Read Свето Писмо (Гаврилова) 1990 Товит 4 Bible Online

Товит 4 - Свето Писмо (Гаврилова) 1990 bible

Товит 4

¹Во тој ден Товит си спомна за среброто, што го беше дал на чување кај Гаваила во Рага Мидиска,

²па си рече во себеси: »Јас ја барав смртта, а зошто не го повикам мојот син Товија и да го известам за ова додека не сум умрел?«

³Откако го повика, му рече: »Синко, кога ќе умрам, погреби ме и не ја оставај мајка ти; почитувај ја во сите денови на твојот живот, угодувај ѝ и не огорчувај ја.

⁴Спомнувај си, синко мој дека таа се измачила многу за тебе уште додека била бремена со тебе, а кога ќе умре, погреби ја покрај мене во истиот гроб.

⁵Синко, секој ден спомнувај си за Господа, нашиот Бог; не греши и не прекршувај ги Неговите заповеди. Прави праведни дела во сите дни на твојот живот и не оди по патиштата на беззаконието.

⁶Зашто, ако постапуваш според вистината, ќе успеваш во сите твои дела, како и сите оние што живеат праведно.

⁷Од имотот твој давај милостиња — да не жали твоето око. Не свртувај го лицето твое од сиромавиот, па и Бог нема да го сврти Своето лице.

⁸Кога имаш многу, давај од тоа милостиња, а и кога имаш малку, не плаши се да правиш милостиња и по малку:

⁹така ќе си собереш богато сокровиште за деновите на поголема нужда,

¹⁰зашто милостињата избавува од смрт и не дозволува да отидеш во темнина.

¹¹Милостињата е добар дар за секого што ја прави пред Севишниот.

¹²Синко, пази се од секаков блуд и прељуба. Гледај жената твоја да биде од племето на твоите татковци; не земај туѓинка за жена, која не е од племето на татко ти, зашто ние сме синови на пророци; Ное, Авраам, Исак и Јаков се наши татковци уште од почетокот. Помни, синко, оти тие земаа жени меѓу своите браќа и дека беа благословени меѓу своите деца, нивното потомство ќе ја наследи земјата.

¹³И така, синко, сакај ги своите браќа и не се гордеј во срцето свое пред твоите браќа и пред синовите и ќерките на својот народ дотаму, за да не одбереш меѓу нив жена за себе; од гордоста произлегува голема пропаст и голема неуредност, а од развратот — само немаштина и пропаст; развратот е мајка на гладот.

¹⁴Платата на наемникот да не преноќева кај тебе, туку исплатувај им ја веднаш. Ако му служиш на Бога, и тебе ќе ти биде платено. Синко, добор размислувај за секоја твоја работа и биди внимателен во сите твои постапки и во сите твои однесувања.

¹⁵Она што не сакаш да ти се прави тебе, ни ти не прави му го на друг. Не пиј вино до опивање, и пијанството да не оди со тебе по патот твој

¹⁶Од лебот твој давај им на гладните, а необлечениот — со облека твоја облечи го; дели милостиња од сѐ што имаш во изобилие, а да не жали твоето око кога делиш милостиња.

¹⁷Раздавај го твојот леб на гробот од праведниците и не давај им го на грешниците.

¹⁸Барај совет од оној што е мудар, а корисен совет не отфрлај.

¹⁹Ве секое време благословувај Го Господа Бога и молу Му се да ги исправува твоите патишта, и сите твои намери и дела добро да завршат, зашто ниеден народ не може со успех да го заврши започнатото: Бог е Оној Кој го испраќа секое добро, а кога сака, според Својата волја, понизува. Синко, спомнувај ги моите поуки: никогаш да не бидат избришани од твоето срце!

²⁰А сега, синко, ќе ти откријам, дека сум оставил десет таланти сребро на чување кај Гавриевиот син Гаваил, во Рага Мидиска.

²¹Не плаши се, синко дека сме осиромашени; ќе имаш многу, ако имаш страв од Бога, ако бегаш од секој грев и ако го правиш она што Му е угодно Нему.«