеј, Јериел и Азариј

²²ос синовите Фесурови — Елионас, Масија, Исмаил, Натанаил, Окидил и Салоја;

²³а од левитите — Јозавад, Самеј, Колиј, Патеј, Јуда и Јона;

²⁴од свештенопевците — Елиасав и Вакхур;

²⁵од вратарите — Салум и Толван;

²⁶од народот Израилски, од синовите Форосови — Јерма, Једија, Мелхија, Маил, Елеазар, Асавија и Ванеја;

²⁷од синовите Илаеви — Матанија, Захарија, Јереил, Јоавдиј, Јеримот и Аидија;

²⁸од синовите Замотови — Елијада, Елисим, Отонија, Јаримот, Сават и Сардеј;

²⁹од синовите Виваеви — Јоан, Ананија, Јозавад и Ематија;

³⁰Од синовите Маниеви — Олам, Мамух, Једеј, Јасув, Јасаил и Јеримот;

³¹од синовите Адиеви — Натиј, Мосија, Лакун, Наид, Матанија, Сестил, Валнуј и Манасија;

³²од синовите Ананови — Елиона, Јасеј, Мехлија, Савеј и Симон Хосамеј;

³³од синовите Асомови — Алтанеј, Матиј, Ванеј, Алифалат, Манасиј и Семеј;

³⁴од синовите Вааниеви — Јеремија, Момдиј, Исмаир, Јуил, Мавдај, Педиј, Анос, Равасион, Јенасив, Мамнитанем, Елијасис, Вануј, Елијалиј, Самеј, Селемиј, Натаниј; од синовите Озорови — Сесиј, Езраил, Азаил, Самат, Замри, Јосиф;

³⁵од синовите Етмови — Мазитија, Завадеј, Идај, Јуил, Ванеја.

³⁶Сите тие живееја со другоплеменски жени и ги напуштија со децата.

³⁷И во новомесечјето на седмиот месец свештениците и левитите и Израилците, кои беа во Ерусалим и во областа негова, и синовите Израилеви се населија по местата свои.

³⁸И се собра еднодушно сиот народ на плоштадот пред источната врата на храмот,

³⁹и му рекоа на Ездра, свештеник и толкувач, да го донесе Мојсеевиот закон, даден од Господа, Бога Израилев.

⁴⁰И првосвештеникот Ездра го изнесе Законот пред сиот народ, мажи и жени, и пред сите свештеници, за да го чујат Законот во новомесечјето на седмиот месец,

⁴¹и тој им го читаше на плоштадот пред вратите на храмот од утрината до пладне, пред мажите и жените и сиот народ го слушаше Законот.

⁴²Свештеникот и толкувачот Ездра застана на подготвеното дрвено повисоко место;

⁴³и пред него стоеја оддесно: Мататија, Самуиј, Ананиј, Азариј, Уриј, Езекиј и Валасам;

⁴⁴а од лево: Фалдеј, Мисаил, Мелхија, Аотасув, Наварија, Захарија.

⁴⁵Тогаш Ездра ја зеде Книгата на законот пред народот, седна свечено пред исте,

⁴⁶и додека го објаснуваше Законот, сите стоеја; и Ездра го благослови Господа, Севишниот Бог, Бог Саваот, Вседржителот.

⁴⁷И сиот народ возгласи: »Амин!« И, откако ги кренаа угоре рацете, сите паднаа ничкум и Му се поклонија на Господа.

⁴⁸Исто така и левитите: Исус, Ануил, Саравија, Јадин, Јакув, Саватија, Автеј, Меанеј, Калита, Азарија, Јозавад, Ананиј и Вијад, поучуваа во Законот Господов и го читаа пред народот Законот Господов, објаснувајќи го притоа прочитаното.

⁴⁹Тогаш Атарат му кажа на Ездра, првосвештеник и толкувач, и на левитите, кои го поучуваа народот, и на сите:

⁵⁰»Овој ден е свет пред Господа — и сите плачеа, кога го слушаа Законот —

⁵¹одете и јадете масно и пијте слатко и испратете им милостиња на оние, што немаат,

⁵²зашто овој ден е свет пред Господа; и за тоа не тагувајте, зашто Господ ќе ве прослави.«

⁵³Исто така и левитите му говореа на сиот народ и му рекоа: »Овој ден е свет, не тагувајте!«

⁵⁴Тогаш сите отидоа да јадат и да пијат, да се веселат, и да даваат милостиња на сиромаси; и се веселеа многу;

⁵⁵зашто беа восхитени од зборовите, со кои ги поучуваа во собранието.