Read Свето Писмо (Гаврилова) 1990 Јудита 1 Bible Online

Јудита 1 - Свето Писмо (Гаврилова) 1990 bible

Јудита 1

¹Во дванаесеттата година од царувањето на Навуходоносор, царот на Асирците, во големиот град Ниневија, во деновите на Арфаксада кој царуваше над Мидијците во Екбатана.

²И изгради околу Екбатана ѕидови од делкани камења, седумнаесет лакти во висина и петнаесет лакти во широчина.

³Над вратите изгради кули високи сто лакти, кои во основата беа до сто лакти широки;

⁴а портата ја беше направил седумдесет лакти висока и четириесет лакти широка, за да може низ неа да излезе голема војска со широки редови пешадија.

⁵Во тоа време царот Навуходоносор почна војна против царот Арфаксад во големата рамнина, која се наоѓаше во пределите на Рагав.

⁶При него се собраа сите што живееја во планинските страни, сите што живееја до бреговите на реките Еуфрат, Тигар и Идаспис, како и жителите од рамнината Ариох со Елимеонскиот цар; се собраа многу народи во одбраната на Хелеудовите синови.

⁷Навуходоносор, царот на Асирците, им испрати порака на сите жители во Персија, на сите оние што живееја на запад, до оние во Киликија и Дамаск, Ливан и Антиливан, до сите што живееја до морскиот брег,

⁸и меѓу народите на Кармил и Гилад, во горна Галилеја и во широката рамнина Ездрилон,

⁹до сите кои живееја во Самарија и во нејзините градови, од другата страна на реката Јордан — до Ерусалим, до Ветан и Хел, до Кадис и Египетската река, до Тафна и Рамсес и по целата Гесемска земја,

¹⁰до входот на Горни Танис и Мемфис, до сите жители на Египет и сѐ до границите на Етиопија.

¹¹Но жителите на сите тие земји се подбија со пораката на асирскиот цар Навуходоносор и не дојдоа кај него, за да војуваат за него, зашто не се плашеа од него; тој за нив беше обичен човек; тие ги вратија неговите пратеници, не укажувајќи им почести.

¹²Затоа Навуходоносор многу се разгневи на сите тие земји и се заколна во својот престол и во царството дека ќе им се одмазди на сите области во Киликија, Дамаск и Сирија, дека ќе ги погуби сите жители во земјата на Моав, сите жители на Амон, цела Јудеја и сите кои живеат во Египет сѐ до двете мориња.

¹³Во седумнаесеттата година тој стана со својата војска против царот Арфаксада, го победи во борбата, му ја распрсна сета војска негова, коњицата и сите коли;

¹⁴ги презеде неговите градови, допре сѐ до Екбатана, ги зазеде неговите тврдини, ги опустоши улиците на градот и неговата убавина ја направи за подбив.

¹⁵Арфаксада го фати во Рагавските гори, го прониза со копје, уште истиот ден го погуби.

¹⁶Потоа се врати во Ниневија со сета своја војска, со големо множество борци на неговите сојузници. Таму во мир И спокојство тој и сета негова војска почиваа и мируваа сто и дваесет дена.