Read Свето Писмо (Гаврилова) 1990 Јудита 2 Bible Online

Јудита 2 - Свето Писмо (Гаврилова) 1990 bible

Јудита 2

¹Во осумнаесеттата година, во дваесет и вториот ден од првиот месец, во царската палата на Навуходоносор, асирскиот цар, се даде заповед за одмазда, на целата земја, како што беше рекол.

²Откако ги повика сите свои помошници и високодостојници, тој им ја откри својата крајна намера и со својата уста одлучи полно уништување на оние покраини.

³И тие решија да ги уништат сите што не се покорија на зборовите од неговата уста.

⁴Кога заврши советувањето, Навуходоносор, асирскиот цар, го повика при себе Олоферна, врховниот заповедник на сите негови војски, вториот човек веднаш до него, и му рече:

⁵»Вака говори великиот цар, господарот над целата земја: ќе појдеш и ќе поведеш со себе мажи, свесни за својата сила, од прилика сто и давесет илјади пешаци и многу коњи со дванаесет илјади коњаници,

⁶и ќе појдеш против целата земја на запад, зашто не се покорија на зборовите од мојата уста.

⁷Ќе им наредиш да подготват земја и вода, зашто со гневот свој ќе ги нападнам, целата нивна земја ќе ја покријам со нозете на моите војници и ќе ги предадам на ограбување.

⁸Доловите и потоците ќе се наполнат со нивните ранети, а реката, преполна со нивните мртви тела, ќе прелие.

⁹ќе ги прогонам нивните пленици дури до краиштата на целата земја.

¹⁰А ти појди и заземи ги за мене сите нивни земји; Ако ти се предадат сами, запази ги до денот на нивното казнување;

¹¹окото твое да не ги поштеди непокорните: предај ги на смрт и ограбувај ја сета земја што ти е предадена.

¹²Кажав и со својата рака ќе го направам тоа, се заколнувам со својот живот и со силата на своето царство.

¹³А ти немој да прекршиш ниедна од заповедите на својот господар, туку направи сѐ така како што ти заповедам, неодложно така направи.«

¹⁴Олоферн, откако излезе од кај својот господар, ги повика при себе сите војсководители, заповедници и началници на асирската војска,

¹⁵преброја одбор мажи за борба, како што му заповеда неговиот господар: сто и дваесет илјади луѓе и дванаесет илјади стрелци коњаници,

¹⁶и ги нареди како што се редат војници кога одат во борба.

¹⁷Зеде голем број камили, осли и маски за пренос на нивната опрема, а и голем број овци, волови и кози — за храна на војниците,

¹⁸многу храна како и многу злато и сребро од царската палата.

¹⁹И појде со сета војска во поход, како претходница на царот Навуходоносор, за да го покрие целото лице на земјата со коли, коњаници и избрани пешаци.

²⁰А со него појдоа и многу сојузници — многубројни како скакулци и како песок, така што не можеа да ги пребројат.

²¹Појдоа од Ниневија и по три дена пристигнаа до рамнината Бектилет, па се улогорија близу до гората, која се наоѓаше лево од Горна Киликија.

²²Оттаму, откако ја поведе целата своја војска — пешаците, коњаниците и оние со колите, отиде во планинските предели,

²³па ги победи Фудјаните и Лудјаните и ги ограби сите синови на Расис и Исмаил, кои живееја во пустињата, јужно од Земјата Хелеонска.

²⁴Потоа, откако го преброди Ефрат, помина низ Месопотамија и ги разурна сите градови по висините покрај потокот Аврон, сѐ до излезот на морскиот брег.

²⁵Откако ги зазеде сите области во Киликија, ги погуби сите што му се противставуваа, стигна до областите Јафетови на југ, кои се наоѓаат пред Арабија.

²⁶Ги заобиколи сите синови на Мадијам, шаторите им ги запали и им ги разграба стадата.

²⁷Потоа се спушти во рамнината на Дамаск токму во време на жетва, сите ниви им ги изгоре, стадата и овците им ги зеде; градовите им ги ограби, полињата им ги опустоши, а со острицата на својот меч ги посече сите нивни момчиња.

²⁸Страв и ужас ги опфати приморските градови Тир и Сидон, жителите на Сур и Окина и сите жители на Јамнаан; многу се исплашија од него и сите жители на Азот и Аскалон.